ខេត្តកំពត៖ រាជរដ្ឋាភិបាល បានសម្រេចកាត់យកឃុំបីរបស់ស្រុកទឹកឈូ ដើម្បីបង្កើតក្រុងបូកគោហើយ នៅថ្ងៃទី២៥ ខែកក្កដា ឆ្នាំ២០២១ ខាងមុខនេះ ការបោះឆ្នោតជ្រើសរើសក្រុមប្រឹក្សាក្រុងថ្មីនេះ នឹងត្រូវធ្វើឡើង…
ខេត្តកំពត៖ រាជរដ្ឋាភិបាល បានសម្រេចកាត់យកឃុំបីរបស់ស្រុកទឹកឈូ ដើម្បីបង្កើតក្រុងបូកគោហើយ នៅថ្ងៃទី២៥ ខែកក្កដា ឆ្នាំ២០២១ ខាងមុខនេះ ការបោះឆ្នោតជ្រើសរើសក្រុមប្រឹក្សាក្រុងថ្មីនេះ នឹងត្រូវធ្វើឡើង លើកទី១។ អភិបាលខេត្តកំពត យល់ឃើញថា ការបង្កើតក្រុងថ្មីនេះ ដើម្បីបង្កើនប្រសិទ្ធភាពការងារអភិបាលកិច្ចល្អផង និងជួយបន្លឿនការអភិវឌ្ឍន៍ខេត្តផង។
ថ្លែងក្នុងពិធីជួបសំណេះសំណាល ជាមួយសមាជិកក្រុមប្រឹក្សាឃុំ និងជាអង្គបោះឆ្នោតឃុំចំនួន៣ ក្នុងស្រុកទឹកឈូ ដែលនឹងត្រូវកាត់ចេញ ដើម្បីបង្កើតក្រុងបូកគោ នៅថ្ងៃទី៧ ខែឧសភា ឆ្នាំ២០២១នេះ លោក ជាវ តាយអភិបាលខេត្តកំពត បានលើកឡើងថា ខេត្តកំពត មានចំណុចគួរល្អ ដែលគួរឲ្យមានមោទនភាពច្រើនណាស់ ដូចជា ស្របពេល ដែលរាជធានី និងបណ្តាខេត្តផ្សេងៗ កំពុងមានពលរដ្ឋកើតជំងឺកូវីដ១៩ ច្រើន ខេត្តកំពត បច្ចុប្បន្ន មានតែ ៦នាក់ប៉ុណ្ណោះ កំពុងសម្រាកព្យាបាល ហើយយប់ថ្ងៃទី៦ ខែឧសភា ឆ្នាំ២០២១ រាជធានីភ្នំពេញ និងតាមបណ្តាខេត្តជាច្រើន បានរងគ្រោះ ដោយព្យុះភ្លៀង និងខ្យល់កន្ត្រាក់រលំ ខូចខាតដំណាំ ផ្ទះសំបែង តែកំពត អត់មានអ្វីគួរឲ្យកត់សំគាល់ទេ។ ជាងនេះទៅទៀត ថ្មីៗនេះ រាជរដ្ឋាភិបាល បានចេញសេចក្តីសម្រេចឲ្យខេត្តកំពត បង្កើតក្រុងបូកគោមួយថ្មីបន្ថែមទៀត ដែលការបង្កើតក្រុងបន្ថែមនេះ អាចជួយធ្វើឲ្យខេត្តកំពត កាន់តែមានភាពល្អប្រសើរលើការងារអភិបាលកិច្ចល្អរបស់ខ្លួនថែមទៀតផង។
លោកអភិបាលខេត្ត បានបន្ថែមទៀតថា ឃុំបីនៃស្រុកទឹកឈូ មានឃុំព្រែកត្នោត ឃុំកោះតូច និងឃុំបឹងទូក ដែលត្រូវកាត់មកបង្កើតជាក្រុងបូកគោនេះ មានសក្តានុពលខ្លាំង លើវិស័យកសិកម្ម ឧស្សាហកម្ម ទេសចរណ៍ និងសេដ្ឋកិច្ច ដែលបច្ចុប្បន្ន មានអ្នកវិនិយោគជាច្រើន គ្រោងអភិវឌ្ឍន៍ក្រុមហ៊ុនវិនិយោគខ្លួន នៅតំបន់នេះផងដែរ។
លោកក៏បានបញ្ជាក់ថា ការបង្កើតក្រុងថ្មីនេះ ពិតជាមានសារៈសំខាន់ណាស់ ក្នុងការជួយបង្កើនប្រសិទ្ធិភាពការងារអភិបាលកិច្ចល្អផង និងជួយពន្លឿនការអភិវឌ្ឍន៍នៅក្នុងខេត្តកំពតផង ពិសេសតំបន់ក្នុងក្រុងបូកគោនោះតែម្តង ហើយប្រជាជន នឹងមានជីវភាពកាន់តែធូរធាផងដែរ។
ដំណើរចុះសួរសុខទុក្ខរបស់លោកអភិបាលខេត្តកំពត នាពេលនេះ គឺដើម្បីពង្រឹងស្មារតីឆន្ទៈអង្គបោះឆ្នោត ឲ្យមានការត្រៀមលក្ខណៈ ក្នុងការចូលរួមបោះឆ្នោតជ្រើសរើសក្រុមប្រឹក្សាក្រុងបូកគោ នៅថ្ងៃទី២៥ ខែកក្កដាខាងមុខនេះ ឲ្យមានប្រសិទ្ធភាពនិងមានភាពរលូន ស្របតាមច្បាប់ស្ដីពីការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ក៏ដូចជាស្របតាមលិខិតបទដ្ឋាន និងការណែនាំរបស់ក្រសួងមហាផ្ទៃ និងរាជរដ្ឋាភិបាលផងដែរ៕ ប្រាក់ សារិទ្ធ
ចែករំលែកព័តមាននេះ