ADផ្ទាំងផ្សព្វផ្សាយពាណិជ្ជកម្ម

ខណ្ឌដូនពេញឃាត់យាន៧៨គ្រឿងល្មើសបំរាមគោចរ និងបិទខ្ទប់រាជធានីភ្នំពេញ

3 ឆ្នាំ មុន

ភ្នំពេញ
១៩ ខែ មេសា ឆ្នាំ ២០២១ ម៉ោង ១០:០៩

រាជធានីភ្នំពេញ ៖ យានល្មើសក្នុងការបិទខ្ទប់រាជធានីភ្នំពេញសមត្ថកិច្ចចម្រុះខណ្ឌដូនពេញបានធ្វើការត្រួតពិនិត្យយានយន្តល្មើសបិទបម្រាមគោចរនិងការខ្ទប់រាជធានីភ្នំពេញហើយឃាត់បានសរុប៧៨គ្រឿង រីឯម្ចាស់យានតម្រូវឲ្យទៅធ្វើចត្តាឡីស័កនៅឯផ្ទះរបស់សាមីខ្លួនរយៈ១៤ថ្ងៃ ។ ទាក់ទិននឹងការចាប់ឃាត់រថយន្តនិងម៉ូតូដែលល្មើស លោកវរសេនីយ៍ឯកទៀង ច័ន្ទសារ អធិការនគរបាលខណ្ឌដូនពេញបានមានប្រសាសន៍ឲ្យដឹងថា ៖…

ទាក់ទិននឹងការចាប់ឃាត់រថយន្តនិងម៉ូតូដែលល្មើស លោកវរសេនីយ៍ឯកទៀង ច័ន្ទសារ អធិការនគរបាលខណ្ឌដូនពេញបានមានប្រសាសន៍ឲ្យដឹងថា ៖ បុគ្គលគ្រប់រូបត្រូវបានហាមឃាត់មិនឲ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួន។ ក្នុងករណីមានការបំពានវិធានការហាមឃាត់ការធ្វើដំណើរនេះ អាជ្ញាធរអនុវត្តវិធានការបិទខ្ទប់ ត្រូវអនុវត្តវិធានការច្បាប់យ៉ាងម៉ឺងម៉ាត់ ដោយរួមទាំងឃាត់ទុកជាបណ្តោះអាសន្ននូវមធ្យោបាយធ្វើដំណើរ ។ នេះបើតាមប្រការ២-ថ្មី នៃសេចក្តីសម្រេច។

ជាលទ្ធផលគណៈបញ្ជាការឯកភាពខណ្ឌដូនពេញបានបង្ក្រាបរថយន្តនិងម៉ូតូដែល ល្មើសនិងបម្រាមគោចរបានចំនួន៖ ម៉ូតូចំនួន ៤៧ គ្រឿង រថយន្តចំនួន 0៧ គ្រឿង ម៉ូតូកង់បីចំនួន 0៥ គ្រឿង (ចាប់ថ្ងៃទី២ មេសា ២០២១ ដល់ថ្ងៃទី១៥ មេសា ២០២១)។ដោយឡែកចាប់ពីថ្ងៃទី១៦ មេសា ២០២១ដល់ថ្ងៃទី១៨ មេសា ២០២១ក្នុងការបិទខ្ទប់រាជធានីភ្នំពេញ បង្ក្រាបម៉ូតូល្មើសនិងបម្រាមគោចរបានចំនួន១៩គ្រឿង។សរុបរួមចាប់ពីថ្ងៃទី0២.0៤.២០២១ដល់ថ្ងៃទី១៨.0៤.២០២១បង្ក្រាបម៉ូតូល្មើសនិងបម្រាមគោចរបាន:ម៉ូតូបានចំនួន ៦៦ គ្រឿង រថយន្តចំនួន 0៧ គ្រឿងនិងម៉ូតូកង់បីចំនួន 0៥ គ្រឿង សរុបរួមចំនួន ៧៨ គ្រឿង។

មន្ត្រីសាលាខណ្ឌដូនពេញមួយរូបបានឲ្យដឹងថា លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានបន្តចុះត្រួតពិនិត្យ និងលើកទឹកចិត្តដល់កងកម្លាំងដែលបានយាមប្រចាំការ ២៤/២៤ម៉ោង នៅតាមគោលដៅបិទខ្ទប់ទាំង ១៩ទីតាំង ក្នុងភូមិសាស្ត្រខណ្ឌដូនពេញ។ក្នុងនាមជាអភិបាល នៃគណៈអភិបាលខណ្ឌដូនពេញ និងជាប្រធានគណៈបញ្ជាការឯកភាពរដ្ឋបាលខណ្ឌលោកសុខ ពេញវុធ បានបន្តចុះត្រួតពិនិត្យ និងលើកទឹកចិត្តដល់កងកម្លាំងដែលបានឈរជើងបំពេញភារកិច្ចប្រចាំការបិទខ្ទប់នៅតាមគោលដៅច្រកចេញចូលសំខាន់ៗទាំង ១៩ទីតាំង ក្នុងភូមិសាស្ត្រខណ្ឌដូនពេញ ដើម្បីធានាបាននូវប្រសិទ្ធភាព សុវត្ថិភាព និង ទប់ស្កាត់បាននូវចរន្តប្រជាពលរដ្ឋចេញចូល បន្លាស់ទី ដោយគ្មានភារកិច្ចចាំបាច់ ស្របតាមសេចក្តីសម្រេចរបស់រាជរដ្ឋាភិបាលកម្ពុជា និង រដ្ឋបាលរាជធានីភ្នំពេញ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ ៕