ADផ្ទាំងផ្សព្វផ្សាយពាណិជ្ជកម្ម

រកឃើញអ្នកឆ្លងកូវីដ១០នាក់ទៀតសុទ្ធតែបរទេស បន្ទាប់ពីបុរសឥណ្ឌូនេស៊ីនៅបុរីដួងច័ន្ទកើតកូវីដ

3 ឆ្នាំ មុន

បន្ទាយមានជ័យ
២៣ ខែ មេសា ឆ្នាំ ២០២១ ម៉ោង ១៤:៥៩

ខេត្តបន្ទាយមានជ័យ ៖ ក្រោយពីបិទខ្ទប់ចំនួន៦ទីតាំងកណ្តាលក្រុងប៉ោយប៉ែត មន្ត្រីជំនាញបានធ្វើតេស្តសំណាក់រហ័សនៅនឹងកន្លែងចំនួន១៥នាក់ ហើយក៏រកឃើញថា មានអ្នកវិជ្ជមានកូវីដ១៩បន្ថែមទៀតចំនួន១០នាក់សុទ្ធតែជាជនជាតិបរទេសទាំងអស់ ក្រោយពីរកឃើញបុរសជាជនជាតិឥណ្ឌូនេស៊ីរស់នៅក្នុងបុរីដួងច័ន្ទ មានផ្ទុកកូវីដ១៩ នេះបើគិតរហូតដល់ម៉ោង១រសៀល ថ្ងៃទី២៣…

លោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានប្រាប់នៅរសៀលថ្ងៃទី២៣ ខែមេសានេះថា៖ ក្រោយពីរកឃើញអ្នកវិជ្ជមានកូវីដ១៩ម្នាក់ គឺជាបុរសជនជាតិឥណ្ឌូនេស៊ី ដែលរស់នៅក្នុងបុរីដួងច័ន្ទ ស្ថិតនៅក្នុងភូមិសាមគ្គីមានជ័យ សង្កាត់-ក្រុងប៉ោយប៉ែត ហើយក៏ជាកាណែនាំពីឯកឧត្តម អ៊ុ រាត្រី អភិបាលខេត្តបន្ទាយមានជ័យ ដើម្បីអនុវត្តតាមការណែនាំរបស់ក្រសួងសុខាភិបាល ត្រូវបានបិទខ្ទប់មិនអោយមានការចេញ-ចូលមានចំនួន៦ទីតាំង ស្ថិតភូមិក្បាលស្ពានមួយ ភូមិក្បាលស្ពានពីរ និងភូមិសាមគ្គីមានជ័យស្ថិតសង្កាត់-ក្រុងប៉ោយប៉ែត។

លោកបានបញ្ជាក់ថា ក្រោយពេលបិទខ្ទប់មិនអោយមានការចេញ-ចូល ដែលការពារយាមការដោយកម្លាំងនគរបាល និងកម្លាំងកងរាជអាវុធហត្ថយ៉ាងម៉ឺងម៉ាត់ តាមការណែនាំពីប្រមុខរាជរដ្ឋាភិបាលកម្ពុជា ហើយមន្ត្រីសុខាភិបាល ក៏បានចុះទៅយកសំណាកអ្នកពាក់ព័ន្ធសង្ស័យធ្វើតេស្តរហ័សនៅនឹងកន្លែងចំនួន១៥នាក់ ជាលទ្ធផលអ្នកវិជ្ជមានកូវីដ១៩ មានចំនួន១០នាក់ ដែលជាជនជាតិបរទេសទាំងអស់។

លោក ង៉ោ ម៉េងជ្រួន បានបញ្ជាក់ថា រហូតម៉ោងនេះ សមត្ថកិច្ចកំពុងតែបិទខ្ទប់ការចេញចូលចំនួន៦ទីតាំង ហើយកំពុងយកចិត្តទុកដាក់ការពារពីកម្លាំងនគរបាល និងកម្លាំងកងរាជអាវុធហត្ថ ព្រមទាំងកម្លាំងយោធា ដោយការពារ និងខិតខំប្រឹងប្រែង ដោយមិនគិតពីការនឿយហត់ ហើយមន្ត្រីក្រុមគ្រូពេទ្យ កំពុងស្រាវជ្រាវស្វែងរកអ្នកពាក់ព័ន្ធ និងសង្ស័យ ត្រូវបន្តយកសំណាកធ្វើតេស្តរហ័ស និងបញ្ជូនសំណាកទៅធ្វើតេស្តនីវិទ្យាស្ថានប៉ាស្ទ័រ រង់ចាំលទ្ធផលពីក្រសួងសុខាភិបាល និងជម្រាបជូនដល់យើងទាំងអស់គ្នា ត្រូវតែអនុវត្តអោយបានតាមការណែនាំពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នូវវិធានការបង្ការជំងឺកូវីដ១៩ គឺ «៣ការពារ ៣កុំ»៕