ខេត្តប៉ៃលិន ៖ បុរសម្នាក់ត្រូវបានគេស្គាល់ថា គឺជាប្រធានការិយាល័យលំនៅឋាននៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តប៉ៃលិន បានទទួលមរណភាព កាលពីវេលាម៉ោង៨និង៣០នាទីយប់ ថ្ងៃទី០៤…
ខេត្តប៉ៃលិន ៖ បុរសម្នាក់ត្រូវបានគេស្គាល់ថា គឺជាប្រធានការិយាល័យលំនៅឋាននៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តប៉ៃលិន បានទទួលមរណភាព កាលពីវេលាម៉ោង៨និង៣០នាទីយប់ ថ្ងៃទី០៤ ខែឧសភា ឆ្នាំ២០២១ ខណៈពេលកំពុងស្នាក់នៅក្នុងផ្ទះរបស់ខ្លួន ក៏ស្រាប់តែមានអាការ:សំពាធឈាមឡើងខ្ពស់ ហើយឈាមបុកខ្លាំង បណ្តាលឱ្យសន្លប់បាត់ស្មារតី លុះពេលក្រុមគ្រួសារឃើញសភាពមិនស្រួល ក៏ប្រញាប់បញ្ជូនទៅសង្គ្រោះនៅមន្ទីរពេទ្យខេត្តប៉ៃលិន ក្រោយមកគ្រូពេទ្យបញ្ជូនបន្តទៅពេទ្យខេត្តបាត់ដំបង តែជាអកុសល គ្រូពេទ្យមិនអាចជួយជនរងគ្រោះបានឡើយ ព្រោះថា ជនរងគ្រោះបានដាច់សរសៃឈាមក្នុងខួរក្បាលបាត់ទៅហើយ ។
ប្រភពព័ត៌មានបានឱ្យដឹងថា ៖ ជនរងគ្រោះមានឈ្មោះ សោភ័ណ បញ្ញា ភេទប្រុស អាយុ៤៨ឆ្នាំ ជាប្រធានការិយាល័យលំនៅឋាន មានប្រពន្ធ ឈ្មោះ សុខ ចិន្តា មានស្រុកកំណើតនៅខេត្តបាត់ដំបង បច្ចុប្បន្នស្នាក់នៅក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពដដែលបន្តទៀតថា មុនពេលកើតហេតុ គេឃើញជនរងគ្រោះមានសភាពមិនស្រួល ដោយឈឺក្បាល ងងឹតមុខ និងវិលមុខ ក៏ចូលទៅសម្រាកនៅក្នុងផ្ទះរបស់ខ្លួនបាត់ទៅ ក្រោយមកដោយសារតែសំពាធឈាមឡើងខ្ពស់ខ្លាំង ក៏បុកឡើង បណ្តាលឱ្យដួលសន្លប់នៅលើគ្រែតែម្តង ។
ប្រភពដដែលបន្តថា ក្រោយពីស្ថានភាពបេបនេះ ក្រុមគ្រួសារក៏ប្រញាប់ប្រញាល់បញ្ជូនជនរងគ្រោះទៅសង្គ្រោះនៅមន្ទីរពេទ្យបង្អែកខេត្តប៉ៃលិន តែដោយសារសភាពធ្ងន់ធ្ងរពេក គ្រូពេទ្យក៏ប្រញាប់បញ្ជូនបន្តទៅមន្ទីរពេទ្យខេត្តបាត់ដំបង លុះទៅដល់ ជនរងគ្រោះបានដាច់ខ្យល់ស្លា.ប់បាត់ទៅហើយ ។
ប្រភពដដែលបន្តទៀតថា រហូតមកដល់ថ្ងៃទី០៦ ខែឧសភា ឆ្នាំ២០២១នេះ ស.ពជនរងគ្រោះត្រូវបានគេតម្កល់នៅផ្ទះឯខេត្តបាត់ដំបង ដើម្បីរៀបចំធ្វើបុណ្យតាមប្រពៃណី និងបូជានៅល្ងាចថ្ងៃដដែល ។
សូមបញ្ជាក់ផងដែរថា ៖ ក្រោយពេលជនរងគ្រោះទទួលមរណភាព រហូតមកដល់ថ្ងៃទី០៥ ខែឧសភា ឆ្នាំ២០២១ អាជ្ញាធរខេត្តប៉ៃលិន ក៏បានចាត់ឱ្យខាងប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តប៉ៃលិន ដឹកនាំក្រុមការងារមន្ទីរ យកកំរងផ្កា និងបច្ច័យចំនួន១០០០,០០០រៀល របស់ឯកឧត្តមរដ្ឋមន្ត្រីក្រសួងរៀបចំដែនដី និងបច្ច័យចំនួន៤,៤៤០,០០០រៀល របស់មន្ត្រីរាជការនៃមន្ទីរនេះ ជូនដល់គ្រួសារស.ពជនរងគ្រោះផងដែរ ៕
ចែករំលែកព័តមាននេះ