ឥណ្ឌា ៖ ស្ថាប័នស្រាវជ្រាវសុខភាពពិភពលោកនៃវិទ្យាស្ថាន Health Metrics and Evaluation (IHME) ដែលមានមូលដ្ឋាននៅសហរដ្ឋអាមេរិក បានធ្វើការព្យាករណ៍ដោយផ្អែកលើគំរូដ៏រឹងមាំមួយថា អ្នកស្លា.ប់ដោយសារកូវីដ១៩ នៅប្រទេសឥណ្ឌានឹងកើនឡើងដល់ជាង ១លាននាក់នៅដើមខែសីហា។ នេះបើតាមការចេញផ្សាយដោយសារព័ត៌មាន Hindustan Times របស់ឥណ្ឌា។
វិទ្យាស្ថាននេះ ជឿជាក់លើសេណារីយ៉ូដ៏អាក្រក់បំផុត គិតត្រឹមថ្ងៃទី១ ខែកក្កដា ចំនួនអ្នកស្លា.ប់ដោយកូវីដសរុបនៅឥណ្ឌា នឹងកើនឡើងដល់ ១,០២១,២០០នាក់។ ខណៈដែលការព្យាករណ៍ទិន្នន័យដំបូងបង្ហាញថា ការស្លា.ប់នឹងមានត្រឹមតែ ៩៦១,៦៩២នាក់ប៉ុណ្ណោះ ដោយគិតត្រឹមកាលបរិច្ឆេទដូចគ្នា។
ចំនួនករណីឆ្លង និងស្លា.ប់ដោយកូវីដ១៩ នៅក្នុងប្រទេសឥណ្ឌាបន្តកើនឡើងឥតឈប់ឈរពីមួយថ្ងៃទៅមួយថ្ងៃ។ ខណៈដែលមន្ទីរពេទ្យជាច្រើននៅតែបន្តខ្វះខាតគ្រែ, គ្រឿងបរិក្ខារវេជ្ជសាស្ត្រ ជាពិសេសការផ្គត់ផ្គង់អុកស៊ីសែន។ ដែលបណ្តាលឱ្យអ្នកជំងឺស្លា.ប់យ៉ាងអាណោចអាធ័មបំផុត។
ដោយឡែកនៅថ្ងៃទី៩ ខែឧសភា នេះ ក្រសួងសុខភិបាលឥណ្ឌាបានរាយការណ៍អំពីចំនួនអ្នកស្លា.ប់ដោយកូវីដថ្មីមាន ៤,០៩២នាក់ក្នុងរយៈពេល ២៤ម៉ោងកន្លងមក។ ដោយនាំឱ្យចំនួនអ្នកស្លា.ប់សរុបកើនឡើងដល់ ២៤២,៣៩៨នាក់។ ខណៈដែលករណីឆ្លងថ្មីមានចំនួន ៤០៣,៧៣៨នាក់។ ដែលនាំឱ្យចំនួនអ្នកឆ្លងសរុបកើនឡើងដល់ជាង ២២,៣លាននាក់៕ (ដកស្រង់ចេញពី Hindustan Times និង Reuters)
ចែករំលែកព័តមាននេះ