រាជធានីភ្នំពេញ ៖ ក្រសួងព័ត៌មាន បានសហការជាមួយអង្គការសុខភាពពិភពលោក និងអង្គការចលនាដើម្បីសុខភាពកម្ពុជា រៀបចំបើកសិក្ខាសាលាផ្សព្វផ្សាយអនុក្រឹត្យស្តីពីវិធានការហាមឃាត់ចំពោះការផ្សាយពាណិជ្ជកម្មផលិតផលថ្នាំជក់នៅទីស្តីការក្រសួង កាលពីថ្ងៃទី៤ មីនា ក្រោមអធិបតីភាពលោកថាច់ ផែន រដ្ឋលេខាធិការក្រសួងព័ត៌មាន ។ អនុក្រឹត្យនេះមាន៦ជំពូក និង១៣មាត្រា ដែលមាត្រាទី៤ បានចែងថា ក្រសួងសុខាភិបាលជាស្ថាប័នមានសមត្ថកិច្ចក្នុងការណែនាំ និងត្រួតពិនិត្យការផ្សាយពាណិជ្ជកម្មផលិតផលថ្នាំជក់នៅក្នុងប្រទេសកម្ពុជា ក្នុងករណីចាំបាច់ក្រសួងនេះ ត្រូវសហការជាមួយស្ថាប័នពាក់ព័ន្ធ ដែលមានសមត្ថកិច្ច ។
លោកថាច់ ផែន បានថ្លែងថា ផលិតផលថ្នាំជក់បានធ្វើឱ្យមានអ្នកស្លាប់៥,៤លាននាក់ ក្នុងមួយឆ្នាំៗនៅលើពិភពលោក តាមរយៈជំងឺផ្សេងៗដែលកើតឡើងចំពោះអ្នកជក់បារី និងអ្នកដែលស្រូបផ្សែងបារីពីគេ ជាពិសេសស្ត្រី និងកុមារ ។ ថ្នាំជក់ មិនត្រឹមតែបង្កមហន្តរាយចំពោះសុខភាពតែប៉ុណ្ណោះទេ ប៉ុន្តែថែមទាំងបានធ្វើឱ្យខាតបង់សេដ្ឋកិច្ចជាតិ និងថវិកាគ្រួសារទៀតផង ។ ជាក់ស្តែង ក្នុង១ឆ្នាំៗប្រជាពលរដ្ឋកម្ពុជា បានចំណាយថវិកាគ្រួសារ៦៩,៥លានដុល្លារ ទៅលើការទិញបារីជក់ ។
ប្រឈមមុខនឹងមហន្តរាយនេះ ព្រះរាជាណាចក្រកម្ពុជា រួមជាមួយប្រទេសចំនួន១៦៨នៅលើសាកលលោក បានផ្តល់សច្ចាប័នចូលជាសមាជិកនៃអនុសញ្ញាស្តីពីការត្រួតពិនិត្យថ្នាំជក់ តាំងពីថ្ងៃទី១៥ វិច្ឆិកា ឆ្នាំ២០០៥ ។ ដោយការចូលជាសមាជិកនេះ ភាគីនីមួយៗត្រូវមានកាតព្វកិច្ចក្រោមមាត្រា១៣ ហាមឃាត់ទាំងស្រុងនូវរាល់ទំរង់នៃការផ្សាយពាណិជ្ជកម្ម ការផ្សព្វផ្សាយលក់ផលិតផលថ្នាំជក់ និងការឧបត្ថម្ភកម្មវិធីរបស់ក្រុមហ៊ុនថ្នាំជក់ ឱ្យបានក្នុងរយៈពេល៥ឆ្នាំ បន្ទាប់ពីប្រទេសនោះ ចូលជាសមាជិកអនុសញ្ញា។
ការអនុម័តឱ្យមានវិធានការហាមឃាត់ការផ្សាយពាណិជ្ជកម្មផលិតផលថ្នាំជក់គ្រប់រូបភាពរបស់ព្រះរាជាណាចក្រកម្ពុជា គឺជាការឆ្លើយតបទៅនឹងកាតព្វកិច្ចក្រោមមាត្រា១៣នៃអនុសញ្ញាស្តីពីការត្រួតពិនិត្យថ្នាំជក់ ដើម្បីបង្ហាញសាកលលោកទាំងមូលថា កម្ពុជារួមចំណែកការពារមនុស្សជំនាន់ក្រោយពីមហន្តរាយនៃការប្រើប្រាស់ថ្នាំជក់ ដោយឡែកការពារកុមារ យុវជន និងស្ត្រី ពីអន្ទាក់ទីផ្សារដែលទាក់ទាញឱ្យធ្លាក់ទៅក្នុងការញៀននីកូទីនក្នុងផលិតផលថ្នាំជក់អស់មួយជីវិត ។ អនុក្រឹត្យស្តីពីវិធានការហាមឃាត់ចំពោះការផ្សាយពាណិជ្ជកម្មផលិតផលថ្នាំជក់ បានហាមឃាត់គ្រប់រូបភាព និងគ្រប់មធ្យោបាយនៃការផ្សាយពាណិជ្ជកម្មផលិតផលថ្នាំជក់ និងទោសទណ្ឌក្នុងករណីបំពានបានដាក់បន្ទុកមិនត្រឹមតែចំពោះក្រុមហ៊ុនថ្នាក់ជក់ប៉ុណ្ណោះទេ ប៉ុន្តែចំពោះស្ថាប័នដែលពាក់ព័ន្ធទៀតផង ៕
ចែករំលែកព័តមាននេះ