ខេត្តកំពត ៖ បើតាមសេចក្តីរាយការណ៍បានឱ្យដឹងថា ព្រះសង្យចំនួន១១អង្គគង់នៅវត្តព្រៃក្រឡា ស្ថិតក្នុងឃុំទូកមាសខាងលិច ស្រុកបន្ទាយមាស ខេត្តកំពត កាលពីព្រឹកថ្ងៃទី១៥ ខែមេសា ឆ្នាំ២០២១ ព្រះសង្យទាំង១១អង្គបានឆាន់ចង្ហាន់ផ្សេងៗពីគ្នាដែលមានចំនួនយ៉ាងតិចតួចបំផុត។
សេចក្តីរាយការណ៍បន្តថា ជាក់ស្ដែងព្រះចៅអធិការវត្តព្រៃក្រឡា ដែលមានចង្ហាន់ឆាន់ពេលព្រឹកនោះ គឺមានតែផ្លែឪឡឹក១ និងសៀងមួយដងទេ។
ព្រះចៅអធិការវត្តព្រៃក្រឡាព្រះនាម ងយ សុវណ្ណដារ៉ា មានសង្ឃដីកាថា មិនដែលមានទេ ក្នុងរដូវចូលឆ្នាំប្រពៃណីខ្មែរយើងនេះ វត្តព្រៃក្រឡា គឺជាវត្តនៅជិតផ្សារ និងជាទីប្រជុំជនផងនោះ ស្រាប់តែពេលនេះស្ងាត់មនុស្សឈឹងតែម្ដង ធ្វើឱ្យព្រះសង្យទាំងអស់១១អង្គដាច់ចង្ហាន់។
ព្រះចៅអធិការវត្តព្រៃក្រឡា មានសង្ឃដីកាថា ព្រះសង្ឃដែលដាច់ចង្ហាន់នេះ មកពីពុទ្ធបរិស័ទ្ធជិតឆ្ងាយ គេមិនហ៊ានមកវត្ត ព្រោះថាជាក់ស្ដែងមានព្រះសង្យ២អង្គ កាលពីថ្ងៃទី១១ ខែមេសានោះ គឺមានពុទ្ធបរិស័ទ្ធនៅភូមិព្រៃក្រឡា បាននិមន្តទៅបង្សុកូលនៅជាប់ផ្ទះស្ត្រីម្នាក់ដែលបានធ្វើតេស្តចេញលទ្ធផលវិជ្ជមានកូវីដ១៩។
ព្រះចៅអធិការវត្ត មានសង្ឃដីកាប្រាប់បន្តថា សង្ឃ២អង្គខាងលើ មានព្រះនាម សុង វុទ្ធី និងសំបូ រិន ទាំង២ព្រះអង្គនោះមិនអនុញ្ញាតឱ្យចេញក្រៅវត្តទេ នៅតែគង់លើកុដិរហូតរយៈពេល១៤ថ្ងៃ។
ព្រះចៅអធិការវត្តមានសង្ឃដីកាបន្តទៀតថា ចំពេលចូលឆ្នាំថ្មីមានព្រះសង្ឃទាំង១១អង្គត្រូវធ្វើចត្តាឡីស័កទាំងអស់ មិនអនុញ្ញាតឱ្យព្រះសង្ឃអង្គណានិមន្តចេញពីវត្តឡើយ។
ហើយចៅអធិការវត្តព្រៃក្រឡា ក៏បាននិមន្តបិណ្ឌបាត្រសប្បុរសជនផងដែរ ឱ្យជួយឧបត្ថម្ភជាថវិកាក្តី ជាចង្ហាន់ក្ដីដល់ព្រះសង្ឃក្នុងពេលដែលមិនបាននិមន្តចេញទៅសូត្រមន្តក្រៅវត្តបាន ក្នុងគ្រាដែលមានអាសន្នដែលសង្ឃ២អង្គជាប់ពាក់ព័ន្ធនឹងការនិមន្តទៅសូត្របង្សុកូលដល់ញាតិសន្តានស្ត្រីដែលធ្វើតេស្តចេញលទ្ធផលកូវីដ១៩ ហើយបច្ចុប្បន្នស្ត្រីរូបនោះកំពុងសម្រាកព្យាបាលនៅក្នុងមន្ទីរពេទ្យបង្អែកកំពង់ត្រាច ស្រុកកំពង់ត្រាចផងដែរ។
ចែករំលែកព័តមាននេះ