រាជធានីភ្នំពេញ ៖ នៅព្រឹក និងរសៀលថ្ងៃទី១៧ ខែមេសា ឆ្នាំ ២០២១នេះ នៅលើដងមហាវីថីសហព័ន្ធរុស្ស៊ី ត្រូវបានអាជ្ញាធរ និងសមត្ថកិច្ច…
រាជធានីភ្នំពេញ ៖ នៅព្រឹក និងរសៀលថ្ងៃទី១៧ ខែមេសា ឆ្នាំ ២០២១នេះ នៅលើដងមហាវីថីសហព័ន្ធរុស្ស៊ី ត្រូវបានអាជ្ញាធរ និងសមត្ថកិច្ច បានទទួលបញ្ជាអោយបិទខ្ទប់ មិនអោយចេញចូល ទាំងអស់ ទោះបីមានឯកសារបញ្ជាក់ក៏ដោយ។
ទោះបីជាយ៉ាងណា អាជ្ញាធរ និងសមត្ថកិច្ច ក៏បានអនុញ្ញាតអោយចេញចូលដោយអន្លើរៗ និងខ្លះទៀតបានបើកអោយចេញចូល ដោយមិនបានពិនិត្យឯកសារនោះទេ ខណៈពេលដែលស្ថានភាព នៅលើដងផ្លូវចំណុចនោះបានកកស្ទះចរាចរយ៉ាងខ្លាំង ។
នៅព្រឹក នោះដែរ គេសង្កេតឃើញបង្កអោយមានប្រតិកម្ម ពីអ្នកដំណើរមួយចំនួនផងដែរ ខណៈពេលដែលពួកគេមានឯកសារ តាមការណែនាំនៅក្នុងសេចក្តីសម្រេចរបស់ប្រមុខរាជរដ្ឋាភិបាលស្តីពីការបិទខ្ទប់ភូមិ សាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ។
ដោយឡែកចំពោះអ្នកសារព័ត៌មាន ក៏បានអាជ្ញាធរ និងសមត្ថកិច្ចនៅតាមគោលដៅហាមឃាត់មិនអោយចេញចូលដែរ តែកន្លែងខ្លះបានអនុញ្ញាត ។
តាមព័ត៌មានអោយដឹងថា នៅព្រឹកថ្ងៃទី១៧ ខែមេសា ឆ្នាំ២០២១នេះ កំណាត់ផ្លូវសហព័ន្ធរុស្ស៊ី ត្រង់ចំណុចកែងផ្លូវ ២០០៤ ក្នុងមូលដ្ឋាន ខណ្ឌពោធិ៍សែនជ័យ ត្រូវបានអាជ្ញាធរ និងសមត្ថកិច្ចទទួលបញ្ជាអោយដាក់រនាំងដែក បិទខ្ទប់លើផ្លូវបំបែកទាំង៤ មិនអោយចេញ ទាំងស្រុងហើយ អោយត្រឡប់ក្រោយវិញនៅវេលាម៉ោងប្រមាណ៩និង៤០នាទីព្រឹក តែអនុញ្ញាតិអោយចេញចូលជាអន្លើរៗ ។
នៅព្រឹកនោះ គេឃើញ លោកហែម ដារិទ្ធ អភិបាលខណ្ឌពោធិ៍សែនជ័យ ក៏មានវត្តមានសម្រួលចរាចរណ៍ និងបានអនុញ្ញាតិមួយចំនួនផងដែរ ។ ការបិទខ្ទប់ទាំងស្រុងនេះ បង្កអោយមានការកកស្ទះចរាចរណ៍ យ៉ាងខ្លាំងផងដែរ ។
