ឥណ្ឌា ៖ យោងតាមការចេញផ្សាយពីសារព័ត៌មាន Reuters បានឱ្យដឹងថា ប្រទេសឥណ្ឌាបានកត់ត្រាករណីឆ្លងវីរុសកូវីដ១៩ ប្រចាំថ្ងៃខ្ពស់បំផុតសម្រាប់ថ្ងៃទី៣ ដែលមានចំនួនជាង ២៣៤,០០០ករណីក្នុងរយៈពេល ២៤ម៉ោងចុងក្រោយ។ ចំនួននេះធ្វើឱ្យករណីឆ្លងសរុបកើនឡើងជិត ១៤.៥លាននាក់នាំឱ្យប្រទេសនេះស្ថិតនៅលំដាប់ទី ២ ពិភពលោកបន្ទាប់ពីសហរដ្ឋអាមេរិក។ ខណៈករណីស្លា.ប់ថ្មីមានចំនួន ១.៣៤១នាក់ ដែលធ្វើឱ្យចំនួនអ្នកស្លា.ប់សុរបកើនឡើងដល់ ១៧៥.៦៤៩នាក់។
បច្ចុប្បន្នឥណ្ឌាកំពុងប្រឈមមុខនឹងការខ្វះខាតគ្រែសម្រាប់ដាក់អ្នកជំងឺ។ ក្នុងនោះបើតាមសម្តីរបស់លោក Arvind Kejriwal នាយករដ្ឋមន្ត្រីនៃទឹកដីសហភាពក្រុងដេលីបានមានប្រសាសន៍ថា «ស្ថានការណ៍នេះគឺគួរឱ្យព្រួយបារម្ភខ្លាំងណាស់។ ដោយស្ទើរតែមួយក្នុងចំណោមការធ្វើតេស្តចំនួន ៤ បានបង្ហាញលទ្ធផលវិជ្ជមាន។ ស្របពេលដែលកំពុងមានការខ្វះខាតអុកស៊ីសែនសម្រាប់អ្នកជំងឺ»។
លោកក៏បានបន្ថែមថា បច្ចុប្បន្នគ្រែដែលបំពាក់ដោយការផ្គត់ផ្គង់អុកស៊ីសែន រួមទាំងគ្រឿងបរិក្ខារសម្រាប់ថែទាំអ្នកជំងឺ កំពុងត្រូវបានបំពេញយ៉ាងឆាប់រហ័សតាម។
រដ្ឋធានីញូវដេលី គឺជាទីក្រុងមួយដែលរងគ្រោះខ្លាំងបំផុតនៅក្នុងប្រទេសឥណ្ឌា សម្រាប់ការផ្ទុះឡើងនៃរលកទី ២ នេះ។ ខណៈការកត់ត្រាថ្មីលើករណីឆ្លងមានដល់ជាង ២០,០០០ករណីក្នុងរយៈពេល ២៤ម៉ោងចុងក្រោយ។ ដែលវាកំពុងតែធ្វើឱ្យប៉ះពាល់យ៉ាងខ្លាំងដល់ហេដ្ឋារចនាសម្ព័ន្ធសុខភាពជាតិ។
បើក្រឡេកមកមើលរូបភាពដ៏ខ្លោចចិត្តដែលបង្ហាញដោយសារព័ត៌មាន Reuters គេសង្កេតឃើញពីការខ្វះខាតយ៉ាងខ្លាំងលើការផ្គត់ផ្គង់គ្រឿងបរិក្ខារវេជ្ជសាស្ត្រ ដែលត្រូវបង្ខំចិត្តឱ្យអ្នកជំងឺកូវីដ ២នាក់ត្រូវសម្រាកព្យាបាលនៅលើគ្រែតែមួយ៕
ចែករំលែកព័តមាននេះ