ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា អាជ្ញាធរខេត្តមណ្ឌលគិរី បានចេញលិខិតជូនដំណឹងដោយប្រកាសពីការរកឃើញអ្នកឆ្លងជំងឺកូវីដ១៩ ចំនួន២នាក់បន្ថែមទៀត។ សេចក្តីរាយការណ៍បន្តថា នៅក្នុងលិខិតជូនដំណឹងខាងលើបានបញ្ជាក់ថា ថ្ងៃទី២៤ ខែមេសា…
ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា អាជ្ញាធរខេត្តមណ្ឌលគិរី បានចេញលិខិតជូនដំណឹងដោយប្រកាសពីការរកឃើញអ្នកឆ្លងជំងឺកូវីដ១៩ ចំនួន២នាក់បន្ថែមទៀត។
សេចក្តីរាយការណ៍បន្តថា នៅក្នុងលិខិតជូនដំណឹងខាងលើបានបញ្ជាក់ថា ថ្ងៃទី២៤ ខែមេសា ឆ្នាំ២០២១ នេះ បានរកឃើញអ្នកវិជ្ជមានជំងឺកូវីដ-១៩ ចំនួន០២នាក់បន្ថែមទៀត គឺទី១-ឈ្មោះ គឹម សារ៉េត ភេទប្រុស អាយុ៧៧ឆ្នាំ និងទី២- ឈ្មោះ អ៊ិន សុភាព ភេទស្រី អាយុ៣៩ឆ្នាំ រស់នៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
សេចក្តីរាយការណ៍បន្តថា កន្លងមក អ្នកទាំង២បានទៅព្យាបាលជំងឺនៅមន្ទីពេទ្យព្រះកុសមៈ ក្រោយពេលត្រឡប់មកវិញ បន្ទាប់ពីមានការសង្ស័យ ក្រុមការងារឆ្លើយតបបន្ទាន់ក៏បានយកសំណាកទៅធ្វើតេស្ត ក៏រកឃើញថា មានវិជ្ជមានកូវីដ-១៩។ បច្ចុប្បន្ន អ្នកជំងឺទាំង២នាក់កំពុងព្យាបាលនៅមន្ទីរពេទ្យខេត្ត។
ជាមួយគ្នានេះ រដ្ឋបាលខេត្តមណ្ឌលគិរី សូមជម្រាបជូនបងប្អូនប្រជាពលរដ្ឋដែលបានទំនាក់ទំនងពាក់ព័ន្ធដោយផ្ទាល់ ឬដោយប្រយោលជាមួយអ្នកជំងឺខាងលើ សូមរួសរាន់មកជួបជាមួយក្រុមគ្រូពេទ្យដើម្បីយកសំណាកទៅពិនិត្យ និងត្រូវធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ឲ្យបានហ្មត់ចត់ មិនត្រូវពាក់ព័ន្ធ ឬប៉ះពាល់ជាមួយអ្នកដទៃជាដាច់ខាត។
រដ្ឋបាលខេត្តមណ្ឌលគិរី សូមអំពាវនាវឲ្យប្រជាពលរដ្ឋទូទាំងខេត្តមណ្ឌលគិរី ពិសេសបងប្អូនប្រជាពលរដ្ឋក្នុងក្រុងសែនមនោរម្យ ត្រូវបង្កើនការប្រុងប្រយ័ត្នខ្ពស់ ចូលរួមអនុវត្តនូវវិធានការពារ «៣ការពារ ៣កុំ» របស់រាជរដ្ឋាភិបាល និងវិធានរបស់ក្រសួងសុខាភិបាល៕
ចែករំលែកព័តមាននេះ