រាជធានីភ្នំពេញ៖ អង្គការភ្លែនអន្តរជាតិកម្ពុជា និងដៃគូអនុវត្តនៅក្នុងប្រទេសកម្ពុជានិងប្រទេសថៃ បានប្រកាសវេទិកាកុមារនិងយុវជន ស្តីពីផលប៉ះពាល់ពីការធ្វើទេសន្តរប្រវេសន៍ ដែលកុមារនិងយុវជន ដែលរងផលប៉ះពាល់ពីការធ្វើទេសន្តរប្រវេសន៍រវាងប្រទេសកម្ពុជា និងប្រទេសថៃ ដែលបានប្រព្រឹត្តទៅនាថ្ងៃទី៦ ខែឧសភា…
រាជធានីភ្នំពេញ៖ អង្គការភ្លែនអន្តរជាតិកម្ពុជា និងដៃគូអនុវត្តនៅក្នុងប្រទេសកម្ពុជានិងប្រទេសថៃ បានប្រកាសវេទិកាកុមារនិងយុវជន ស្តីពីផលប៉ះពាល់ពីការធ្វើទេសន្តរប្រវេសន៍ ដែលកុមារនិងយុវជន ដែលរងផលប៉ះពាល់ពីការធ្វើទេសន្តរប្រវេសន៍រវាងប្រទេសកម្ពុជា និងប្រទេសថៃ ដែលបានប្រព្រឹត្តទៅនាថ្ងៃទី៦ ខែឧសភា ឆ្នាំ២០២១។
គោលបំណងនៃវេទិកានេះគឺដើម្បីកៀងគរកុមារ និង យុវជនអោយជួបជុំ(តាមអ៊ីនធឺណិត) ដើម្បីពិភាក្សាគ្នាអំពីបញ្ហាចំណាកស្រុកដែលស្ថិតនៅក្រោមស្ថានភាពនៃការផ្ទុះឡើងនៃជំងឺកូវីដ១៩ ហើយក៏មានចេញសេចក្តីថ្លែងការណ៍រួម ដើម្បីស្វែងរកមតិគាំទ្រ ពីអ្នកពាក់ព័ន្ធនានាទាក់ទងនឹងសេវាកម្មកិច្ចគាំពារសង្គម។ល។
លោកស្រី គ្វីននេត វ៉ង នាយិកាប្រចាំប្រទេសនៃអង្គការភ្លែនអន្តរជាតិកម្ពុជា មានប្រសាសន៍ថា៖ «វេទិកានេះផ្តោតសំខាន់លើការកសាងទំនាក់ទំនងរវាងកុមារ និងយុវជនដែលរងផលប៉ះពាល់ដោយការធ្វើទេសន្តរប្រវេសន៍ ពីប្រទេសកម្ពុជា ទៅប្រទេសថៃ។ នេះនឹងរួមចំណែក ដល់ការបង្កើនការយល់ដឹងអំពីចន្លោះខ្វះខាត នៃសេវាកម្មលើផ្នែកតម្រូវការយេនឌ័រ កិច្ចគាំពារសង្គមសម្រាប់កុមារ និងយុវជនដែលរួមគ្នាបង្កើតសេចក្តីថ្លែងការណ៍រួម ដើម្បីស្វែងរកមតិគាំទ្រពីអ្នកពាក់ព័ន្ធនានាទាក់ទងទៅនឹងការលើកកម្ពស់សិទ្ធិកុមារលើបញ្ហាការធ្វើទេសន្តរប្រវេសន៍»។
លោក John McGown នាយកប្រចាំប្រទេសនៃអង្គការភ្លែនអន្តរជាតិថៃ បានចែករំលែកបទពិសោធន៍របស់គាត់ជាមួយកុមារ និងយុវជននៅក្នុងវេទិកា ដែលបានរៀបចំឡើងនៅប្រទេសថៃកាលពីខែមីនា និងមេសាថា៖ «វេទិកាយុវជនដែលបានរៀបចំឡើងដោយដៃគូក្នុងស្រុក គឺបណ្តាញការពារការងារ (LPN) បានផ្តល់ឱ្យកុមារដែលបានធ្វើទេសន្តរប្រវេសន៍ មានសុវត្ថិភាព និងមានបរិយាកាសរីករាយ ក្នុងការចែករំលែកបទពិសោធន៍ជីវិតរបស់ពួកគេ ជាមួយមិត្តភក្ដិ និងប្រមូលសម្លេងរបស់ពួកគេរួមគ្នាដើម្បីសិទ្ធិរបស់កុមារ និងទទួលបានសេវាកម្មកិច្ចគាំពារសង្គម មូលដ្ឋានតាមរយៈបណ្តាញសង្គម។ ដំណើរការដែលខ្ញុំបានឃើញនៅក្នុងប្រទេសថៃគឺអស្ចារ្យណាស់ ដោយមានការសម្របសម្រួលបានល្អ ហើយជាលទ្ធផលមិនត្រឹមតែមានប្រសិទ្ធិភាព ដល់អ្នកកាន់កាតព្វកិច្ចប៉ុណ្ណោះទេ ប៉ុន្តែថែមទាំងចងមិត្តភាព ដែលនឹងបន្តទៅមុខបានល្អទៀតផង»។
គម្រោងស្តីពីការបញ្ឈប់ការកេងប្រវ័ញ្ចតាមរយៈការបង្កើតអោយមានសេវាកម្មឆ្លើយតប ឬហៅថា SEASII នៃការផ្លាស់ប្តូររំពឹងថានឹងកសាងសមត្ថភាពអង្គការសង្គមស៊ីវិលរួមទាំងបណ្តាញកុមារ និង យុវជន ដើម្បីធ្វើការយ៉ាងជិតស្និទ្ធជាមួយកុមារ និងយុវជនដែលរងផលប៉ះពាលពីការធ្វើទេសន្តរប្រវេសន៍ ជាពិសេសក្មេងស្រី និងស្ត្រីវ័យក្មេង ដើម្បីអោយពួកគេទទួលបាននូវសេវាកម្មឆ្លើយតបតាមតម្រូវការយេនឌ័រ និងជំរុញអោយរដ្ឋាភិបាល និងផ្នែកឯកជនបង្កើនការលើកកម្ពស់សិទ្ធិកុមារ និងសមភាពយេនឌ័រ ជាពិសេសការយកចិត្តទុកដាក់ចំពោះកុមារចំណាកស្រុក រួមទាំងក្មេងស្រី និងស្ត្រីវ័យក្មេងតាមរយៈ ការពង្រឹងការអនុវត្តគោលនយោបាយនានានៅថ្នាក់ជាតិ និងអន្តរជាតិ។
គម្រោងនេះផងដែរ បាននឹងកំពុងអនុវត្តជាមួយអង្គការដៃគូ នៅក្នុងប្រទេសកម្ពុជា និងថៃគឺរួមមាន អង្គការបន្ទាយស្រី អង្គការបណ្តាញប្រឆាំងការជួញដូរមនុស្សកម្ពុជានៅប្រទេសកម្ពុជា អង្គការមូលនិធិយុវជនជនបទ និងអង្គការមូលនិធិ បណ្តាញការពារការងារនៅប្រទេសថៃ។ តំបន់គោលដៅរបស់គម្រោងនៅកម្ពុជារួមមានខេត្តសៀមរាប និងខេត្តបាត់ដំបង ចំណែកតំបន់គោលដៅប្រទេសថៃគឺទីក្រុងបាងកក ខេត្តសាមុតសាខន ខេត្តត្រាត និងខេត្តរ៉ាក់យ៉ង។
គម្រោងក៏មានពាក្យសោ្លកមួយថា៖ “យើងខិតខំដើម្បីពិភពលោកមួយដែលលើកកម្ពស់សិទ្ធិកុមារ និងសមភាពសម្រាប់ក្មេងស្រី។”
គួរបញ្ជាក់ផងដែរថា អង្គការភ្លែនអន្តរជាតិ គឺជាអង្គការអភិវឌ្ឍន៍ឯករាជ្យ និងមនុស្សធម៌មួយដែលធ្វើការនៅក្នុងប្រទេសចំនួន ៧១ ទូទាំងពិភពលោកចាប់តាំងពីឆ្នាំ១៩៧៣ ដើម្បីលើកកម្ពស់សិទ្ធិកុមារ និងសមភាពសម្រាប់ក្មេងស្រី។ យើងជាអង្គការមួយក្នុងចំណោមអង្គការធំផ្សេងទៀតនៅលើពិភពលោកដែលធ្វើការដើម្បីសិទ្ធិកុមារ និងសមភាពយេនឌ័រ។ អង្គការភ្លែនអន្តរជាតិផ្តោតសំខាន់លើការការពារកុមារ ការអប់រំ ការចូលរួមរបស់កុមារ សថេរភាពសេដ្ឋកិច្ច ការងារសង្គ្រោះក្នុងស្ថានភាពអាសន្ន សុខភាព ការងារសុខភាពផ្លូវភេទនិងសិទ្ធិបន្តពូជ ទឹកស្អាត និងអនាម័យ៕
ចែករំលែកព័តមាននេះ