រាជធានីភ្នំពេញ ៖ យោងតាមសេចក្តីប្រកាសរបស់រដ្ឋបាលរាជធានីភ្នំពេញ បានបង្ហាញអត្តសញ្ញាណអ្នកជំងឺកូវីដ ចំនួន២២៧នាក់ នៅភ្នំពេញ កាលពីថ្ងៃទី១៦ ខែមេសា ឆ្នាំ២០២១ថា បុគ្គលិកពេទ្យ នៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលសសេរថា«មន្ទីរសង្ឃពេទ្យកុសុមៈ» ចំនួន២២នាក់ ក្នុងនោះមានស្រី១១នាក់ បានឆ្លងជំងឺកូវីដ-១៩ ។
ការឆ្លងរាលដាលជំងឺកូវីដ-១៩ នៅក្នុងមន្ទីរពេទ្យលោកសង្ឃនេះ មកដល់យប់ថ្ងៃទី១៧ ខែមេសានេះ ក្រសួងសុខាភិបាលកម្ពុជា មិនបានប្រកាសឲ្យលម្អិតអំពីមូលហេតុនៃការឆ្លងរាលដាលជាច្រើននាក់ នៅក្នុងមន្ទីរពេទ្យមិត្តភាពកម្ពុជា-ចិន ព្រះកុសមៈ នោះឡើយ ។
ជាការកត់សម្គាល់ សកម្មភាពនៃការចាក់វ៉ាក់សាំងការពារជំងឺកូវីដ-១៩ ជូនដល់បុគ្គលិកមន្ត្រីសុខាភិបាល នៅមន្ទីរពេទ្យមិត្តភាពកម្ពុជា-ចិនព្រះកុសុមៈ ចាប់ផ្តើមនាថ្ងៃអង្គារ ទី១៦ ខែកុម្ភៈ ឆ្នាំ២០២១ កន្លងមក ។
ដោយឡែក ប្រភពព័ត៌មានលើកឡើងថា ការឆ្លងដល់ក្រុមបុគ្គលិកពេទ្យ នៃមន្ទីរពេទ្យលោកសង្ឃនេះ ទំនងជាបង្កឡើងដោយស្ត្រីម្នាក់ ដែលឆ្លងកូវីដ-១៩ពីក្មួយរបស់គាត់ ដែលស្ត្រីរូបនេះ ត្រូវជាភរិយារបស់ទាហានជើងទឹកមួយរូប នៅខេត្តព្រះសីហនុ ដែលរងរបួស ក្នុងឧប្បទ្ទវហេតុផ្ទុះអូប័រ នៅខេត្តព្រះសីហនុ កាលពីថ្ងៃទី០៤ មេសា ២០២១ ហើយត្រូវបានបញ្ជូនមកសង្គ្រោះបន្ទាន់ និងសម្រាកព្យាបាល នៅមន្ទីរពេទ្យព្រះកុសុមៈ ។
ប្រភពព័ត៌មានលើកឡើងទៀតថា ស្ត្រីរូបនេះមានឈ្មោះ អែម សារ៉េត ស្នាក់នៅភូមិព្រែកក្របៅទី២ ឃុំព្រែកកំពិល ស្រុកខ្សាច់កណ្តាល ខេត្តកណ្តាល ។ កាលពីថ្ងៃទី៥ ខែមេសា ឆ្នាំ២០២១ ក្មួយរបស់គាត់ឈ្មោះ រតនា បានមកសួរសុខទុក្ខគាត់និងប្តី នៅមន្ទីរពេទ្យព្រះកុសុមៈ រហូតមកដល់ថ្ងៃទី១៣ ខែមេសា ឆ្នាំ២០២១ ក្មួយរបស់គាត់បានទៅធ្វើតេស្តសំណាក ហើយរងចាំលទ្ធផលរហូតដល់ថ្ងៃទី១៤ មេសា ក្មួយរបស់គាត់ ទទួលលទ្ធផលថា វិជ្ជមានកូវីដ-១៩ ។ ក្រោយទទួលបានដំណឹងនេះភ្លាម ស្ត្រីឈ្មោះ អែម សារ៉េត ក៏ទៅធ្វើតេស្តសំណាកភ្លាម នៅមណ្ឌលសុខភាពចាក់អង្រែក្រោម លទ្ធផលចុងក្រោយ គឺនៅថ្ងៃទី១៥ មេសា ស្ត្រីឈ្មោះ អែម សារ៉េត ក៏ទទួលបានលទ្ធផល តេស្តវិជ្ជមានកូវីដ-១៩ ដែរ ។
ប្រភពព័ត៌មាន បានបញ្ជាក់ថា មុនកើតឧប្បទ្ទវហេតុផ្ទុះអូប័រ ស្ត្រីឈ្មោះ អែម សារ៉េត គឺបាននៅក្នុងផ្ទះមើលថែកូន រហូតដោយមិនបានចេញក្រៅ និងមិនស្ថិតនៅក្នុងតំបន់ចត្តាឡីស័កណាមួយឡើយ ប៉ុន្តែដោយសារប្តីរបស់គាត់បានជួបឧប្បទ្ទវហេតុផ្ទុះអូប័រនោះ ទើបគាត់បានមកមើលថែ ប្តីគាត់រហូត តែជាអកុសល ដោយសារតែក្មួយរបស់គាត់ ដែលបានមកសួរសុខទុក្ខគាត់ នៅថ្ងៃទី០៥ ខែមេសា ឆ្នាំ២០២១នោះ បានទៅធ្វើតេស្តឃើញវិជ្ជមានកូវីដ-១៩ ទើបគាត់ក៏ទៅធ្វើតេស្ត ហើយក៏ឃើញថា គាត់វិជ្ជមានដែរ ៕
ចែករំលែកព័តមាននេះ