រាជធានីភ្នំពេញ៖ ក្រោយពីរាជរដ្ឋាភិបាលចេញវិធានការរឹតបណ្តឹងលើការធ្វើដំណើរនិងការដឹកជញ្ជូនដើម្បីទប់ស្កាត់ការរីករាលដាលឆ្លងនៅជំងឺកូវីដ១៩ចូលទៅក្នុងសហគមន៍នាមួយរយៈពេលចុងក្រោយនេះ គេសង្កេតឃើញថា ក្រុមអ្នកធ្វើអាជីវកម្មផ្តល់សេវាដឹកជញ្ជូនមួយចំនួនត្រូវបានផ្អាកស៊ឹងតែ១០០% ឬផ្អាកទាំងស្រុងមកទល់ពេលនេះ ព្រោះបុគ្គលិករបស់ក្រុមហ៊ុនទាំងអស់មិនអាចទៅធ្វើការបាន។
រូបតំណាងលោកឧកញ៉ា ស៊ិន ចន្ធី ប្រធានសមាគមភស្តុភារកម្ម កម្ពុជាបានឱ្យដឹងនៅថ្ងៃទី២០មេសាឆ្នាំ២០២១នេះថា នៅពេលមានការបិទខ្ទប់នៅតំបន់ដែលមានការរីករាលនៃជំងឺកូវីដ១៩ដែលបណ្តាលមកពីព្រឹត្តិការណ៍សហគមន៍២០កុម្ភៈរហូតមកដល់ពេលនេះ ថ្វីបើនៅក្នុងសេចក្តីសម្រេចរបស់រាជរដ្ឋាភិបាលថាសកម្មភាពដឹកជញ្ជូនអាចនៅមានការលើកលែងឱ្យដំណើរការ តែការពិតយើងនៅតំបន់ក្រហមដែលមានហានិភ័យខ្ពស់នេះត្រូវបានបិទខ្ទប់១០០%ហើយ រីឯនៅតំបន់ផ្សេងទៀតក៏មិនអាចធ្វើដំណើរការបាន។
លោកឧកញ៉ា ស៊ិនចន្ធី មានប្រសាសន៍ថា« មកដល់ពេលនេះ ក្រុមហ៊ុនហាក់បីដូចជាផ្អាកស៊ឹងតែ១០០%ទៅហើយ ។ជាក់ស្តែងបុគ្គលិកទាំងអស់មិនអាចទៅធ្វើការបាន អីចឹងយើងមិនអាចរៀបចំបញ្ចេញទំនិញបានទេមកដល់ពេលនេះ ។មកដល់ម៉ោងនេះខ្ញុំកំពុងធ្វើកិច្ចការនេះជាមួយខាងគណកម្មការ គ.ប.ខ ដើម្បីស្នើសុំធ្វើយ៉ាងម៉េចឱ្យមានដំណើរការវិញបាន ព្រោះទំនិញនៅតែមានតម្រូវការ ពិសេសមុខទំនិញប្រើប្រាស់ប្រចាំថ្ងៃដូចជា ថ្នាំពេទ្យ, គ្រឿងឧបភោគបរិភោគ គ្រឿងប្រើប្រាស់ផ្សេងទៀត ហើយទន្ទឹមនិងនេះ យើងក៏ត្រូវការនាំចេញទៅវិញដូចជាអង្ករក៏ដូចជាផលិតផលកសិកម្ម តែបែរមកស្ទះបែបនេះវាធ្វើឱ្យយើងមានបញ្ហា»។
លោកឧកញ៉ា សង្កត់ធ្ងន់ថា«យើងស្នើរសុំទៅគណកម្មការ.គ.ប.ខ. បន្ទាន់ដើម្បីឱ្យបុគ្គលិកបម្រើកិច្ចការក្នុងការបញ្ចេញទំនិញ នាំចេលទំនិញរួមនិងរថយន្តអាចដំណើរការឡើងវិញ បើមិនដូច្នេះទេវានិងបង្កការរាំងស្ទះខ្លាំងហើយនៅពេលនេះវាចង់គាំងហើយ។បើមិនមានការសម្រួលឱ្យបានទាន់ពេលវេលានោះទេ វានឹងធ្វើឱ្យក្រុមហ៊ុនបញ្ឈប់ដំណើរការ ព្រោះគ្មានបុគ្គលិកមិនអាចទៅបម្រើការបាន»។
បើតាមប្រធានសមាគមភស្តុភារកម្មខាងលើរូបនេះថា ការផ្តល់សេវាដឹកជញ្ជូនរបស់សមាជិកសមាគមមាននៅក្នុងតំបន់ក្រហមនិងក្រៅតំបន់ក្រហមមកដល់សព្វថ្ងៃនេះ៕
ចែករំលែកព័តមាននេះ