រាជធានីភ្នំពេញ ៖ អាជីវករដែលលក់នៅតាមផ្សារនានាក្នុងរាជធានីភ្នំពេញ ហើយត្រូវបានអាជ្ញាធររាជធានីភ្នំពេញ បិទខ្ទប់ជាបន្តបន្ទាប់នោះ អាជីវករមួយចំនួនបានផ្លាស់ប្តូរមកលក់ ត្រីសាច់ និងគ្រឿងទេសនៅផ្ទះរបស់ខ្លួនវិញ ។ អ្នកខ្លះទៀតក៏ឆ្នៃរទេះរុញ រ៉ឺម៉ក់ម៉ូតូដាក់បន្លែគ្រប់មុខលក់ចល័ត ប៉ុន្តែការលក់បែបនេះ មិនសូវមានប្រជាពលរដ្ឋទិញនោះទេ ។
អ្នកស្រី យន់ ចន្ថា អាយុជាង៤០ឆ្នាំ ទីលំនៅតាមបណ្តោយផ្លូវលេខ១៣៤ ស្ថិតក្នុងសង្កាត់វាលវង់ ខណ្ឌ៧មករា ជាអ្នកបន្លែ ត្រី សាច់ នៅផ្ទះ បាននិយាយឲ្យដឹងថា ៖ ក្រោយពីផ្សារសេរីភាព ស្ថិតក្នុងសង្កាត់វាលវង់ ខណ្ឌ៧មករា ត្រូវបានសាលារាជធានីភ្នំពេញផ្អាកឈប់ឲ្យលក់ បន្ទាប់ពីរកឃើញអាជីវករម្នាក់ឆ្លងជំងឺកូវីដ១៩ ។ រូបគាត់ក៏បានបង្វែការលក់បន្លែ ត្រី សាច់ នៅផ្ទះវិញ បើមិនដូច្នេះទេ គាត់ប្រឈមការគ្មានលុយបង់ឲ្យធនាគារនោះទេ ។ ហើយការលក់ដូររបស់គាត់មិនសូវដាច់ដូចលក់ក្នុងផ្សារនោះទេ ទំនងបងប្អូនប្រជាពលរដ្ឋខ្លះខ្លាចឆ្លងជំងឺកូវីដ១៩ ទើបមិនហ៊ានចេញពីផ្ទះ ។
ស្ត្រីម្នាក់វ័យប្រមាណ៣០ឆ្នាំម្នាក់ទៀតបានឆ្នៃរទេះរុញដាក់បន្លែគ្រប់មុខលក់ចល័តនៅម្តុំផ្សារអូរឫស្សី បាននិយាយថា ៖ គាត់នៅតែបន្តលក់ដូរដូចសព្វដង ក្រោយពីសាលារាជធានីភ្នំពេញ ផ្អាកការលក់ដូរនៅផ្សារបឹងព្រលិត ខណ្ឌ៧មករា ។ ប៉ុន្តែការលក់ដូរចល័តនេះ មិនសូវកាក់កបនោះទេ ដោយសារតែសមត្ថកិច្ចមូលដ្ឋានចេះតែមកដេញ ព្រោះមានការប្រមូលម្តុំពីប្រជាពលរដ្ឋចោមរោមទិញបន្លែ សាច់។តែយ៉ាងណាក៏ដោយ ការលក់ដូររបស់អាជីវកររូបនេះ បានធ្លាក់ចុះជាងពាក់កណ្តាល នៅក្នុងបិទខ្ទប់នេះ។
មិនខុសពីអាជីវករខាងលើ អ្នកស្រី យ៉ា រុំ ដែលលក់បន្លែ និងសាច់ជ្រូក សាច់គោនៅលើចិញ្ចើមផ្លូវលេខ៩៣ (ខាងត្បូងផ្សារទួលសង្កែ) ស្ថិតក្នុងសង្កាត់ស្រះចក ខណ្ឌដូនពេញ បានលើកឡើងថា ៖ ក្នុងអំឡុងពេលបិទខ្ទប់រាជធានីភ្នំពេញ និងក្រុងតាខ្មៅ ថា ការលក់ដូររបស់គាត់ហាក់គាប់ប្រសើរ។ ស្ត្រីរូបនេះ អាចលក់បន្លែបានដល់ទៅ៥០គីឡូក្រាមឯណោះក្នុងមួយថ្ងៃ។ លក់បន្លែបង្ការដាច់គួរសម ។ ប៉ុន្តែការលក់ដូររបស់គាត់ក៏ដូចអ្នកផ្សេងៗទៀតដែលលក់លើចិញ្ចើមផ្លូវលេខ៩៣នេះ ប្រឈមនឹងការឲ្យឈប់លក់ពីអាជ្ញាធរមូលដ្ឋានតាមបទបញ្ជាថ្មីរបស់សាលារាជធានីភ្នំពេញ ដាក់ចេញកាលពីយប់ថ្ងៃទី២៣ ខែមេសា ឆ្នាំ២០២១ ។ ពេលនេះរូបគាត់ក៏ដូចជាអាជីវករផ្សេងៗទៀត ប្រឈមនឹងការខ្វះខាតលុយកាក់បង់ទៅឲ្យធនាគារតែម្តង។
