រាជធានីភ្នំពេញ ៖ ស្របពេលដែលប្រជាពលរដ្ឋ កំពុងមានការព្រួយបារម្ភយ៉ាងខ្លាំង នឹងការរាតត្បាតពីជំងឺកូវីដ-១៩ ក៏មានជនខិលខូចមួយចំនួន បានកំពុងរិះរកល្បិចកល ដើម្បីបោកប្រាស់ប្រជាពលរដ្ឋ ដោយបន្លំធ្វើជា អាជ្ញាធរ ឬសប្បុរសជន ដើម្បីចែកម្ហូបអាហារ ជួយឧបត្ថម្ភថវិកា ឬផ្ដល់ប្រាក់កម្ចីជាដើម ដូច្នេះនាយកដ្ឋានប្រឆាំងបទល្មើសបច្ចេកវិទ្យា សូមណែនាំដល់ប្រជាពលរដ្ឋទាំងអស់ ឲ្យមានការប្រុងប្រយ័ត្ន ចំពោះជនខិលខូចមួយចំនួន ដែលអាចឆ្លៀតឱកាសបោកប្រាស់បងប្អូនតាមរយៈទូរសព្ទ ឬបណ្ដាញទំនាក់ទំនងសង្គម ក្រោមរូបភាពផ្សេងៗមានដូចជា ៖
១- ការជួយឧបត្ថម្ភថវិកា ឬម្ហូបអាហារ ៖
- ជនខិលខូចអាចផ្ញើសារ ឬផ្សព្វផ្សាយតាមបណ្ដាញទំនាក់ទំនងសង្គម ក្នុងន័យជួយឧបត្ថម្ភ ប៉ុន្តែទាមទារឲ្យបងប្អូនចុច Like ដើម្បីបង្កើនចំនួន Like ផេករបស់ពួកគេ ឬ Share ព័ត៌មានដើម្បីបំពុលសង្គមតែប៉ុណ្ណោះ ។
២- ការផ្ដល់ប្រាក់កម្ចីងាយៗ
- ទាមទារឲ្យបង់កម្រៃសេវាកម្មជាមុន ។
- ភ្ជាប់មកជាមួយនូវតំណរភ្ជាប់ (Link) ដែលមានផ្ទុកមេរោគ ដើម្បីលួចយកទិន្នន័យ ។
៣- ក្លែងបន្លំជាអាជ្ញាធរ ឬមន្ត្រីមន្ទីរពេទ្យ ហើយទាមទារឲ្យបង់ប្រាក់ ដើម្បីជួយឧបត្ថម្ភ ឬជួយសង្គ្រោះបងប្អូន ។
ដើម្បីការពារពីការបោកបន្លំ ដោយជនខិលខូចមួយចំនួន តាមរយៈរូបភាពដូចខាងលើ សូមបងប្អូនអនុវត្តតាមការណែនាំមួយចំនួន ដូចខាងក្រោម ៖
- សូមធ្វើការបញ្ជាក់ប្រភពព័ត៌មានថា ជាប្រភពផ្លូវការ មុននឹងចុចលើតំណភ្ជាប់ (Link) ឬចុច Like ឬ Share ផេកហ្វេសប៊ុក ណាមួយ ។
- សូមពិនិត្យឱ្យបានច្បាស់លាស់មុននឹងផ្ដល់ព័ត៌មានផ្ទាល់ខ្លួនទាក់ទងនឹងការឧបត្ថម្ភម្ហូបអាហារ ឬការឧបត្ថម្ភផ្សេងៗទៀត ដើម្បីចៀសវាង កុំឲ្យជនខិលខូចអាចយកទិន្នន័យទាំងនេះ ទៅធ្វើការបោកបញ្ឆោតនៅពេលក្រោយ ។ ក្នុងករណីដែលមានការសង្ស័យ បងប្អូនអាចធ្វើការទំនាក់ទំនងទៅលេខទូរស័ព្ទ ដែលរាជរដ្ឋាភិបាលបានដាក់ឲ្យប្រើប្រាស់ ដើម្បីទទួលព័ត៌មានលម្អិត ។
- ក្នុងករណីដែលមានការពាក់ព័ន្ធនឹងការផ្ដល់សេវាសុខាភិបាល សូមទូរសព្ទទៅលេខ១១៥ ឬទំនាក់ទំនងទៅអាជ្ញាធរមូលដ្ឋាន ដើម្បីសួរនាំបន្ថែម ឬបញ្ជាក់ពីព័ត៌មានទាំងនោះ ៕
ចែករំលែកព័តមាននេះ