រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវជាថ្មីម្តងទៀតដល់ប្រជាពលរដ្ឋកម្ពុជាទាំងអស់ ជាពិសេសក្មួយៗយុវវ័យ សូមកុំជឿតាមការភូតកុហកអូសទាញពីសំណាក់ជនខិលខូចមួយចំនួន ដើម្បីទៅរកការងារធ្វើនៅក្រៅប្រទេសដោយខុសច្បាប់ ពីព្រោះទង្វើបែបនេះងាយទទួលរងហានិភ័យសព្វបែបយ៉ាង ។
សម្តេចតេជោនាយករដ្ឋមន្ត្រីបានអំពាវនាវជាថ្មីបែបនេះ នារសៀលថ្ងៃទី២៣ មីនា ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបការងារឆ្នាំ២០១០ និងកំណត់ទិសដៅអនុវត្តឆ្នាំ២០១១ របស់ក្រសួងការងារ និងបណ្តុះបណ្តាលវិជ្ជាជីវៈនៅសាលសន្និសីទចតុមុខ ។ ពាក់ព័ន្ធនឹងបញ្ហាខាងលើ សម្តេចតេជោនាយករដ្ឋមន្ត្រីនៅតែបន្តអំពាវនាវដល់ប្រជាពលរដ្ឋកម្ពុជាទាំងអស់ ហើយឱ្យចាត់វិធានការយ៉ាងតឹងរ៉ឹងចំពោះជនខិលខូចដែលអូសទាញបងប្អូនទៅធ្វើការនៅក្រៅប្រទេសដោយគ្មានការទទួលខុសត្រូវ ព្រោះនោះគឺជាការបោកប្រាស់តែម្តង រួមទាំងថវិកាក្នុងមធ្យោបាយធ្វើដំណើរទៅផង។ ពេលធ្វើដំណើរទៅមានខ្លះទៅជាប់នៅម៉ាឡេស៊ី ឥណ្ឌូណេស៊ី ជាពិសេសគឺជាប់នៅប្រទេសថៃតែម្តង ។
នៅប្រទេសថៃ សម្តេចតេជោបានរំឭកថែមទៀតថា មុខរបរនៅប្រទេសថៃ គឺពុំមានមុខរបរអ្វីប្លែកពីប្រទេសកម្ពុជាទេ ។ ទៅធ្វើការនៅប្រទេសថៃ គេឱ្យច្រូតស្រូវ កាប់អំពៅ ដកដំឡូង គឺសុទ្ធតែមុខរបរកសិកម្មដូចនៅកម្ពុជាដែរ គេពុំដែលឱ្យទៅធ្វើជាថៅកែគេទេ ។ សូម្បីតែប្រាក់ចំណូលក៏វាប្រហាក់ប្រហែលដូចជានៅក្នុងស្រុកខ្មែរដែរ ប៉ុន្តែការចំណាយនោះគឺវាខ្ពស់ ត្រូវបែកក្រុមគ្រួសារ ប្រពន្ធកូន ហើយគ្មានអ្វីជាទីពឹងទេ ទៅខុសច្បាប់ គេចាប់ដាក់ទ្រុងបិទជិត បញ្ជូនត្រឡប់មកវិញ ហាក់បីដូចជាទ្រុងដាក់សត្វពាហនៈអុុីចឹង ។ ដោយឡែក មានខ្លះទៀតទៅជាប់លើកប៉ាល់នេសាទរាប់ឆ្នាំ ទំរាំរំដោះខ្លួន
រួច ។
ទាក់ទិននឹងបញ្ហានេះ សម្តេចតេជោនាយករដ្ឋមន្ត្រី បានអំពាវនាវចំពោះប្រជាពលរដ្ឋកម្ពុជាយើងទាំងអស់ សូមមេត្តារកការងារនៅក្នុងស្រុកខ្មែរហើយការងារក្នុងស្រុកយើងគឺមានច្រើន ក្នុងនោះវិស័យកសិកម្មការងារមានប្រមាណ៧២% ដូច្នេះត្រូវបង្កើតការងារក្នុងប្រទេស ។ នៅលើពិភពលោកវាមិនមែនសុទ្ធតែកម្មកររោងចក្រ ហើយគ្មានកសិកម្មនោះទេ ។ បើសិនជាទៅធ្វើការងារនៅប្រទេសថៃ គឺបានត្រឹមតែស៊ីឈ្នួលគេក្នុងវិស័យកសិកម្មដដែលហ្នឹង សូម្បីតែខាងសំណង់ នៅក្នុងប្រទេសយើងក៏មានខាងវិស័យសំណង់ដែរ ។ សូម្បីតែកម្មករធម្មតាជញ្ជូនឥដ្ឋ គឺតម្លៃ៣ដុល្លារ ក្នុងមួយថ្ងៃ រួចហើយចំណាយតិចទៀត។ បើនៅប្រទេសគេគឺត្រូវចំណាយច្រើន រួចហើយពួកមេខ្យល់វាក៏កាក់យកលុយទៀត ចង់គេឱ្យ ឱ្យទៅ ហើយ ថោកទាបទៀត គេមើលងាយ មើលស្រាលទៀត ។
