ឥណ្ឌា ៖ អាជ្ញាធរឥណ្ឌាបាននិយាយថា មជ្ឈមណ្ឌលចាក់វ៉ាក់សាំងកូវីដ១៩ ទាំងអស់នៅក្នុងរដ្ឋធានីម៉ុមបៃ ត្រូវបិទទ្វាររយៈពេល៣ថ្ងៃ ចាប់ពីថ្ងៃទី៣០ ខែមេសា នេះតទៅ ដោយសារតែការខ្វះខាតវ៉ាក់សាំង។ ស្របពេលដែលចំនួនអ្នកឆ្លងដោយកូវីដ១៩ ប្រចាំថ្ងៃបន្តបំបែកកំណត់ត្រាពិភពលោក។
បើតាមទិន្នន័យពីក្រសួងសុខាភិបាលឥណ្ឌាបានរាយការណ៍ថា ករណីអ្នកឆ្លងថ្មីមានចំនួន ៣៨៦,៤៥២នាក់។ ខណៈដែលចំនួនអ្នកស្លា.ប់បានកើនឡើងដល់ ៣,៤៩៨ នាក់ក្នុងរយៈពេល ២៤ម៉ោងចុងក្រោយ។ ដែលនាំឱ្យអ្នកឆ្លងសរុបកើនឡើងជាង ១៨,៧លាននាក់ និងអ្នកស្លា.ប់សរុបកើនដល់ ២០៨,៣៣០នាក់។
ប៉ុន្តែបើតាមអ្នកជំនាញផ្នែកវេជ្ជសាស្ត្រជឿជាក់ថា តួលេខនៃករណីកូវីដ១៩ នៅក្នុងប្រទេសដែលមានប្រជាជនច្រើនបំផុតទី ២ នៅលើពិភពលោកមួយនេះ អាចមានចំនួនច្រើនជាង ៥ ទៅ ១០ ដងនៃចំនួនផ្លូវការ។
ឥណ្ឌាបច្ចុប្បន្នកំពុងធ្លាក់ចូលក្នុងវិបត្តិយ៉ាងធ្ងន់ធ្ងរបំផុត ដោយមន្ទីរពេទ្យកំពុងខ្វះខាតគ្រឿងបរិក្ឋារវេជ្ជសាស្ត្រ ជាពិសេសការផ្គត់ផ្គង់អុកស៊ីសែន។ ស្របពេលបញ្ហាអស់ទាំងនេះ គេជឿថានឹងធូរស្បើយមកវិញ បន្ទាប់ពីប្រទេសជាច្រើននៅជុំវិញពិភពលោក កំពុងតែដឹកជញ្ជូនជំនួយសង្គ្រោះមកដល់ប្រទេសនេះ ជាបន្តបន្ទាប់៕ (ដកស្រង់ចេញពី CNA)
ចែករំលែកព័តមាននេះ