ខេត្តសៀមរាប ៖ តុលាការសម្រេចឃុំខ្លួនជនសង្ស័យម្នាក់ ដោយចោទពីបទគេចវែសពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ។ ជនសង្ស័យមានឈ្មោះ អ៊ឹង ថៃលី ភេទប្រុស អាយុ២២ឆ្នាំ ជាអាជីវករនៅផ្សារក្រោម មានទីលំនៅភូមិកក្រាញ់ សង្កាត់សៀមរាបក្រុង ខេត្តសៀមរាប ។
គួរបញ្ជាក់ថា ក្រោយពេលដែលសមត្ថកិច្ចរកឃើញថា ជនសង្ស័យរូបនេះបានគេចវែសពីការធ្វើចត្តាឡីស័ក បណ្តាលឱ្យមាន ការចម្លងជម្ងឺកូវីដ១៩ បន្តចូលក្នុងសហគមន៍ចំនួន០៧នាក់ (ជាអាជីវករនៅផ្សារក្រោម)។ ជនសង្ស័យរូបនេះបានគេចវែសពីការធ្វើ
ចត្តាឡីស័ក និងបណ្តាលឱ្យមានការចម្លងជំងឺកូវីដ១៩បន្តចូលក្នុងសហគមន៍ចំនួន៧នាក់(ដែលជាអាជីវករនៅផ្សារក្រោមដូច
គ្នា)។
បន្ទាប់ធ្វើការសាកសួរ ជនសង្ស័យត្រូវបាន ចៅក្រមស៊ើបសួរនៃសាលាដំបូងខេត្តសៀមរាប សម្រេចចេញដីកាបង្គាប់ឲ្យឃុំខ្លួនបណ្តោះ អាសន្ននៅពន្ធនាគារខេត្តសៀមរាប ដោយចោទប្រកាន់ពីបទគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក។
សូមបញ្ជាក់ទៀតថា អង្គហេតុដើម្បីចាត់វិធានការទប់ស្កាត់ការឆ្លងរាលដាលជម្ងឺកូវីដ១៩ ចូលក្នុងសហគមន៍ នាថ្ងៃទី២៦-០៣-២០២១ រដ្ឋបាលខេត្តសៀមរាបបានចេញសេចក្តីប្រកាសព័ត៌មាន ដោយសម្រេចបិទហាងកាហ្វេលឹង្គ១០០០ ជាបណ្តោះអាសន្ន និងអំពាវនាវឱ្យប្រជាពលរដ្ឋដែលមានទំនាក់ទំនងនឹងទីតាំងហាងកាហ្វេលឹង្គ១០០០ ឬអ្នកវិជ្ជមានទាំងពីររូបពាក់ព័ន្ធហាងកាហ្វេលឹង្គ១០០០ (ចាប់ពីថ្ងៃទី១៥ ដល់ថ្ងៃទី២៤ ខែមីនា ឆ្នាំ២០២១) រួសរាន់ទៅយកសំណាកនៅសាលាគរុកោសល្យនិងធ្វើចត្តា ឡីស័កតាមការណែនាំរបស់ក្រុមគ្រូពេទ្យ។
តែចំពោះជនសង្ស័យឈ្មោះ អុឹង ថៃលី ភេទប្រុស អាយុ២២ឆ្នាំ ជាបុគ្គលមួយរូបដែលបានចេញ ចូលហាងកាហ្វេលឹង្គ១០០០ជាប្រចាំ ចាប់ពីថ្ងៃទី១០ ដល់ថ្ងៃទី២០ ខែមីនា ឆ្នាំ២០២១ ហើយបានព្យាយាមគេចវែសពីការយកសំណាក និងធ្វើចត្តាឡីស័ក ទោះបីជាខ្លួនបានទទួលព័ត៌មានពីមិត្ភភក្តិ និងបានឃើញសេចក្តីប្រកាសព័ត៌មានរបស់រដ្ឋបាលខេត្ក៏ដោយ នឹងបានបន្តទៅលក់ដូរនៅផ្សារក្រោម និងទៅកន្លែងផ្សេងទៀតជាធម្មតា។
រហូតដល់ថ្ងៃទី ០៩-០៤-២០២១ ទើបសមត្ថកិច្ចយើងស្វែងរកឃើញនិងបញ្ជូនមកយកសំណាក ធ្វើតេស្តនិងធ្វើចត្តាឡីស័កនៅសាលាគរុកោសល្យ ក្រោយ ពេលក្រុមគ្រូពេទ្យបានរកឃើញអ្នកវិជ្ជមាន ដែលពាក់ព័ន្ធនឹងទីតាំងហាងកាហ្វេលឹង្គ ១០០០ចំនួនពីរនាក់បន្ថែមរួមមាន ឈ្មោះ ពុធ សំអាត និងឈ្មោះ ទាវ សូវៀត។ រហូតដល់ថ្ងៃទី១១-០៤-២០២១ ក្រុមគ្រូពេទ្យបានយកវត្ថុសំណាក ទៅពិនិត្យទទួលបានលទ្ធផលបញ្ជាក់ថា បុគ្គលនេះមានវិជ្ជមានកូវី១៩ បណ្តាលឲ្យមានការចម្លងបន្តចូលក្នុងសហគមន៍ចំនួន០៧នាក់។
បន្ទាប់ពីព្យាបាលជាសះស្បើយកាលពីថ្ងៃទី ២២-០៤-២០២១ ត្រូវបានក្រុមគ្រូពេទ្យអនុញ្ញាតឲ្យត្រឡប់ទៅផ្ទះធ្វើចត្តាឡីស័កបន្ត និងត្រូវមកយកសំណាក ធ្វើតេស្តម្តងទៀតនាថ្ងៃទី០៦-០៥-២០២១ ក្រោយពីទទួលបានលទ្ធផលអវិជ្ជមាន ត្រូវបានសមត្ថកិច្ចយើងនាំខ្លួនមកសាកសួរនៅស្នងការដ្ឋាននគរបាលខេត្តសៀមរាបតែម្តង។ បច្ចុប្បន្ន ជនសង្ស័យត្រូវបានកម្លាំងនគរបាលការិយាល័យជំនាញបានបញ្ជូនខ្លួនទៅដាក់ពន្ធនាគារបណ្តោះអាសន្នតាមដេការរបស់តុលាការខេត្ត៕ ដោយ៖ ចន្ទ រស្មី
ចែករំលែកព័តមាននេះ