មណ្ឌលគិរី៖ អាជ្ញាធរខេត្តមណ្ឌលគិរី បានពិនិត្យមើលការដ្ឋានស្ដារប្រព័ន្ធលូបង្ហូរទឹក ក្នុងក្រុងសែនមនោរម្យ ដែលកំពុងកកស្ទះ ត្រង់ចំណុចរង្វង់មូលគោព្រៃ រហូតដល់ចំណុចមុខមន្ទីរពេទ្យបង្អែកខេត្ត។ ការកកស្ទះនេះ បានបណ្ដាលឲ្យប្រព័ន្ធលូសាយភាយក្លិនមិនល្អ ដល់ប្រជាពលរដ្ឋ នៅរដូវប្រាំង។ ចំណែករដូវវស្សា នៅពេលទឹកហូរខ្លាំង ទឹកនឹងហៀចេញមកខាងក្រៅ ប៉ះពាល់ទៅដល់ផ្នែកផ្សេងៗទៀត ។
ឯកឧត្ដម ស្វាយ សំអ៊ាង អភិបាលខេត្តមណ្ឌលគិរី បានបញ្ជាឲ្យមន្ត្រីជំនាញ ពិនិត្យមើល មិនអនុញ្ញាតឲ្យប្រជាពលរដ្ឋបង្ហូរកាកសំណល់ ឬទឹកកង្វក់ ចូលទៅក្នុងប្រ័ពន្ធលូនោះទេ។
ឯកឧត្ដម ក៏បានប្រាប់ទៅមន្ត្រីជំនាញពាក់ព័ន្ធ ឲ្យរៀបចំសណ្ដាប់ធ្នាប់សាធារណៈ ឲ្យមានរបៀបរាបរយ ធ្វើយ៉ាងណាឲ្យក្រុងសែនមនោរម្យ មានសោភ័ណ្ឌភាពល្អ សម្រាប់ទាក់ទាញអ្នកទេសចរ នៅពេលខាងមុខ។
ឯកឧត្ដម ស្វាយ សំអ៊ាង បានថ្លែងទៀតថា ការស្ដារប្រព័ន្ធប្រឡាយបង្ហូរទឹក ជាគម្រោងរបស់មន្ទីរសារធាណការ និងដឹកជញ្ជូន ដោយចាប់ផ្ដើមអនុវត្តកាយដី ដែលកំពុងកកស្ទះ នៅក្នុងប្រឡាយចេញ សម្រួលដល់ផ្លូវទឹកហូរ មិនឲ្យចាល់ហៀ ចេញមកខាងក្រៅ នៅរដូវរស្សា និងមិនឲ្យមានក្លិនស្អុយ សាយភាយមកខាងក្រៅ នៅរដូវប្រាំង។
សូមបញ្ជាក់ថា ទន្ទឹមនឹងវិបត្តិកូវីដ១៩ ដែលខេត្តមណ្ឌលគិរី ក៏បានរងនូវផលប៉ះពាល់ដែរ ប៉ុន្តែរដ្ឋបាលខេត្ត មិនបញ្ឈប់សកម្មភាពអភិវឌ្ឍន៍ផ្នែកហេដ្ឋារចនាសម្ព័ន្ធនានានោះទេ។ តួយ៉ាងរដ្ឋបាលខេត្ត កំពុងរៀបចំសាងសង់សួនច្បារដ៏ធំ ក្នុងក្រុងសែនមនោរម្យ ហើយបាន និងកំពុងលើកកម្ពស់ការអភិវឌ្ឍន៍វិស័យទេសចរណ៍យ៉ាងខ្លាំងផងដែរ៕
ចែករំលែកព័តមាននេះ