ម្យ៉ាងទៀត ប្រទេសថៃក៏មានបញ្ហារបស់ខ្លួនដែរ ឥឡូវនេះត្រូវបាត់បង់ការងារមួយចំនួនពីអារ៉ាប់ ហើយពលករថៃក៏ត្រូវត្រឡប់មកវិញ ហើយក៏ត្រូវទទួលបន្ទុកអ្នករកការងារពីកម្ពុជាហូរចូលទៀត…។ សូមបញ្ជាក់ថា បើទៅត្រូវច្បាប់ទៅចុះ តែបើទៅខុសច្បាប់កុំទៅឱ្យសោះ ។ សូមអំពាវនាវម្តងទៀតដល់ប្រជាពលរដ្ឋរបស់យើងម្តងហើយម្តងទៀត កុំឱ្យធ្វើចំណាកស្រុកចេញទៅក្រៅប្រទេសប្រថុយប្រថាន ដោយខុសច្បាប់ ។ នៅស្រុកខ្មែរ ក៏មានការពង្រឹងពិពិធកម្មក្នុងវិស័យកសិកម្មដើម្បីចៀសវាងចំណាកស្រុកចោលជនបទមកកាន់ទីក្រុងមករកការងារធ្វើ ។ ប៉ុន្តែបើបានជាជ្រុល ក៏ត្រឹមតែក្នុងស្រុកខ្មែរបានហើយ កុំហួសទៅក្រៅប្រទេស ។
ក្នុងឱកាសនោះ សម្តេចតេជោនាយករដ្ឋមន្ត្រីក៏បានរំឭកផងដែរថា កាលពី៤១ឆ្នាំមុន ពេលនោះគឺកំពុងចលនាយុវជនចូលព្រៃម៉ាគី ហើយកាលពីសប្តាហ៍មុន ១៨ មីនា បន្ទាប់ពីប្រជុំគណៈរដ្ឋមន្ត្រី គឺទៅស្ថានទូតជប៉ុនគោរពវិញ្ញាណក្ខន្ធចំពោះអ្នកដែលបាត់បង់ជីវិតដោយការរញ្ជួយដី និងដោយរលកយក្សស៊ូណាមី ។ ថ្ងៃនេះ២៣ មីនា ខ្ញុំកំពុងឈរអំពាវនាវឱ្យយុវជន និងប្រជាជនកម្ពុជាប្រកបមុខរបរដោយសុខដុមរមនា ។ ប៉ុន្តែកាលពី៤១ឆ្នាំមុនសង្គ្រាមបានផ្ទុះហើយបាត់បង់ការងារទូទាំងប្រទេស អ្វីៗទាំងអស់ក៏ធ្វើអត់បាន…។ ស្ថានភាពគឺផ្លាស់ប្តូរ ដូច្នេះ តើនោះជាកំហុសអ្នកណា…? គឺមិនមែនកំហុសរបស់យើងនៅទីនេះទេ តែផ្តើមចេញពីរដ្ឋប្រហារ១៨ មីនា ដែលធ្វើឱ្យស្ថានភាពដូច្នេះ ។
ឥឡូវគឺយើងចាប់ផ្តើមពីបាតដៃទទេ ដែលភ្នំពេញអត់មានមនុស្សនៅសោះ ។ សម្តេចមានប្រសាសន៍បន្តថា ៤១ឆ្នាំក្រោយ ខ្ញុំអំពាវនាវរឿងមួយផ្សេង ក្នុងគោលដៅដោះស្រាយការងារឱ្យប្រកបដោយចីរភាព និងសម្រាប់រយៈពេលយូរអង្វែង កម្ពុជាចាំបាច់ត្រូវធ្វើទំនើបកម្មសេដ្ឋកិច្ច ពោលគឺ «ជំរុញការអភិវឌ្ឍវិស័យឧស្សាហកម្ម» ។ រាជរដ្ឋាភិបាលយល់យ៉ាងច្បាស់ថា ការងារអភិវឌ្ឍធនធានមនុស្ស គឺជាកត្តាស្នូលក្នុងការអភិវឌ្ឍសង្គម-សេដ្ឋកិច្ច និងបានចាត់ទុកជាការងារអាទិភាព ដូចមានចែងក្នុងយុទ្ធសាស្ត្រចតុកោណដំណាក់កាលទី២នេះ ។ ក្នុងនោះ រាជរដ្ឋាភិបាលត្រូវបន្តអនុវត្តគោលនយោបាយបណ្តុះ បណ្តាលវិជ្ជាជីវៈផ្សារភ្ជាប់ទៅនឹងទីផ្សារពលកម្មដោយសហការយ៉ាងជិតស្និទ្ធជាមួយតួអង្គពាក់ព័ន្ធតាមរយៈវិធានការ៤ចំណុច ទី១-ផ្តល់ការបណ្តុះបណ្តាលជំនាញមូលដ្ឋានដល់ប្រជាពលរដ្ឋនៅជនបទដើម្បីបង្កើនប្រាក់ចំណូល ទី២-ផ្តល់ការបណ្តុះបណ្តាលដល់ពលករតាមរោងចក្រដោយសហការជាមួយនិយោជក ទី៣-បន្តជំរុញការអប់រំ បណ្តុះបណ្តាលបច្ចេកទេស និងវិជ្ជាជីវៈ ដោយពង្រីកសេវានេះឱ្យទៅដល់ខេត្ត-ក្រុងក្នុងនោះមានរួមបញ្ចូលនូវការបណ្តុះបណ្តាលសហគ្រិនភាពទៅក្នុងកម្មវិធីផងដែរ ទី៤-ការរៀបចំបង្កើតទីភ្នាក់ងារជាតិមុខរបរ និងការងារ និងមជ្ឈមណ្ឌលការងារនៅតាមខេត្ត-ក្រុង សម្រាប់ជាយន្តការសម្រួលដល់ការផ្សព្វផ្សាយព័ត៌មានទីផ្សារការងារ ។ បន្តការយកចិត្តទុកដាក់លើកកម្ពស់ប្រព័ន្ធបណ្តុះបណ្តាលវិជ្ជាជីវៈ ផ្សារភ្ជាប់នឹងទីផ្សារការងារ ដើម្បីធានាបានប្រសិទ្ធភាពមានលក្ខណៈទាក់ទាញ បង្កើនការទទួលស្គាល់ជាសាធារណៈ និងស្របតាមចក្ខុវិស័យនៃការធ្វើទំនើបកម្មសេដ្ឋកិច្ចកម្ពុជា ។
ទន្ទឹមនេះ សម្តេចតេជោនាយករដ្ឋមន្ត្រីបានផ្តល់អនុសាសន៍មួយចំនួនដូចតទៅ ៖
ទី១-បន្តអនុវត្តយុទ្ធសាស្ត្រផ្តោតលើកំណើន ការបង្កើនឧត្តមភាពប្រកួតប្រជែង និងពិពិធកម្មជំនាញ វិជ្ជាជីវៈ និងមុខរបរ ដើម្បីរត់តាមល្បឿននៃចរន្តទីផ្សារ ដែលនឹងអាចរក្សាបាននូវនិរន្តរភាពកម្មវិធីផង និងចាប់ច្បាមយកបាននូវផលដែលកើតចេញពីកំណើនសេដ្ឋកិច្ចឱ្យបានច្រើនជាអតិបរមា ។
ទី២-ត្រូវលើកកម្ពស់គុណភាពនៃការអប់រំបណ្តុះបណ្តាលបច្ចេកទេសវិជ្ជាជីវៈ សំដៅបង្កើនឱកាសការងារ ផលិតភាពការងារ និងការបង្កើនប្រាក់ចំណូលរបស់ប្រជាពលរដ្ឋ ។ ត្រូវបន្តការបណ្តុះបណ្តាលវិជ្ជាជីវៈ និងមុខរបរដល់ជនរងគ្រោះ យុវជន និងស្ត្រីក្នុងគ្រួសារក្រីក្រឱ្យមានមុខរបរផ្ទាល់ខ្លួន ឬការងារធ្វើ ដើម្បីលើកស្ទួយកាលានុវត្តភាពការងារ បន្ថយភាពងាយរងគ្រោះ ចូលរួមឱ្យបានច្រើនជាអតិបរមាទៅក្នុងផលិតភាពរបស់ជាតិ និងការលើកកម្ពស់សុពលភាពសង្គម។
ទី៣-ត្រូវពង្រឹងគោលការណ៍បណ្តុះបណ្តាលប្រកបដោយសមធម៌ និងបន្តលើកកម្ពស់ផ្តល់សេវាសុវត្ថិភាពសង្គម ដោយយកចិត្តទុកដាក់ដល់ស្ត្រី ជនបាត់បង់ឱកាស ឬមានឱកាសតិចតួចក្នុងសង្គម យុវជនទីទ័លក្រ និងសិស្សដែលបោះបង់ការសិក្សា យោធិនរំសាយ ចូលនិវត្តន៍បាត់បង់សមត្ថភាពការងារ ពិការ និងគ្រួសារយោធិនពលី មរណៈ ជនអនាថា ដើម្បីឆ្លើយតបនឹងការធ្វើឱ្យប្រសើរឡើងនៃជីវភាពរស់នៅឱ្យកាន់តែមានប្រសិទ្ធភាព និងសកម្ម។
