រាជធានីភ្នំពេញ ៖ អាជ្ញាធរសវនកម្មជាតិបានរៀបចំបើកសិក្ខាសាលាស្តីអំពីសវនកម្មលើគម្រោងជំនួយក្រៅប្រទេសកាលពីថ្ងៃទី២៩ មីនា នៅសណ្ឋាគារអាំងទែរកុងទីណង់តាល់ ក្រោមអធិបតីភាពលោកឆាយ គឹម អគ្គសវនកររងនៃអាជ្ញាធរសវនកម្មជាតិ។ លោកឆាយ គឹម ថ្លែងថា អាជ្ញាធរសវនកម្មជាតិ (អ.ស.ជ) គឺជាស្ថាប័នសវនកម្មកំពូលដែលទើបតែបង្កើតថ្មី អនុលោមតាមច្បាប់ស្តីពីសវនកម្មនៃព្រះរាជាណាចក្រកម្ពុជា ដែលប្រកាសឱ្យប្រើដោយព្រះរាជក្រម ចុះថ្ងៃទី៣០ ខែមីនា ឆ្នាំ២០០០។ អ.ស.ជ បានចាប់ផ្តើមដំណើរការការងាររបស់ខ្លួននៅដើមឆ្នាំ២០០២ ជាមួយនឹងថ្នាក់ដឹកនាំ និងមន្ត្រីមួយចំនួនដែលបានផ្ទេរមកពីក្រសួងនានានៃរាជរដ្ឋាភិបាល ភាគច្រើនមកពីក្រសួងសេដ្ឋកិច្ច និងហិរញ្ញវត្ថុ ពិសេសពីខាងអគ្គាធិការដ្ឋាន។ ក្រៅពីនេះ មន្ត្រីសវនកម្មមួយចំនួនធំគឺជានិស្សិតដែលបានបញ្ចប់ការសិក្សានៅសាកលវិទ្យាល័យនានា ផ្នែកគណនេយ្យ គ្រប់គ្រង សេដ្ឋកិច្ច ច្បាប់ វិស្វកម្ម និងព័ត៌មានវិទ្យា ហើយត្រូវបានជ្រើសរើសឱ្យចូលបម្រើការនៅឆ្នាំ២០០៣ និងឆ្នាំ២០០៦។
និយាយរួម មន្ត្រីទាំងអស់នៅមានចំណេះដឹងផ្នែកវិជ្ជាជីវៈសវនកម្មមានកម្រិតនៅឡើយ។ គោលការណ៍របស់យើង គឺផ្តល់ការបណ្តុះបណ្តាលផ្សារភ្ជាប់នឹងការងារជាក់ស្តែង ដើម្បីប្រែក្លាយបុគ្គលិកទាំងនោះឱ្យក្លាយជាសវនកររបស់អាជ្ញាធរសវនកម្មជាតិប្រកបដោយវិជ្ជាជីវៈ។ លោកឆាយ គឹម បន្តថា ការកសាងសមត្ថភាពស្ថាប័ន គឺជាសកម្មភាពដែលត្រូវធ្វើជាបន្តបន្ទាប់ និងមានតម្រូវការជានិច្ច ហើយចាំបាច់ត្រូវមានពេលវេលា និងការតាំងចិត្តខ្ពស់។ តួនាទីនៃស្ថាប័នសវនកម្មកំពូលមានលក្ខណៈស្មុគស្មាញប្លែកពីស្ថាប័នដទៃទៀត។ ស្ថាប័នសវនកម្មកំពូល មិនត្រឹមតែផ្តោតលើចំណេះដឹងផ្នែកជំនាញវិជ្ជាជីវៈសវនកម្មប៉ុណ្ណោះទេ ប៉ុន្តែត្រូវមានសមត្ថភាព ចំណេះដឹងគ្រប់គ្រាន់លើផ្នែកច្បាប់ហិរញ្ញវត្ថុ ដំណើរការគ្រប់គ្រងហិរញ្ញវត្ថុ និងថវិកា ក្របខណ្ឌគ្រប់គ្រងកម្មវិធីគ្រប់វិស័យ ច្បាប់ពន្ធដារ និងការអនុវត្តនីតិវិធីនៃអង្គនីតិប្បញ្ញត្តិជាដើម។ ដើម្បីឱ្យស្របទៅនឹងបរិយាកាសគ្រប់គ្រងដែលតែងមានការផ្លាស់ប្តូរ សវនករត្រូវមានជំនាញពេញលេញទាំងលើការងារសវនកម្ម និងការវាយតម្លៃ។ ទន្ទឹមនឹងនោះសវនករក៏ជាបុគ្គលដែលមានចំណេះដឹងទូទៅទាក់ទងនឹងកិច្ចការលទ្ធកម្ម ការគ្រប់គ្រងហិរញ្ញវត្ថុ វិទ្យាសាស្ត្រសង្គម ការងារអប់រំ សុខភាពសាធារណៈ វិស្វកម្ម វិទ្យាសាស្ត្រ ស្រាវជ្រាវ ពាណិជ្ជកម្ម គោលនយោបាយ ការបរទេស សន្តិសុខផ្ទៃក្នុង និងផ្ទៃក្រៅផងដែរ។