ទោះបីជាយ៉ាងណាសមត្ថកិច្ច បានបើកចរាចរណ៍ឡើងវិញ ខណៈពេលដែលកកស្ទះចរាចរណ៍ខ្លាំង ។ ដោយឡែកនោះកំណាត់មហាវិថី សហព័ន្ធរុស្ស៊ីនោះដែរត្រង់ចំណុចមុខធានាគារអេស៊ីលីដា ត្រង់ព្រុំប្រទល់ខណ្ឌ ពោធិ៍សែនជ័យ និងខណ្ឌសែនសុខ ក៏បានត្រូវបានបិទខ្ទប់ទាំងស្រុង មិនអោយចេញចូលមួយរយៈផងទោះបីមានឯកសារបញ្ជាក់ និងខ្លះទៀត ទើបតែមកពីទិញម្ហូបក៏មាន ។
នៅព្រឹកនោះ ដែរបង្កអោយមានការឈ្លោះ ប្រកែកគ្នា រវាងមន្ត្រីរាជការដែលទៅធ្វើការនៅទីស្តីការគណៈរដ្ឋមន្ត្រីម្នាក់ជាមួយនគរបាលខណ្ឌសែនសុខផងដែរ ។
តាមមន្ត្រីនគរបាលរូបនោះបានអោយដឹងថា ថ្នាក់លើបញ្ជាអោយបិទខ្ទប់ទាំងស្រុង ទោះបីជាមានឯកសារបញ្ជាក់ ឬប័ណ្ណសំគាល់ខ្លួនក៏ដោយមិនអនុញ្ញាតអោយចេញចូលនោះទេ ។ ចំពោះ អ្នកសារព័ត៌មានក៏មិនអោយចេញចូលដែរ ។
នៅរសៀលថ្ងៃទី១៧ ខែមេសានេះដែរកំណាត់មហាវិថីសហពន្ធរុស្ស៊ី ខាងលើក៏នៅតែបន្តបិទខ្ទប់ មិនអនុញ្ញាតអោយចេញចូលទោះមានឯកសារបញ្ជាក់ ឬប័ណ្ណសំគាល់ខ្លួនយ៉ាងណា ក៏ដោយ ។ នៅរសៀលនោះ នៅចំណុច ខាងកើត ធានាគារអេស៊ីលីដា គេឃើញ អធិការខណ្ឌពោធិ៍សែនជ័យ រួមជាមួយកងកម្លាំងបានឈរស្ទាក់ មិនអោយចូលក្នុងមូលដ្ឋានខណ្ឌរបស់ខ្លួននិងណែនាំ អោយត្រឡប់ក្រោយវិញ ព្រមឃាត់អ្នកសារព័ត៌មានម្នាក់ដែលធ្វើដំណើរត្រឡប់ទៅផ្ទះវិញផងដែរ ។
លោក វរៈសេនីយ៍ឯក ម៉ន វុធី អធិការនគរបាលពោធិ៍សែនជ័យ បានអោយដឹងថា ទោះបីអ្នកព័ត៌មានក៏ដោយមិនអនុញ្ញាតអោយចេញចូលនោះទេ តែអនុញ្ញាតអោយម្តងទៅ ។ ចំណែកគោលដៅ មួយទៀតខាងលិច អាកាសយានដ្ឋានអន្តរជាតិភ្នំពេញនៅភូមិព្រៃទា សង្កាត់ចោមចៅទី៣ ក៏បានហាមឃាត់ដែរ តែបានអនុញ្ញាតអោយអ្នកសារព័ត៌មាន ។
ការអនុវត្តបិទខ្ទប់ទាំងស្រុងបែបនេះ ត្រូវមហាជនមួយចំនួន មានការរិគន់ថា សមត្ថកិច្ចមួយចំនួនអនុវត្តលើសសេចក្តីសម្រេចរបស់ប្រមុខ រាជរដ្ឋាភិបាលស្តីពីការបិទខ្ទប់ភូមិសាស្ត្ររាជធានីភ្នំពេញនិងក្រុងតាខ្មៅ នៃខេត្តកណ្តាលដើម្បីទប់ស្កាត់ការឆ្លងរាលដាលនៃជំងឺកូវីដ១៩ ដែលបានសម្រេច ក្នុងប្រការ២ . ការធ្វើដំណើរ របស់អ្នកសារព័ត៌មាន ដោយមានភ្ជាប់ជាមួយនូវឯកសារបញ្ជាក់អំពីអត្តសញ្ញាណ និងការងារ៕
ចែករំលែកព័តមាននេះ