ទី៤-ត្រូវធ្វើឱ្យឃើញច្បាស់ថា វិស័យឯកជនបានចូលរួមចំណែកដល់ការបណ្តុះបណ្តាលជំនាញវិជ្ជាជីវៈយ៉ាងពិតប្រាកដដល់ពលករកម្ពុជា ដូចដែលបណ្តាក្រុមហ៊ុនវិនិយោគនានាតែងបានសន្យាជាមួយរាជរដ្ឋាភិបាលនោះ ។ ឧទាហរណ៍ នៅពេលក្រុមហ៊ុនវិនិយោគមួួយចិញ្ចឹមសត្វនៅតំបន់ណាមួយ ហើយគេចាប់ផ្តើមបណ្តុះបណ្តាលបុគ្គលិក ពេលនោះយើងអាចបញ្ជ្រាបបញ្ចូលប្រជាពលរដ្ឋដែលជាក្រុមគោលដៅនៃការបណ្តុះបណ្តាលឱ្យទទួលបានការបណ្តុះបណ្តាលជាមួយបុគ្គលិកក្រុមហ៊ុននោះតែម្តង ។ ប្រសិនបើអនុវត្តការងារបែបនេះបាននោះ វិសាលភាពនៃការបណ្តុះបណ្តាលរបស់យើងកាន់តែរីកធំហើយអាចធានាបានថា ប្រជាពលរដ្ឋដែលត្រូវទទួលការបណ្តុះបណ្តាលអាចឆ្លើយតបបានទៅនឹងការធ្វើពិពិធកម្មជំនាញ វិជ្ជាជីវៈ និងមុខរបរនោះ ។
ទី៥-ត្រូវបន្តយកចិត្តទុកដាក់រៀបចំសេចក្តីព្រាងច្បាប់ស្តីពីសហជីព ដោយសហការជាមួយស្ថាប័ន ក្រសួងពាក់ព័ន្ធ អង្គការអន្តរជាតិខាងការងារឱ្យចប់សព្វគ្រប់ នៅមុនដំណាច់ឆ្នាំ២០១១ ។ ត្រូវបន្តយក ចិត្តទុកដាក់ពង្រឹងការអនុវត្តច្បាប់ និងបទបញ្ជាពាក់ព័ន្ធនឹងវិស័យការងារ ដោយធានាឱ្យបាននូវភាពសុខដុមរមនានៅក្នុងដំណើរការផលិតកម្ម និងសេវាកម្ម ដើម្បីធានាយ៉ាងពិតប្រាកដនូវសិទ្ធិ ផលប្រយោជន៍កម្មករ និយោជិត និងនិយោជក។
ទី៦-ត្រូវខិតខំដោះស្រាយបញ្ហាប្រាក់ឈ្នួល កម្មករ និយោជិត ដោយឈរលើយន្តការនៃគណៈកម្មការប្រឹក្សាការងារ ។ ដោយឡែក ក៏ត្រូវពង្រឹងការអនុវត្តប្រព័ន្ធសន្តិសុខសង្គម ដោយខិតខំបង្កើតឱ្យបាននូវរបបធានារ៉ាបរងសុខភាព និងប្រាក់សោធននិវត្តន៍ សំដៅធានាឱ្យកម្មករ និយោជិត មានសន្តិសុខប្រាក់ចំណូលទាំងក្នុងពេលបច្ចុប្បន្ន និងអនាគត ។
នៅទីបញ្ចប់ សម្តេចតេជោនាយករដ្ឋមន្ត្រីក៏បានបំពាក់មេដាយជូនថ្នាក់ដឹកនាំ និងមន្ត្រីជាន់ខ្ពស់ ដែលរួមមាន លោកពេជ សោភ័ន រដ្ឋលេខាធិការ មេដាយជាតូបការ លោកអូស្មាន់ ហាស្សាន់ រដ្ឋលេខាធិការ មេដាយជាតូបការ លោកកាន់ ម៉ន រដ្ឋលេខាធិការ មេដាយតូបការ ។ មេដាយព្រះរាជាណាចក្រកម្ពុជាថ្នាក់មហាសេរីវឌ្ឍន៍ចំនួន៨រូប មុនីសារាភ័ណ្ឌថ្នាក់មហាសេរីវឌ្ឍន៍ចំនួន៣រូប ព្រះរាជាណាចក្រកម្ពុជាថ្នាក់ធិបឌិន្ទ ចំនួន៤រូប និងមុនីសារាភ័ណ្ឌថ្នាក់ធិបឌិន្ទចំនួន២រូប ៕
ចែករំលែកព័តមាននេះ