ខេត្តកំពង់ឆ្នាំង ៖ គ្រួសារមួយរស់នៅក្នុងភូមិស្រែសា ឃុំទួលខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ឆ្លៀតពេលទំនេរពីការងារស្រែចំការ គឺស៊ីឈ្នួលប្រលេះផ្លែម្ទេសឲ្យសិប្បកម្មផលិតទឹកម្ទេសមួយ អាចរកចំណូលបានប្រមាណ១០ម៉ឺនរៀលក្នុងមួយថ្ងៃ ជួយលើកស្ទួយជីវភាពឱ្យសមរម្យ…
ខេត្តកំពង់ឆ្នាំង ៖ គ្រួសារមួយរស់នៅក្នុងភូមិស្រែសា ឃុំទួលខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ឆ្លៀតពេលទំនេរពីការងារស្រែចំការ គឺស៊ីឈ្នួលប្រលេះផ្លែម្ទេសឲ្យសិប្បកម្មផលិតទឹកម្ទេសមួយ អាចរកចំណូលបានប្រមាណ១០ម៉ឺនរៀលក្នុងមួយថ្ងៃ ជួយលើកស្ទួយជីវភាពឱ្យសមរម្យ ។
តាមការរៀបរាប់របស់ស្ត្រីឈ្មោះ លី វណ្ណា អាយុ60ឆ្នាំ បានបញ្ជាក់ឲ្យដឹងថា បន្ទាប់ពីក្នុងភូមិមានគេមកបើកសិប្បកម្មផលិតទឹកម្ទេស គ្រួសារគាត់ត្រូវបានម្ចាស់សិប្បកម្មឲ្យប្រលេះផ្លែម្ទេសចេញពីទង ដោយគេគិតកម្រៃឈ្នួលក្នុងគីឡូក្រាមទទួលបាន២៥០រៀល ហើយក្នុងម្នាក់អាចប្រលេះផ្លែម្ទេសបានចាប់ពី១០០គីឡូក្រាម ស្មើនឹង២៥.០០០រៀល ក្នុងមួយថ្ងៃ ប៉ុន្តែដោយសារតែគ្រួសារគាត់មានសមាជិកច្រើន គឺគ្រាន់តែកូនគាត់ចំនួន៤នាក់ ដែលរស់នៅក្នុងបន្ទុករបស់គាត់ អាចរកបានប្រាក់ចំណូលសរុប១០ម៉ឺនរៀលដែរក្នុងមួយថ្ងៃ ។
ស្ត្រីរូបនោះនៅបានបញ្ជាក់ថា ផ្លែម្ទេសគឺខាងម្ចាស់សិប្បកម្មគេទិញពីខេត្តកំពង់ស្ពឺ ឬកំពង់ឆ្នាំង ហើយយកមកឲ្យគ្រួសារគាត់ប្រលេះទងចេញ ពេលប្រឡេះទងរួចរាល់គេយកទៅផលិតធ្វើទឹកម្ទេស សម្រាប់ដឹកចេញទៅលក់លើទីផ្សារ ។
ទោះយ៉ាងនេះក្តី ស្ត្រីរូបនោះបានបញ្ជាក់ថា សម្រាប់ខែប្រាំងមិនសូវសម្បូរផ្លែម្ទេស សម្រាប់ប្រលេះទេ ទើបធ្វើឱ្យប្រាក់ចំណូលរបស់គាត់ក៏ថមថយដែរ ប៉ុន្តែនេះគ្រាន់តែជាការងាររកចំណូលបន្ទាប់បន្សំក្រៅពីការងារស្រែចម្ការប៉ុណ្ណោះ៕
ចែករំលែកព័តមាននេះ