នាយករដ្ឋមន្ត្រីឡាវ ប្រកាសបិទខ្ទប់ទីក្រុងវៀងចន្ទន៍ ១៤ថ្ងៃ ក្រោយផ្ទុះការឆ្លងជំងឺកូវីដ-១៩
ទីក្រុងវៀងចន្ទន៍ ៖ នាយករដ្ឋមន្ត្រីឡាវ លោក Phankham Viphavanh នៅថ្ងៃពុធ ទី២១ ខែមេសានេះ បានបញ្ជាឲ្យ…
ទីក្រុងវៀងចន្ទន៍ ៖ នាយករដ្ឋមន្ត្រីឡាវ លោក Phankham Viphavanh នៅថ្ងៃពុធ ទី២១ ខែមេសានេះ បានបញ្ជាឲ្យ បិទខ្ទប់រដ្ឋធានីវៀងចន្ទន៍ រយៈពេល ១៤ថ្ងៃ បន្ទាប់ពីមានការកើនឡើងនៃការឆ្លងវីរុសកូវីដ-១៩ ខណៈខេត្តដទៃទៀត លោកជំរុញឲ្យចាត់វិធានការដើម្បីគ្រប់គ្រងជំងឺនេះ ។
ក្រសួងសុខាភិបាលប្រទេសឡាវ នៅថ្ងៃពុធនេះ បានប្រកាសពីករណីឆ្លងជំងឺកូវីដ-១៩ ចំនួន ២៦ករណីថ្មីទៀត ក្នុងទីក្រុងវៀងចន្ទន៍ បន្ទាប់ពីមានការផ្ទុះឡើង ដែលគេជឿថា ចាប់ផ្តើមនៅពេលឡាវអបអរពិធីបុណ្យចូលឆ្នាំថ្មី ។
យោងតាមសេចក្តីជូនដំណឹង ស្តីពីវិធានការបិទខ្ទប់រដ្ឋធានីវៀងចន្ទន៍ អោយដឹងថា Lockdown ចាប់ពីម៉ោងសូន្យ ថ្ងៃទី២២ រហូតដល់ថ្ងៃទី៥ ខែឧសភា អាជ្ញាធរឡាវគ្រប់លំដាប់ថ្នាក់ ត្រូវបន្តអប់រំសាធារណជន អំពីគ្រោះថ្នាក់ដែលបង្កឡើងដោយជំងឺកូវីដ-១៩ ក៏ដូចជាវិធីដើម្បីការពារខ្លួន និងក្រុមគ្រួសាររបស់ពួកគេ ។
ប្រជាជនដែលធ្វើការនៅការិយាល័យរដ្ឋាភិបាល ក្នុងទីក្រុងវៀងចន្ទន៍ គឺកាត់បន្ថយចំនួនបុគ្គលិក ដើម្បីធានាដល់ការរក្សាគម្លាតសង្គម លើកលែងតែបុគ្គលិកចាំបាច់ ដូចជាទាហាន និងមន្ត្រីប៉ូលីស ។ អនុវត្តដូចគ្នាចំពោះអាជីវកម្ម ក្នុងវិស័យឯកជន ។
ការធ្វើដំណើរចេញពីវៀងចន្ទន៍ ទៅបណ្តាខេត្ត និងពីខេត្តផ្សេងៗ ចូលមកក្នុងរាជធានី ត្រូវហាមឃាត់ លើកលែងតែអ្នករស់នៅអចិន្ត្រៃយ៍ក្នុងរាជធានី ។ អ្នករស់នៅទីក្រុងវៀងចន្ទន៍ ត្រូវបានហាមឃាត់មិនឱ្យចាកចេញពីផ្ទះ លើកលែងតែការងារចាំបាច់ ។
ការប្រមូលផ្តុំ មិនលើសពី ២០នាក់ទេ ខណៈពិធីផ្សេងៗ ដូចជាពិធីបុណ្យសព ត្រូវធ្វើឡើងដោយយកចិត្តទុកដាក់បំផុត និងស្របតាមវិធានការបង្ការរបស់ក្រសួងសុខាភិបាលឡាវ ។
សណ្ឋាគារ និងរមណីយដ្ឋាននានា អាចដំណើរការបាន ប៉ុន្តែត្រូវផ្តល់តែកន្លែងស្នាក់នៅ និងសេវាកម្មម្ហូបអាហារប៉ុណ្ណោះ ។
ខេត្តផ្សេងទៀត ត្រូវបានណែនាំឲ្យបង្កើនវិធានការការពារ ដែលចាំបាច់ និងស្របតាមអត្រានៃការរីករាលដាល នៅក្នុងខេត្តនី0មួយៗ ។
គិតត្រឹមយប់ថ្ងៃទី២១ មេសានេះ នៅក្នុងប្រទេសឡាវ មានអ្នកឆ្លងកូវីដ-១៩ សរុបចំនួន ៨៨ករណី ។ ៤៩ករណីបានជាសះស្បើយឡើងវិញ និងគ្មានអ្នកស្លាប់ទេ ។ ប្រទេសឡាវបានឆ្លងកូវីដ-១៩ ករណីដំបូងនៅថ្ងៃទី២៤ ខែមីនា ឆ្នាំមុន ៕
ចែករំលែកព័តមាននេះ