គួរំលឹកថា ៖ រាជរដ្ឋាភិបាលបានសម្រេចបិទខ្ទប់ភូមិសាស្ត្រររាជធានីភ្នំពេញ និងក្រុងតាខ្មៅ រយៈពេល២សប្តាហ៍ គឺចាប់ពីថ្ងៃទី១៥ ដល់ថ្ងៃទី២៨ ខែមេសា ដើម្បីទប់ស្កាត់ជំងឺកូវីដ-១៩។ ក្នុងអំឡុងពេលបិទខ្ទប់ អាជ្ញាធរក៏បានផ្អាកបណ្ដោះអាសន្ន ផ្សារបោះដុំបន្លែ និងផ្សារនានាចំនួន២២នៅក្នុងរាជធានីភ្នំពេញ ក្រោយពីរកឃើញអាជីវករ និងសន្តិសុខផ្សារតេស្តវិជ្ជមានកូវីដ-១៩។ ផ្សារខ្លះត្រូវបិទ ដើម្បីទប់ស្កាត់កុំឱ្យមានករណីឆ្លងកូវីដ-១៩។
សេចក្តីជូនដំណឹងរបស់លោក ឃួង ស្រេង អភិបាលរាជធានីភ្នំពេញ បានឲ្យដឹងថា ៖ ផ្សារដ្ឋ និងផ្សារមិនរៀបរយទាំងអស់ ដែលត្រូវផ្អាកដំណើរការបណ្តោះអាសន្ន មានដូចជា ផ្សារក្រមួន ផ្សារចាត់តាំង ផ្សារោងចក្រ ផ្សារសហគមន៍ ផ្សារក្នុងដីឡូតិ៍ឯកជន ផ្សារជុំវិញមន្ទីរពេទ្យ និងផ្សារតាមចិញ្ចើមផ្លូវជាដើម។
គួរបញ្ជាក់ផងដែរថា ៖ ផ្សារទាំង២២ ដែលត្រូវបានបិតបណ្តោះអាសន្ន នៅក្នុងភូមិសាស្ត្ររាជធានីភ្នំពេញនោះ ៖
១. មជ្ឈមណ្ឌល ពាណិជ្ជកម្ម ផ្សារអូរឫស្សី ( ខណ្ឌ៧មករា )
២. ផ្សារដើមគរ និងផ្សារបន្លែ ( ខណ្ឌទួលគោក និងខណ្ឌបឹងកេងកង )
៣. ផ្សារ ចាស់ ( ខណ្ឌដូនពេញ )
៤. ផ្សារ ធំទួលសង្កែ ( ខណ្ឌឫស្សីកែវ )
៥. ផ្សារ បឹងត្របែកផ្លាហ្សា ( ខណ្ឌចំការមន )
៦. ផ្សារ ត្រពាំងថ្លឹង ( ខណ្ឌពោធិ៍សែនជ័យ )
៧. ផ្សារ ឯករាជ្យ១ ( ខណ្ឌពោធិ៍សែនជ័យ )
៨. ផ្សារ ទួលពង្រ ( ខណ្ឌពោធិ៍សែនជ័យ )
៩. ផ្សារ សេនជូរីផ្លាហ្សា ( ខណ្ឌពោធិ៍សែនជ័យ )
១០. ផ្សារ ពោធិ៍ចិនតុង ( ខណ្ឌពោធិ៍សែនជ័យ )
១១. ផ្សារកណ្ដាល ( ខណ្ឌដូនពេញ )
១២. ផ្សារ ដេប៉ូ ( ខណ្ឌទួលគោក )
១៣. ផ្សារ ពិភពថ្មីឈូកមាស ( ខណ្ឌសែនសុខ )
១៤. ផ្សារ រីករាយ ( ខណ្ឌសែនសុខ )
១៥. ផ្សារ អូឡាំពិក ( ខណ្ឌបឹងកេងកង )
១៦. ផ្សារ ទឹកថ្លា ( ខណ្ឌសែនសុខ )
១៧. ផ្សារ ងិនអាន ( ខណ្ឌឬស្សីកែវ )
១៨. ផ្សារ ច្បារអំពៅ ( ខណ្ឌច្បារអំពៅ )
១៩. ផ្សារ បន្លែច្បារអំពៅ ( ខណ្ឌច្បារអំពៅ )
២០. ផ្សារ ឆេកូ ឬ ផ្សារ គីឡូម៉ែត្រលេខ៦ ( ខណ្ឌឬស្សីកែវ )
២១. ផ្សារ ច្រាំងចំរេះ ( ខណ្ឌឬស្សីកែវ )
២២. ផ្សារ ទួលសង្កែ ( ខណ្ឌឫស្សីកែវ )៕
ចែករំលែកព័តមាននេះ