ខេត្តមណ្ឌលគិរី ៖ អាជ្ញាធរស្រុកកែវសីមា បាននាំយកបុគ្គលិកមីក្រូហិរញ្ញវត្ថុ WB ហ្វាយណាន់ ចំនួន០៥នាក់យកទៅធ្វើចត្តាឡីស័កចំនួន១៤ថ្ងៃ កាលពីវេលាម៉ោង១៩និង៤០នាទី ថ្ងៃទី១៨ ខែមេសា…
ខេត្តមណ្ឌលគិរី ៖ អាជ្ញាធរស្រុកកែវសីមា បាននាំយកបុគ្គលិកមីក្រូហិរញ្ញវត្ថុ WB ហ្វាយណាន់ ចំនួន០៥នាក់យកទៅធ្វើចត្តាឡីស័កចំនួន១៤ថ្ងៃ កាលពីវេលាម៉ោង១៩និង៤០នាទី ថ្ងៃទី១៨ ខែមេសា ឆ្នាំ២០២១ នៅចំណុចផ្ទះជួល ស្ថិតក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ។
បើតាមសមត្ថកិច្ចបានឱ្យដឹងថា មានបុគ្គលិកមីក្រូហិរញ្ញវត្ថុ WB ហ្វាយណាន់ ០២នាក់ សង្ស័យថា ជាប់ពាក់ព័ន្ធជាមួយម្ដាយរបស់ឈ្មោះ ជុំ ចន្ធី ដែលមានវិជ្ជមានកូវីដ១៩ នៅខេត្តក្រចេះ កាលពីថ្ងៃទី១១ ខែមេសា ឆ្នាំ២០២១។
សមត្ថកិច្ចបន្តថា អ្នកដែលត្រូវទៅធ្វើចត្តាឡីស័កខាងលើ ទី១- ឈ្មោះ ចយ ភ័ស្ត ភេទប្រុស អាយុ២៨ឆ្នាំ ជនជាតិព្នង មុខរបរបុគ្គលិកមីក្រូហិរញ្ញវត្ថុ WB ហ្វាយណាន់ មានទីកន្លែងកំណើតនៅភូមិស្រែព្រះ ស្រែព្រះ ស្រុកកែវសីមាខេត្តមណ្ឌលគិរី។ និងទី២- ឈ្មោះ ណេត សៀងហៃ ភេទប្រុស អាយុ២៥ឆ្នាំ ជនជាតិខ្មែរ មុខរបរបុគ្គលិកមីក្រូហិរញ្ញវត្ថុ WB ហ្វាយណាន់ មានទីកន្លែងកំណើតនៅភូមិជួរក្រូច ឃុំថ្មអណ្ដើក ស្រុកចិត្របុរី ខេត្តក្រចេះ។
ចំណែកឯបុគ្គលិកមីក្រូហិរញ្ញវត្ថុ WB ហ្វាយណាន់ ចំនួន០៣នាក់ផ្សេងទៀត បានធ្វើដំណើរមកពីខេត្តក្រចេះ ចូលមកខេត្តមណ្ឌលគិរី គឺទី១- ឈ្មោះ ចេន ធារ៉ា ភេទប្រុស អាយុ២៣ឆ្នាំ មកពីភូមិសង្គម ឃុំថ្មអណ្ដើក ស្រុកចិត្របុរី ខេត្តក្រចេះ។ទី២- ឈ្មោះ យឹន ថារ័ត្ន ភេទស្រី អាយុ២៤ឆ្នាំ មកពីភូមិហាន់ជ័យ ឃុំហាន់ជ័យ ស្រុកឆ្លូងខេត្តក្រចេះ និងទី៣-ឈ្មោះ ឈុន លាងម៉ី ភេទស្រី អាយុ ២៣ឆ្នាំ មកពីភូមិហាន់ជ័យ ឃុំហាន់ជ័យ ស្រុកឆ្លូងខេត្តក្រចេះ។ ដោយឈ្មោះទាំង៣ខាងលើ បានជិះម៉ូតូចំនួន២គ្រឿង និងមានគ្នាចំនួន៣នាក់ បានជិះវៀងប៉ារ៉ាស់គោលដៅព្រំប្រទល់ខេត្តក្រចេះ និងខេត្តមណ្ឌលគិរីផងដែរ៕
ចែករំលែកព័តមាននេះ