រាជធានីភ្នំពេញ ៖ ផ្ទះថ្មជាន់ទី២ ដែលត្រូវអាជ្ញាធរអះអាងថា អត់ច្បាប់ត្រឹមត្រូវនោះត្រូវបានគណៈបញ្ជាការឯកភាពខណ្ឌទួលគោក បញ្ចេញកម្លាំងវាយកម្ទេចចោលបង្កឱ្យមានការភ្ញាក់ផ្អើល កាលពីវេលាម៉ោង៧និង៣០នាទីព្រឹកថ្ងៃទី២៤ មីនា ២០១១ តាមផ្លូវកម្ពុជាក្រោម សង្កាត់ទឹកល្អក់ទី១ ខណ្ឌទួលគោក ខាងលិចសាលាសន្ធរម៉ុកចម្ងាយប្រមាណ១០០ម៉ែត្រ ។
បុរសម្ចាស់ផ្ទះឈ្មោះឈ ហ៊ាងស៊ា អាយុ៤៥ឆ្នាំ និងម្នាក់ទៀតជាប្អូនស្រីឈ្មោះពួន ស៊ីណា អាយុ៣៩ឆ្នាំ បានធ្វើការតវ៉ាផងដែរ ប៉ុន្តែទៅមិនរួចជាមួយច្បាប់អាជ្ញាធរ…ផ្ទះថ្មដែលវាយកម្ទេចចោលនេះស្ថិតនៅជាន់ទី២ បានសាងសង់រយៈពេល១ឆ្នាំ ហើយ ដោយមិនមានច្បាប់អនុញ្ញាតទេ ។ សូមបញ្ជាក់ថា អគារជាន់លើនេះសាងសង់ពីលើអគារចាស់ទ្រុឌទ្រោមដែលសល់ពីសង្គមចាស់ ដូច្នេះបើមិនវាយកម្ទេចចោលទេ វានឹងរលំបង្កគ្រោះថ្នាក់ដល់អាយុជីវិតមនុស្សមិនខានឡើយ ។
ក្រុមមន្ត្រីអាជ្ញាធរបានឱ្យដឹងថា កម្លាំងចម្រុះរបស់សាលាខណ្ឌទួលគោកដែលវាយកម្ទេចអគារជាន់ទី២ចោលនេះ គឺធ្វើតាមលិខិតរបស់សាលារាជធានីភ្នំពេញ លេខ៤១៤ ចុះថ្ងៃទី២២ តុលា ២០១០ ដោយមានហត្ថលេខាលោកស្រីទូច សារ៉ុម អភិបាលរងរាជធានីភ្នំពេញ ៕
ចែករំលែកព័តមាននេះ