ដើម្បីសម្រេចបាននូវកេរមរតកនៃស្ថាប័នមួយ ចាំបាច់ត្រូវចំណាយពេលវេលាច្រើនទសវត្សក្នុងការកសាង។ យ៉ាងណាមិញ ស្ថាប័នសវនកម្មកំពូលដែលមានភាពរឹងមាំលើឆាកអន្តរជាតិ ត្រូវបានបង្កើតឡើងតាំងពីយូរឆ្នាំមកហើយ ខ្លះ៥០ឆ្នាំ ខ្លះ៣០ឆ្នាំ នៅក្នុងប្រវត្តិរបស់ខ្លួន។ អាជ្ញាធរសវនកម្មជាតិ បានបណ្តុះបណ្តាលបំពាក់បំប៉នបុគ្គលិកសវនកម្មលើគ្រប់ផ្នែកនៃសវនកម្មសាធារណៈ ទាំងនៅក្នុង និងក្រៅប្រទេស និងបានរៀបចំផែនការមេ សម្រាប់ អ.ស.ជ ដូចជាផែនការយុទ្ធសាស្ត្រអភិវឌ្ឍឆ្នាំ២០០៧-២០១១ ក្រោមការគាំទ្ររបស់ GIZ ព្រមទាំងបានធ្វើសិក្ខាសាលាផ្សព្វផ្សាយច្បាប់ស្តីពីសវនកម្មនៅតាមបណ្តាខេត្តក្រុងនានាទូទាំងប្រទេស។ សព្វថ្ងៃកំពុងរៀបចំបង្កើតឱ្យមានស្តង់ដារសវនកម្មផ្ទាល់របស់ អ.ស.ជ ដោយឈរលើមូលដ្ឋានស្តង់ដាររបស់ INTOSAI ដែលការងារនេះគាំទ្រដោយ GIZ។ ដើម្បីអនុវត្តអាណត្តិច្បាប់សវនកម្មឱ្យកាន់តែមានប្រសិទ្ធភាព អ.ស.ជ កំពុងព្រាងអនុក្រឹត្យស្តីពីការណែនាំអនុវត្តច្បាប់សវនកម្មនៃព្រះរាជាណាចក្រកម្ពុជា ដែលការងារនេះរៀបចំឡើងក្រោមគម្រោងជំនួយបច្ចេកទេស ADB-TA។
លោកឆាយ គឹម បញ្ជាក់ថា អាជ្ញាធរសវនកម្មជាតិ បានយកចិត្តទុកដាក់រៀនសូត្រពីការងារសវនកម្មសាធារណៈចាប់តាំងពីពេលចាប់ផ្តើមការងារដំបូង។ វាពិតជាចាំបាច់ណាស់សម្រាប់ អ.ស.ជ ក្នុងការស្វែងយល់ និងទទួលយកតួនាទីពេញលេញមួយ ដែលជាមុខងារប្រតិបត្តិនៃស្ថាប័នសវនកម្មកំពូលនាពេលបច្ចុប្បន្ន។ អ.ស.ជ បានសម្រេចគោលបំណងជាច្រើន ឆ្លងតាមការរៀនសូត្រ និងស្វែងយល់ពីការងារសវនកម្មក្នុងរយៈពេលជាង៨ឆ្នាំកន្លងមកនេះ ហើយក៏ពុំភ្លេចពីការជួយគាំទ្រជំនួយបច្ចេកទេស និងហិរញ្ញវត្ថុក្នុងទ្រង់ទ្រាយផ្សេងៗពីដៃគូអភិវឌ្ឍន៍មានជាអាទិ៍ GIZ, ADB, WB និង DANIDA។
