ខេត្តស្វាយរៀង ៖ មានការភ្ញាក់ផ្អើលខ្លាំងនៅកណ្តាលក្រុងស្វាយរៀងដោយប្រជាពលរដ្ឋនាំគ្នាប្តឹងសមត្ថកិច្ចឱ្យជួយរឿងពីរនាក់ប្តី-ប្រពន្ធធ្វើមេតុងទីនផង និងធ្វើកូនផងបោកយកលុយអស់ជិតកន្លះលានដុល្លារ ហើយល្បីថា ប្រុងរត់ចេញទៅក្រៅប្រទេស។ តាមស្ត្រីឈ្មោះម៉ុក ស្រីម៉ៅ ហៅពត អាយុ៣៦ឆ្នាំ ជាអ្នកលក់កាហ្វេ នៅភូមិវាលយន្ត សង្កាត់ស្វាយរៀង ក្រុងស្វាយរៀង ប្រាប់កោះសន្តិភាពថា មេតុងទីនឈ្មោះណាវ អាយុ៣៩ឆ្នាំ និងប្តីឈ្មោះម៉ាន់ អាយុ៣៧ឆ្នាំ នៅភូមិស្រះវង់ សង្កាត់ស្វាយរៀង បានបោកយកប្រាក់តុងទីនរបស់នាងសរុបជាង៦.០០០ដុល្លារ។
នាងម៉ុក ស្រីម៉ៅ បន្តទៀតថា ពីរនាក់ប្តីប្រពន្ធនេះធ្វើមេតុងទីនផងធ្វើកូនតុងទីនផង។ ពួកគេបានលេងក្នុងក្រុមតុងទីនរបស់នាងក្បាល២០០ដុល្លារមានសមាជិក២៣នាក់ដេញមួយខែម្តង ហើយនៅរស់១៤នាក់ ។ ទី២ ក្បាល៧០ម៉ឺនរៀលដេញមួយខែម្តង មានសមាជិក១៥នាក់នៅរស់៥នាក់ ។ ទី៣ ក្បាល១មឺុនរៀលដេញរាល់ថ្ងៃមាន៥២នាក់។ លើសពីនេះទាំង២នាក់ប្តី-ប្រពន្ធនោះធ្វើមេ៣ក្បាលដែរ ទី១ ក្បាល៣០០ដុល្លារដេញ១ខែម្តងមានសមាជិក២៨នាក់ដេញបាន៣លើក ។ ក្បាលទី២ ចំនួន៣០០ដុល្លារមានសមាជិក២៦នាក់ ដេញបាន៩នាក់។ ក្បាលទី៣ដេញរាល់ថ្ងៃ គឺក្បាលមួយម៉ឺនរៀលមានសមាជិក៥២នាក់ ។ ទាំងបីក្បាលនេះគ្មានកូនតុងទីនណាដេញបានទេ គឺមេតុងទីនពីរនាក់ប្តីប្រពន្ធបង្កើតឈ្មោះខ្មោចដេញយកខ្លួនឯងរហូត ។
ពីរនាក់ប្តីប្រពន្ធនេះមានលេងជាច្រើនក្បាលទៀតដែលអ្នកខ្លះមិនទាន់ចេញមុខប្តឹង ដូចជាក្បាល៣ម៉ឺនរៀល ក្បាល៥០.០០០រៀល ក្បាល១០មឺុនរៀល ។ បើតាមកូនតុងទីនជាច្រើននាក់មកជួបគ្នា ហើយសួរគ្នាដឹងថា ការបោកប្រាក់នោះសរុបទៅមិនខ្វះកន្លះលានដុល្លារទេ។ មានកូនតុងទីនម្នាក់ប្តឹងពីរនាក់ប្តីប្រពន្ធនោះចូលតុលាការអស់រយៈពេល២ខែមកហើយទាក់ទិនរឿងលុយ៨០លានរៀល ហើយចុងក្រោយកូនតុងទីនសុំឱ្យសងត្រឹមតែ៥០លានរៀលប៉ុណ្ណោះ តែមិនព្រមសង។
អ្នកខ្លះនិយាយថា ពីរនាក់ប្តីប្រពន្ធនេះបានខ្ចីប្រាក់គេក្នុងម្នាក់ៗ១ម៉ឺនដុល្លារ ២ម៉ឺនដុល្លារយកទៅចងការបន្ត និងរាប់ឱ្យអ្នកលក់ដូរតូចតាចក្នុងផ្សាររាល់ថ្ងៃ និងចុងក្រោយយកប័ណ្ណកម្មសិទ្ធិប្លង់ដី ផ្ទះទៅបញ្ចាំឱ្យធនាគារយកប្រាក់២ម៉ឺនដុល្លារ ដូច្នេះពីរនាក់ប្តីប្រពន្ធនេះគឺបានធ្វើផែនការច្បាស់លាស់ក្នុងការបោកយកប្រាក់តុងទីន និងខ្ចីប្រាក់យកទៅចងការបន្ត។ ចុងក្រោយនេះដោយបាត់ពីរនាក់ប្តីប្រពន្ធមិនឃើញយកប្រាក់ប្រចាំថ្ងៃទៅបង់តុងទីនទើបមានការសង្ស័យថា គេចខ្លួន។ រហូតដល់ថ្ងៃទី១៩ មីនា ២០១១ ទើបគេដឹងច្បាស់ថា មានគេឃើញមេតុងទីនឡើងជិះរថយន្តតាក់ស៊ីទៅភ្នំពេញទាំងពីរនាក់ប្តីប្រពន្ធ និងកូនប្រុសពៅ អាយុ៨ឆ្នាំ ។ ចំណែកអ្នកខ្លះថា បានឃើញឡើងរថយន្តបន្តទៅប៉ោយប៉ែតខេត្តបន្ទាយមានជ័យធ្វើឱ្យគេសង្ស័យថា ចេញទៅក្រៅប្រទេស ៕
ចែករំលែកព័តមាននេះ