ខេត្តកំពង់ចាម ៖ ភ្លៀងបានបង្អុរធ្លាក់ដោយលាយឡំជាមួយនឹងខ្យល់កន្ត្រាក់ស្រោចស្របមកលើក្រុងកំពង់ចាម និងតាមបណ្ដាស្រុកមួយចំនួនទៀត កាលពីយប់ថ្ងៃទី៥ ខែឧសភា ឆ្នាំ២០២១ ធ្វើឱ្យរលំដើមឈើ របើកដំបូលផ្ទះ ផ្ទះធ្លាក់ពីលើជើងតាង…
ខេត្តកំពង់ចាម ៖ ភ្លៀងបានបង្អុរធ្លាក់ដោយលាយឡំជាមួយនឹងខ្យល់កន្ត្រាក់ស្រោចស្របមកលើក្រុងកំពង់ចាម និងតាមបណ្ដាស្រុកមួយចំនួនទៀត កាលពីយប់ថ្ងៃទី៥ ខែឧសភា ឆ្នាំ២០២១ ធ្វើឱ្យរលំដើមឈើ របើកដំបូលផ្ទះ ផ្ទះធ្លាក់ពីលើជើងតាង តែសំណាងល្អ មិនមានអ្នករងគ្រោះថ្នាក់ដល់អាយុជីវិតនោះទេ។
មន្ត្រីសមត្ថកិច្ចមូលដ្ឋានប្រាប់ឲ្យដឹងថា នៅវេលាម៉ោង៨និង២០នាទីយប់ ថ្ងៃខាងលើ នៅក្នុងភូមិសាស្ត្រក្រុងកំពង់ចាម មានករណីភ្លៀងមានខ្យល់កន្ត្រាក់ បានធ្វើឲ្យមានការការប៉ះពាល់ និងខូចខាតមួយចំនួន ដូចជា ៖
១- នៅសង្កាត់កំពង់ចាម ៖ ដួលរលំដើមឈើធំៗចំនួន៣កន្លែងកាត់ទទឹងផ្លូវ នៅចំណុចខាងក្រោយស្នងការដ្ឋាននគរបាលខេត្តកំពង់ចាម ស្ថិតក្នុងភូមិទី៧ សង្កាត់កំពង់ចាម ក្រុងកំពង់ចាម បណ្ដាលឱ្យខូចខាត ៖ របងថ្មស្នងការដ្ឋាននគរបាលខេត្តទំហំប្រវែង៦ម៉ែត្រ និងបង្គោលភ្លើងចំនួន២ដើម (តែមិនបណ្តាលអោយគ្រោះថ្នាក់ដល់មនុស្សនោះទេ) ។ នៅក្នុងភូមិទី៧ បណ្តាលឱ្យខូចខាតរថយន្តចំនួន២គ្រឿង (មិនបណ្តាលអោយមានគ្រោះថ្នាក់ដល់មនុស្សទេ) ។ នៅចំណុចខាងជើងជាប់របងសាលាខេត្ត ធ្វើឱ្យខូចខាតបាក់ដំបូលអគារកីឡាក្នុងប្រវែង១០ម៉ែត្រផងដេរ។ សមត្ថកិច្ចមូលដ្ឋានប្រាប់បន្តឲ្យដឹងទៀតថា ចំណែកភូមិទី១៥ ក៏ខូចខាតរបើកក្បឿងអគារមួយខ្នង សាងសង់ផ្ទាល់ដីជាច្រើនសន្លឹក។
២- នៅសង្កាត់វាលវង់ នៅចំណុចមុខសាលារៀនដីដុះ ស្ថិតក្នុងភូមិទី៣ បាក់មែកឈើចំនួន២ដើម និងផ្លាកផ្សព្វផ្សាយ ពាណិជ្ជកម្មចំនួន១ផ្ទាំង ទំហំ 2m x 3m (តែមិនបណ្ដាលឲ្យរងរបួសដល់មនុស្ស និងខូចខាតដល់ទ្រព្យសម្បត្តិប្រជាពលរដ្ឋឡើយ) ។
៣- សង្កាត់បឹងកុក រលំដើមគ១ដើម កាត់ទទឹងលើថ្នល់ នៅចំណុចខាងជើងច្រាំងបាក់មាត់ទន្លេ ស្ថិតក្នុងភូមិចុងថ្នល់ទី២ សង្កាត់បឹងកុក ក្រុងកំពង់ចាម បណ្តាលឱ្យប៉ើងរោងប៉ុស្តិ៍ដែកនៅចំណុចជយ័វរ្ម័នទី៧ ស្ថិតក្នុងភូមិមេម៉ាយ សង្កាត់បឹងកុក ។
៤- សង្កាត់សំបូរមាស រលំប៉ុស្តិ៍ដែក នៅចំណុចជាប់របងមណ្ឌលកុមារកំព្រាខេត្តកំពង់ចាម ស្ថិតក្នុងភូមិនាងគង្ហីង សង្កាត់សំបួរមាស ក្រុងកំពង់ចាម កំពង់ចាម ។
ក្រោយពេលកើតហេតុ ក៏ត្រូវបានលោកវរសេនីយ៍ឯក អ៊ឹង ប៊ុន អធិការនគរបាលក្រុងកំពង់ចាម បានចាត់ឱ្យកម្លាំងប៉ុស្តិ៍នគរបាលរដ្ឋបបាលទាំង០៤ បានសហការជាមួយកម្លាំងអធិការដ្ឋាននគរបាលក្រុងកំពង់ចាម បានយកបារ៉ាស់បិទផ្លូវទាំងសងខាង ដើម្បីការពារគ្រោះថ្នាក់ដល់អ្នកធ្វើចរាចរណ៍តាមផ្លូវ ។
ដោយឡែកលោក ផេន សុផល អភិបាលនៃគណៈអភិបាលស្រុកបាធាយ ក៏បានឲ្យដឹងដែរថា អំពីស្ថានភាពក្នុងស្រុក សម្រាប់យប់ថ្ងៃទី០៥ ខែឧសភា ឆ្នាំ២០២១នេះ មានភ្លៀងធ្លាក់មួយមេធំលាយឡំជាមួយនឹងខ្យល់កន្ត្រាក់ខ្លាំង បណ្តាលឲ្បប៉ះពាល់ផ្ទះប្រជាពលរដ្ឋចំនួន៦ឃុំ ស្មើនឹង៥៨ខ្នងផ្ទះ ក្នុងនោះរួមមាន ៖ ១.ឃុំតាំងក្រាំង ចំនួន៣៦ខ្នង ២.ឃុំជាលា ចំនួន១០ខ្នង ៣.ឃុំបាធាយ ចំនួន៦ខ្នង ៤.ច្បារអំពៅ ចំនួន៤ខ្នង ៥.ឃុំតាំងក្រសាំង ចំនួន១ខ្នង និង៦.ឃុំផ្អាវ ចំនួន ១ខ្នង ។
សូមបញ្ជាក់ថា គ្រោះថ្នាក់នៅក្នុងហេតុការណ៍គ្រោះធម្មជាតិខាងលើនេះ មិនបណ្ដាលឲ្យប្រជាពលរដ្ឋណាម្នាក់រងរបួសនោះឡើយ៕
ចែករំលែកព័តមាននេះ