អ.ស.ជ ជាសមាជិកមួយក្នុងចំណោមសមាជិកទាំង១៨៩ របស់អង្គការអន្តរជាតិនៃស្ថាប័នសវនកម្មកំពូល (INTOSAI) ដែលបានអនុវត្តការងារជាធ្លុងមួយនៃសហគមន៍សវនកម្មផ្ទៃក្រៅរបស់រាជរដ្ឋាភិបាល។ អង្គការអន្តរជាតិនៃស្ថាប័នសវនកម្មកំពូល គឺជាអង្គភាពអន្តរជាតិដែលផ្តល់គ្របខណ្ឌស្ថាប័នសវនកម្មកំពូលដើម្បីលើកកម្ពស់ ការអភិវឌ្ឍ និងការផ្ទេរចំណេះដឹង សំដៅធ្វើឱ្យប្រសើរឡើងនូវការងារសវនកម្មសាធារណៈទូទាំងសាកលលោក ព្រមទាំងពង្រឹងសមត្ថភាពវិជ្ជាជីវៈសវនកម្មនៃគ្រប់ស្ថាប័នជាសមាជិកនីមួយៗ។ ការចូលរួមនៅក្នុងកិច្ចប្រជុំនានារបស់ INTOSAI ក៏ដូចជាការចូលរួមក្នុងការអភិវឌ្ឍស្តង់ដារវិជ្ជាជីវៈផ្សេងៗបានផ្តល់នូវចំណេះដឹងពីបទពិសោធន៍អន្តរជាតិដ៏ល្អៗ ពិសេសបានជួយដល់ អ.ស.ជ ក្នុងការអនុវត្តតាមបទពិសោធន៍ដ៏ប្រសើរទាំងនោះ។ ក្នុងក្របខណ្ឌតំបន់ អ.ស.ជ ក៏ជាសមាជិកមួយនៃអង្គការអាស៊ីនៃស្ថាប័នសវនកម្មកំពូល ASOSAI ដែលបានជួយគាំទ្រ អ.ស.ជ ក្នុងការបណ្តុះបណ្តាល និងការអភិវឌ្ឍវិជ្ជាជីវៈ។
ប៉ុន្តែបច្ចុប្បន្ននៅខ្វះធនធានយ៉ាងខ្លាំងក្នុងការបង្កើនចំនួនសវនកម្មលើគម្រោងជំនួយក្រៅប្រទេសទៅតាមកម្រិតដែលចង់បាន។ នៅខ្វះចន្លោះជំនាញមួយចំនួនសម្រាប់ការងារសវនកម្មលើសេចក្តីថ្លែងការណ៍ហិរញ្ញវត្ថុ និងសវនកម្មលើកិច្ចប្រតិបត្តិការ។ ការងារនេះទាមទារពេលវេលាយ៉ាងហោចណាស់ពី២ទៅ៣ឆ្នាំខាងមុខនេះទៀត។ ក្រៅពីនេះនៅខ្វះខាតធនធានហិរញ្ញវត្ថុសម្រាប់អនុវត្តឱ្យបានគ្រប់ភារកិច្ចដែលច្បាប់តម្រូវ។
លោកអគ្គសវនកររងថ្លែងថា កន្លងមកក្រោមសកម្មភាពគម្រោង ADB-TA យើងបានបណ្តុះបណ្តាលមន្ត្រីសវនកម្មរបស់យើង អំពីការងារសវនកម្មលើគម្រោងជំនួយក្រៅប្រទេសបានចំនួន៦វគ្គ។ យើងក៏បានរៀបចំសៀវភៅណែនាំស្តីពីសវនកម្មលើភាពអនុលោមតាមច្បាប់នៃគម្រោងជំនួយក្រៅប្រទេស។ យើងបានបង្កើនចំនួនសវនកម្មលើគម្រោងជំនួយពីក្រៅប្រទេសចំនួន៤គម្រោងនៅក្នុងឆ្នាំ២០១០ ឱ្យដល់១៣ ក្នុងផែនការសវនកម្មឆ្នាំ២០១១។ យើងបានពិនិត្យពីគោលនយោបាយសម្រាប់ការងារសវនកម្មលើគម្រោងជំនួយក្រៅប្រទេស។ បន្ថែមលើការធ្វើសវនកម្មតែមួយដងក្នុងវដ្តនៃគម្រោង យើងបានធ្វើសវនកម្មច្រើនដងក្នុងអំឡុងពេលដំណើរការរបស់គម្រោង ដោយកំណត់វិសាលភាពនៃរយៈពេលខ្លីសម្រាប់ការងារសវនកម្មលើភាពអនុលោមតាមច្បាប់។ វិធីសាស្ត្រនេះនឹងសម្រួលដល់ការបង្កើនការគ្របដណ្តប់កាន់តែច្រើន ហើយរំពឹងថា ការងារសវនកម្មនីមួយៗនឹងកាន់តែស៊ីជម្រៅ៕
ចែករំលែកព័តមាននេះ