ខេត្តព្រៃវែង៖ ប្រជាពលរដ្ឋ ៤ឃុំ គឺឃុំព្រែកខ្សាយ(ក) ឃុំព្រែកខ្សាយ(ខ) ឃុំអ្នកលឿង និងឃុំពាមរក៍ ស្រុកពាមរក៍ ខេត្តព្រៃវែង ត្រូវបានផ្អាកជាបណ្តោះអាសន្ននូវការចញ-ចូល ដោយសារពាក់ព័ន្ធនឹងប្រជាពលរដ្ឋវិជ្ជមានជំងឺកូវីដ-១៩ ជាបន្តបន្ទាប់ ក្នុងឃុំព្រែកខ្សាយ(ខ) កាលពីថ្ងៃទី៦ ខែមេសា ឆ្នាំ២០២១ នាពេលកន្លងមក។
បច្ចុប្បន្នស្ថានភាព ក្នុងឃុំទាំង ៤នេះ មានសភាពស្ងប់ស្ងាត់ ពុំមានការបង្កហានិភ័យនៃជំងឺកូវីដ-១៩ និងដើម្បីបង្កលក្ខណៈងាយស្រួលដល់ប្រជាពលរដ្ឋ បានដំណើរការចេញ-ចូល ក្នុងការប្រកបមុខរបរ និងជីវភាពរស់នៅប្រចាំថ្ងៃនោះ រដ្ឋបាលខេត្តព្រៃវែង បានបើកអោយដំណើរការចរាចរណ៍ចេញ-ចូលឡើងវិញ ក្នុងឃុំទាំង ៤ នៅតំបន់អ្នកលឿង ចាប់ពីថ្ងៃចុះហត្ថលេខា នាថ្ងៃទី២៨ ខែមេសា ឆ្នាំ២០២១ តទៅ។
ក្នុងនោះដែរ ដើម្បីបង្ការ ទប់ស្កាត់ការរីករាលដាលនៃជំងឺកូវីដ-១៩ចូលក្នុងសហគមន៍ ពិសេសព្រឹត្តការណ៍”សហគមន៍ ២០កុម្ភៈ ២០២១” រដ្ឋបាលខេត្តព្រៃវែង ក៏បានប្រកាសអំពាវនាវដល់បងប្អូនប្រជាពលរដ្ឋ សូមបន្តអនុវត្តន៍អោយបានខ្ជាប់ខ្ជួននូវគោលការណ៍ និងវិធានការនានា ដែលបានដាក់ចេញដោយរាជរដ្ឋាភិបាលកម្ពុជា និងក្រសួងសុខាភិបាល សំដៅកាត់ផ្តាច់នូវខ្សែចម្លងនៃជំងឺកូវីដ-១៩ ពិសេសអនុវត្តន៍នូវវិធានការ “៣ការពារ និង៣កុំ”៕
ចែករំលែកព័តមាននេះ