ខេត្តកំពង់ចាម ៖ ដោយសារតែមើលឃើញកំណើនអ្នកជំងឺកូវីដ-១៩ ត្រូវបានរកឃើញជាបន្តបន្ទាប់ លើប្រជាពលរដ្ឋមានក្មេងចាស់ប្រុសស្រី នៅតាមបណ្ដាលស្រុកនានា ក្នុងខេត្តកំពង់ចាម លោក អ៊ុន ចាន់ដា…
ខេត្តកំពង់ចាម ៖ ដោយសារតែមើលឃើញកំណើនអ្នកជំងឺកូវីដ-១៩ ត្រូវបានរកឃើញជាបន្តបន្ទាប់ លើប្រជាពលរដ្ឋមានក្មេងចាស់ប្រុសស្រី នៅតាមបណ្ដាលស្រុកនានា ក្នុងខេត្តកំពង់ចាម លោក អ៊ុន ចាន់ដា អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ១៩ នៅថ្ងៃទី៦ ឧសភា ២០២១ បានចេញសេចក្តីណែនាំ ស្ដីពី ការអនុវត្តគិតតែពាក់ម៉ាស់ និងកាតព្វកិច្ច រក្សាគម្លាតសុវត្ថិភាព ក្នុងអំឡុងពេល នៃការឆ្លងរាលដាលជំងឺកូវីដ-១៩ ដែលនឹងត្រូវធ្វើការផាកពិន័យ ចំពោះអ្នកល្មើសនឹងបម្រាម ដោយមិនព្រមពាក់ម៉ាស់ ។
យោងតាមអនុក្រឹត្យលេខ៣៧ អនក្រ ចុះថ្ងៃទី១២ ខែមីនា ឆ្នាំ២០២១ ស្ដីពីវិធានការសុខាភិបាល ដើម្បីទប់ស្កាត់ការឆ្លងរាលដាល នៃជំងឺកូវីដ-១៩ នឹងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត យោងតាមប្រកាសលេខ ០៨១ ស.នក.ប្រក របស់ក្រសួងសុខាភិបាល ស្ដីពីកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព នៅក្នុងអំឡុងពេល នៃការឆ្លងរាលដាលជំងឺកូវីដ-១៩ ក្នុងសហគមន៍ និងយោងតាមសេចក្តីជូនដំណឹងរបស់ក្រសួងសុខាភិបាលលេខ ២១៣ ។
ជាមួយនោះ រដ្ឋបាលខេត្តកំពង់ចាម សូមធ្វើការណែនាំដល់លោកប្រធានគណៈបញ្ជាការឯកភាពរដ្ឋបាលក្រុង-ស្រុក លោកលោកស្រីប្រធានមន្ទីរអង្គភាព និងលោក-លោកស្រីមេឃុំ-ចៅសង្កាត់ ដូចខាងក្រោម ៖
១. គណៈបញ្ជាការឯកភាពរដ្ឋបាលក្រុងស្រុក និងឃុំសង្កាត់ ត្រូវអប់រំផ្សព្វផ្សាយឲ្យបានជាប់ជាប្រចាំដល់បងប្អូនប្រជាពលរដ្ឋ ម្ចាស់គ្រឹះស្ថានឯកជន អ្នកគ្រប់គ្រងទីតាំងសាធារណៈ ដែលត្រូវអនុវត្តនូវកាតព្វកិច្ចពាក់ម៉ាស និងកាតព្វកិច្ច រក្សាគម្លាតសុវត្ថិភាព តាមការណែនាំរបស់ក្រសួងសុខាភិបាល។
២. គណៈបញ្ជាការឯកភាពរដ្ឋបាលក្រុងស្រុក ត្រូវចេះត្រួតពិនិត្យជាប់ជាប្រចាំ នៅតាមទីតាំងសាធារណៈ និងឯកជន ដែលត្រូវអនុវត្តកាតព្វកិច្ចពាក់ម៉ាស និងរក្សាគម្លាតសុវត្ថិភាព ។
៣. មន្ទីរអង្គភាពជុំវិញខេត្ត ត្រូវណែនាំដល់មន្ត្រីក្រោមឱវាទ និងមន្ត្រីទទួលសេវាត្រូវអនុវត្ត ឲ្យបានខ្ជាប់ខ្ជួន នូវកាតព្វកិច្ចពាក់ម៉ាស និងរក្សាគម្លាតសុវត្ថិភាព នៅតាមគ្រឹះស្ថានរបស់ខ្លួន ។
៤. បុគ្គលដែលត្រូវមានកាតព្វកិច្ចពាក់ម៉ាស និងរក្សាគម្លាតសុវត្ថិភាព ។
