ខេត្តកំពង់ចាម ៖ បើមតាមសេចក្តីរាយការណ៍បានឱ្យដឹងថា ឃុំចំនួន៣ ក្នុងនោះរួមមាន ឃុំរកាអារ ឃុំស្ដៅ និងឃុំពាមជីកង ក្នុងស្រុកកងមាស ដែលបានផ្ទុះនូវជំងឺកូវីដ១៩…
ខេត្តកំពង់ចាម ៖ បើមតាមសេចក្តីរាយការណ៍បានឱ្យដឹងថា ឃុំចំនួន៣ ក្នុងនោះរួមមាន ឃុំរកាអារ ឃុំស្ដៅ និងឃុំពាមជីកង ក្នុងស្រុកកងមាស ដែលបានផ្ទុះនូវជំងឺកូវីដ១៩ ទៅលើកម្មករ កម្មការិនីចំនួន២៦នាក់ ហើយក៏ត្រូវបានបិទខ្ទប់ឃុំមិនឱ្យប្រជាពលរដ្ឋចាកចេញពីលំនៅដ្ឋានធ្វើដំណើរទៅកន្លែងផ្សេងនោះទេ ដើម្បីទប់ស្កាត់កុំឲ្យជំងឺនេះ រីករាលដាលឆ្លងចូលទៅក្នុងសហគមន៍ ជាមួយនោះអាជ្ញាធរក៏បានណែនាំឲ្យប្រជាពលរដ្ឋបង្កើនការយកចិត្តទុកដាក់អនាម័យក្នុងការរស់នៅផងដែរ។
លោក ភោគ សាវុធ អភិបាលស្រុកកងមាស ប្រាប់ឲ្យដឹងនៅព្រឹកថ្ងៃទី៣០ ខែមេសា ឆ្នា២០២១នេះថា បន្ទាប់ពីប្រជុំទប់ស្កាត់ជំងឺកូវីដ១៩ ដោយធ្វើឡើងនៅសាលាខេត្តដែលចំណាយពេលពេញមួយព្រឹកថ្ងៃទី២៩ ខែមេសា ។ ហើយនៅពេលរសៀល ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មាធិការប្រយុទ្ធប្រឆាំងនឹងជំងឺកូវីដ-១៩ អមដំណើរដោយសហការី បានអញ្ជើញចុះពិនិត្យតាមគោលដៅនៅក្នុងឃុំទាំង៣ខាងលើដែលបានបិទខ្ទប់ ក្រោយពីបានរកឃើញកម្មករកម្មការិនីកើតជំងឺកូវីដ ដែលធ្វើការនៅរោងចក្រ ក្នុងស្រុកមុខកំពូល ខេត្តកណ្ដាល ជាប់ព្រំប្រទល់ជាមួយនឹងខេត្តកំពង់ចាម។
អភិបាលស្រុកកងមាស ប្រាប់បន្តថា តាមរយៈការយកសំណាកទៅពិនិត្យនៅរាជធានីភ្នំពេញ ក្នុងនោះកម្មករកម្មការិនីចំនួន២៤នាក់ត្រូវបានរកឃើញថា វិជ្ជមានកូវីដ១៩ និងបន្ទាប់មកទៀតកក៏រកឃើញ២នាក់បន្ថែមទៀត គឺឡើងដល់២៦នាក់។ ហើយក្នុងដំណើរចុះបំពេញបេសកកម្ម ដើម្បីពង្រឹងការទប់ស្កាត់ការរីករាលដាលនៃជំងឺកូវីដ១៩ ឯកឧត្តមអភិបាលខេត្តក៏បានពិនិត្យកម្លាំងសមត្ថកិច្ចដែលយាមប្រចាំការនៅត្រង់គោលដៅស្ពានស្ដៅ ព្រំប្រទល់ជាប់ស្រុកមុខកំពូល ក្នុងនោះក៏បានពង្រឹងមិនឱ្យប្រជាពលរដ្ឋនៅក្នុងឃុំស្ដៅ ចាកចេញពីភូមិ ក្រោយពីត្រូវបានបិទខ្ទប់។ ហើយអ្នកនៅមុខកំពូល ក៏មិនអនុញ្ញាតឲ្យចូលក្នុងតំបន់បិទខ្ទប់ ដើម្បីចៀសវាងកុំឲ្យជំងឺនេះរីកសាយភាយទៅកន្លែងផ្សេងទៀត។
ប្រភពដដែលបន្តថា បន្ទាប់មកពិនិត្យនៅអគារវិទ្យាល័យកងតាណឹង ត្រៀមធ្វើកន្លែងចត្តាឡីស័ក ដែលអាចដាក់មនុស្សបានប្រមាណ៣០០នាក់ វិទ្យាល័យខ្ចៅ ក៏នឹងត្រៀមធ្វើកន្លែងចត្តាទ្បីស័កផងដែរ។ហើយនៅគោលដៅវិទ្យាល័យពាមជីកង ក៏ត្រូវត្រៀមលក្ខណៈសម្បត្តិដើម្បីសម្រាប់ដាក់កម្មករ កម្មការិនី ។
ជាមួយនោះឯកឧត្តម អ៊ុន ចាន់ដា អភិបាលខេត្ត ក៏បានជួបសំណេះសំណាលជាមួយនឹងបងប្អូនប្រជាពលរដ្ឋចំនួន៧៥នាក់ ដែលកំពុងធ្វើចត្តាឡីស័ក នៅស្តាតបាល់ទាត់ ទល់មុខមន្ទីរពេទ្យបង្អែកស្រុកកងមាស ព្រមទាំងបានណែនាំអោយពួកគាត់ត្រូវខិតខំគោរពតាមការណែនាំរបស់អាជ្ញាធរ ក៏ដូចជា ជំនាញសុខាភិបាលត្រូវអនុវត្ត «៣កុំ ៣ការពារ» និងខិតខំថែរក្សាសុខភាពឲ្យបានប្រសើរ។
អភិបាលស្រុកកងមាសបញ្ជាក់ឲ្យដឹងទៀតថា ជាមួយនោះ កម្លាំងសុខាភិបាលបានសហការជាមួយអាជ្ញាធរដែនដី បន្តយកសំណាកពីកម្មករកម្មការិនីបម្រើការងារនៅរោងចក្រស៊ិកផ្លើស ក្រោយពីបានត្រឡប់មកលំនៅឋានក្នុងស្រុកកងមាសវិញ។ ហើយក៏មិនទាន់មានតួលេខរកឃើញអ្នកកើតជំងឺកូវីដបន្ថែមនៅឡើយទេ គឺកំពុងតែស្រាវជ្រាវដោយយកចិត្តទុកដាក់៕
ចែករំលែកព័តមាននេះ