ខេត្តបាត់ដំបង ៖ បុរសម្នាក់ដែលគេអះអាងថា ទំនងជាជនគ្មានទីជម្រក ត្រូវបានគេប្រទះឃើញដេកស្លា.ប់នៅក្បែរផ្លូវចូលភូមិមួយកន្លែង ដែលមានស្នាមរបួសខ្លះៗផង កាលពីវេលាម៉ោងជាង៦ព្រឹកថ្ងៃទី២៣ មេសា នេះ ស្ថិតត្រង់ចំណុចក្បែររបងស្នាក់ការគយចល័ត (ហុងឡុង) ស្ថិតក្នុងភូមិកកោះ ឃុំអូរតាគី ស្រុកថ្មគោល តែសមត្ថកិច្ចហាក់មិនទាន់ធ្វើការសន្និដ្ឋាននៅឡើយទេ។ គេមិនស្គាល់អត្តសញ្ញាណបុរសដែលមានវ័យជាង៣០ឆ្នាំនោះទេ តែអ្នកភូមិបានធ្លាប់បានប្រទះឃើញបុរសនោដើរនៅតាមដងផ្លូវជាតិលេខ៥ នៅតំបន់នោះ ដែលគេសង្ស័យជាជនអានាថា ដែលគ្មានជម្រកស្នាក់នៅពិតប្រាកដ។
គេមិនបានដឹងថា ជននេះបានដេកស្លា.ប់នៅទីនោះតាំងពីពេលណាទេ លុះព្រឹកឡើងទើបគេប្រទះឃើញ ហើយក៏រាយការណ៍ប្រាប់សមត្ថកិច្ចតែម្ដង។ មន្ត្រីប៉ុស្តិ៍រដ្ឋបាលអូរតាគី ដែលបានចុះពិនិត្យសាកសពដំបូងបាននិយាយថា ជនរងគ្រោះដែលដេកស្លា.ប់មានស្នាមរបួសលើរាងកាយខ្លះៗនោះ ជាជនអនាថា ដែលគេបានប្រទះឃើញនៅពេលថ្ងៃ ឈរនៅម្ដុំការដ្ឋានសាងសង់ផ្លូវ(ម្ដុំផ្លូវបំបែក) នៅក្បែរនោះ។ មន្ត្រីដដែលនិយាយថា នៅវេលាម៉ោងប្រហែល៧យប់ ថ្ងៃទី២២ មេសា មានគេរាយការណ៍ថា ជននេះបានឈរនៅទៅនោះ ហើយគប់កញ្ចក់រថយន្តអ្នកដំណើរ ទើបមន្ត្រីប៉ុស្ដិ៍ និងកម្លាំងប្រជាការពារចុះទៅមើល និងបានដេញជននោះឲ្យចាកចេញពីនោះ ដើម្បីកុំឲ្យបង្កបញ្ហានៅទីនោះមុនពេលកើតហេតុ ម្យ៉ាងជននេះ ហាក់ដូចជាស្រវឹងស្រាឡើងជោកជាំទៅហើយ។ ប៉ុន្តែនៅព្រឹកថ្ងៃទី២៣ មេស ស្រាប់តែគេប្រទះឃើញជននេះដេកស្លា.ប់នៅក្បែរផ្លូវតូចមួយ ចម្ងាយពីផ្លូវជាតិប្រហែល៥០ម៉ែត្រ។
បើតាមសាក្សីនៅក្បែរនោះ បាននិយាយថា នៅវេលារំលងអធ្រាត្រ គេបានឮសំឡេងស្រែក«អូយ អូយ» នៅកន្លែងសាកសព តែគេមិនដឹងថា នរណាមានរឿងអ្វីទេ លុះព្រឹកឡើងស្រាប់តែមានមនុស្សដេកស្លា.ប់។ ប្រភពដដែលបានបញ្ជាក់ថា ជនរងគ្រោះដែលស្លាប់នោះ មិនមែនជាអ្នកភូមិរស់នៅតំបន់នោះទេ។ តែប៉ុន្មានថ្ងៃកន្លងទៅនេះ គេតែងឃើញជននេះដើរតាមដងផ្លូវ ម្ដុំផ្លូវបំបែកនៅក្បែរនោះ ដែលកំពុងសាងសង់ ហើយពេលខ្លះជននេះស្ថិតក្នុងស្ថានភាពស្រវឹងជោគជាំ។ ប្រភពដទៃទៀតបាននិយាយថា ជនរងគ្រោះអាចត្រូវគេវាយក៏អាចថា បាន ព្រោះជននេះតែងរើសដុំថ្ម គប់កញ្ចក់រថយន្តគេនៅពេលយប់។
ហើយនៅយប់កើតហេតុ ជននេះក៏បានគប់កញ្ចក់រថយន្តគេដែរ។ ដូច្នេះគេសង្ស័យដោយសារតែបែបនេះហើយ ទើបត្រូវគេវាយរហូតដល់ស្លា.ប់។ ប៉ុន្តែសមត្ថកិច្ចហាក់មិនទាន់ធ្វើការសន្និដ្ឋានចំពោះការស្លា.ប់របស់ជនអនាថា ម្នាក់នេះទេ។ នៅកន្លែងកើតហេតុគេមានស្នាមខ្ទេចស្មៅ រីឯលើខ្លួនជនរងគ្រោះមានស្នាមដាច់រលាត់ខ្លះៗ និង ត្រង់ក្បាលផ្នែកខាងក្រោយក៏មានស្នាមរបួសដែរ។ មន្ត្រីបច្ចេកទេស បានចុះពិនិត្យសាកសពយ៉ាងហ្មត់ចត់ដែរ តែមិនទាន់ហ៊ានវាយតំលៃថា តើជនរងគ្រោះ ស្លាប់ដោយអំពើឃាតកម្ម ឬ ស្លាប់ដោយសារអ្វីឲ្យប្រាកដនោះដែរ ? ប៉ុន្តែយ៉ាងណាមន្ត្រីជំនាញ បាននិងកំពុងស៊ើបអង្កេតលើករណីនេះនៅឡើយ៕ ដោយ ៖ ឆោម ពិសម័យ
ចែករំលែកព័តមាននេះ