រាជធានីភ្នំពេញ ៖ លោកគុជ គឹមឡុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងឲ្យដឹងថា ក្រោយពីបានបើកការសាកសួរតាមនិតិវិធី លោកព្រះរាជអាជ្ញារង ឡុង ជាប បានសំរេចចោទប្រកាន់ផ្កាយ២និងគូកន តាមមាត្រា3, 4 និង11នៃច្បាប់កូវីត.១៩ ដោយអនុវត្តនីតិវិធីបង្ហាញខ្លួនភ្លាម (មាត្រា៤៧ ក្រមនីតិវិធីព្រហ្មទណ្ឌ) ត្រូវបញ្ជូនទៅ តុលាការជំនុំជម្រះនៅរសៀលនេះ ។
បើយោងតាមការចោទប្រកាន់តាមមាត្រា១១បានចែងថា បទរារាំងតាមដល់ការអនុវត្តវិធានការ ៖ អំពើរារាំង ឬបង្កឧបសគ្គ ដោយចេតនាដល់ការអនុវត្តវិធានការដែលបានដាក់ចេញស្របតាមច្បាប់នេះ ត្រូវផ្តន្ទាទោសដាក់ពន្ធនាគារពី៦ខែ(ប្រាំមួយខែ) ទៅ៣(បី)ឆ្នាំ និងពិន័យជាប្រាក់ពី២.០០០.០០០(ពីរលាន)រៀលទៅ១០.០០០.០០០(ដប់លាន)រៀល ។
សូមរំលឹកថា កាលពីវេលាម៉ោង០២និង១០នាទីរសