ខេត្តសៀមរាប៖ លោក សូរ ប្លាតុង អភិបាលស្រុកប្រាសាទបាគង បានមានប្រសាសន៍ថា ក្នុងនាមលោក ជាប្រធានគណៈបញ្ជាការឯកភាពរដ្ឋបាលស្រុកប្រាសាទបាគង កាលពីថ្ងៃទី៥ ខែឧសភា…
ខេត្តសៀមរាប៖ លោក សូរ ប្លាតុង អភិបាលស្រុកប្រាសាទបាគង បានមានប្រសាសន៍ថា ក្នុងនាមលោក ជាប្រធានគណៈបញ្ជាការឯកភាពរដ្ឋបាលស្រុកប្រាសាទបាគង កាលពីថ្ងៃទី៥ ខែឧសភា ឆ្នាំ២០២១នេះ លោកបានដឹកនាំក្រុមការងារចម្រុះចុះពិនិត្យទីតាំង នៃតំបន់ព្រៃលិចទឹក ដែលមានជនល្មើសមិនស្គាល់អត្តសញ្ញាណលួចឈូសឆាយទន្ទ្រានយក នៅចំណុចស្បែកខ្លាក់ ភូមិគោកធ្លក និងនៅក្រោមចំណុច ទំនប់ទឹកថ្លា ស្ថិតក្នុងភូមិច្រេស ឃុំកណ្តែក ស្រុកប្រាសាទបាគង ខេត្តសៀមរាប។
លោកបានបញ្ជាក់ថា ចំពោះករណីនេះ គណៈបញ្ជាការឯកភាពរដ្ឋបាលស្រុក នឺងរៀបចំផែនការដាំដើមឈើជួសឡើងវិញ កំណត់ទីតាំងនិងទំហំ ព្រមទាំងបើកការស្រាវជ្រាវ ស្វែងរកជនល្មើស យកមកផ្ដន្ទាទោសតាមផ្លូវច្បាប់ឱ្យខានតែបាន ដើម្បីរក្សាផ្ទៃដីព្រៃលិច ទឹកអោយបានគង់វង្ស ធ្វើជាជម្រកសម្រាប់ត្រីពងកូន នារៀងរាល់រដូវវស្សាទឹកឡើង។
ចំណែកអាជ្ញារធរភូមិឃុំ ត្រូវរៀបចំក្រុមការងារ ធ្វើការល្បាត ទប់ស្កាត់ និងបង្ក្រាបការកាប់ទន្ទ្រាន ឈូសឆាយព្រៃលិចទឹកនេះ ឱ្យខ្លាំងក្លាជាងមុន ជាពិសេសរួមគ្នារកវិធីបង្ការ កុំឱ្យមានភ្លើងឆេះព្រៃ និងត្រៀមលក្ខណៈពន្លត់ផងដែរ។
ក្នុងឱកាសនោះដែរ លោកអភិបាលស្រុក ក៏បានស្នើឱ្យបងប្អូនប្រជាកសិករ ដែលអាស្រ័យផល ក្បែរទីតាំងនេះ ជួយសហការដើម្បីផ្តល់ព័ត៌មានមកអាជ្ញាធរយើង ក្នុងករណីបង្ក្រាបបាន រដ្ឋបាលស្រុក នឹងផ្តល់រង្វាន់លើកទឹកចិត្តជូនផងដែរ៕ ច័ន្ទ រស្មី
ចែករំលែកព័តមាននេះ