ត្រូវពាក់ម៉ាសរួមមាន ៖
-បុគ្គលដែលមាន វិជ្ជមានកូវីដ-១៩ ក្នុងពេលជួបផ្ទាល់ជាមួយមន្ត្រីសុខាភិបាល និងមន្ត្រីមានសមត្ថកិច្ចផ្សេងទៀត
-បុគ្គលដែលមានកាតព្វកិច្ចធ្វើចត្តាឡីស័ក លើកលែងតែបុគ្គលនោះ ធ្វើចត្តាឡីស័កនៅក្នុងបន្ទប់ដាច់ដោយឡែកតែឯង និងមិនជួបផ្ទាល់ជាមួយអ្នកដទៃ ។
-អ្នកបើកយានយន្ត និងអ្នកធ្វើដំណើរតាមមធ្យោបាយដឹកជញ្ជូនសាធារណៈ
-អ្នកផ្ដល់សេវា ផ្ទាល់ដល់អតិថិជន រួមមានបុគ្គលិកជួរមុខ នៅសហគ្រាស ឫគ្រឹះស្ថាន ឫទីតាំងអាជីវកម្មនានា ដែលផ្ដល់សេវាផ្ទាល់ជាមួយអតិថិជន ។
-បុគ្គលផ្សេងទៀត ដែលកំពុងស្ថិតនៅតាមទីសាធារណៈ ដែលមានមនុស្សច្រើន ឫទីកន្លែងដែលមានការជួបជុំមនុស្សចាប់ពី២នាក់ឡើងទៅ ។
៥. បុគ្គលគ្រប់រូប ដែលកំពុងស្ថិតនៅទីកន្លែងធ្វើការ នៃសហគ្រាស ឫគ្រឹះស្ថានឯកជន ទីតាំងអាជីវកម្ម ឫកន្លែងសាធារណៈនានា ដែលមានមនុស្សច្រើន ត្រូវមានកាតព្វកិច្ច រក្សាគម្លាតសុវត្ថិភាពបុគ្គល ។ ការរក្សាគម្លាតសុវត្ថិភាពបុគ្គល ត្រូវមានយ៉ាងតិច ១ម៉ែត្រកន្លះ ពីបុគ្គលម្នាក់ ទៅបុគ្គលម្នាក់ ត្រូវលើកលែងតែ ៖
-ក្នុងចំណោមបុគ្គលនានា ដែលរស់នៅជាប្រចាំ ក្នុងលំនៅដ្ឋានជាមួយគ្នា
-ក្នុងអំឡុងពេលធ្វើដំណើរតាមមធ្យោបាយធ្វើដំណើរឯកជន ក្នុងកាលៈទេសៈ ដែលការរក្សាគម្លាតសុវត្ថិភាពបុគ្គលមិនអាចធ្វើទៅបាន ។
-រវាងមន្ត្រី និងបុគ្គលិកសុខាភិបាល ដែលកំពុងផ្ដល់សេវា នៅតាមគ្រឹះស្ថានសុខាភិបាលសាធារណៈ និងឯកជន ជាមួយនិងអ្នកជំងឺ ឫជាមួយអ្នកដែលមកទទួលសេវាសុខាភិបាល ។
នៅក្នុងសេចក្តីប្រកាសរបស់រដ្ឋបាលខេត្ត បានបញ្ជាក់ថា អាជ្ញាធរមានសមត្ថកិច្ច ឫមន្ត្រីសុខាភិបាល ត្រូវធ្វើការព្រមាន និងណែនាំបុគ្គលដែលមិនអនុវត្តនូវកាតព្វកិច្ចពាក់ម៉ាស់ ដូចនៅក្នុងចំណុចទី៤ នៃសេចក្តីណែនាំនេះ ឫកាតព្វកិច្ចរក្សាគម្លាតសុវត្ថិភាព ដូចក្នុងចំណុចទី៥ នៃសេចក្តីណែនាំនេះ ។
ក្នុងករណីនៅតែប្រព្រឹត្តអំពើល្មើសដដែល ត្រូវផ្តន្ទាទោស ផាកពិន័យអន្តរកាលចាប់ពី២០ម៉ឺនរៀល ទៅ១លានរៀល ។ អាជ្ញាធរមានសមត្ថកិច្ច ឫមន្ត្រីសុខាភិបាល ត្រូវធ្វើការព្រមានណែនាំ ចំពោះអ្នកទទួលខុសត្រូវ ក្នុងការរៀបចំជួបជុំមនុស្ស ឫសកម្មភាពសង្គមដទៃ ដែលមិនគោរពវិធានការរក្សាកម្លាតសុវត្ថិភាពសង្គម ដូចក្នុងចំណុចទី៥ នៃសេចក្តីណែនាំនេះ ។ ក្នុងករណីនៅតែប្រព្រឹត្តអំពើល្មើស ដែលនឹងត្រូវផ្ដន្ទាទោសអន្តរកាលពី១លានរៀល ទៅ ៥លានរៀល ៕
ចែករំលែកព័តមាននេះ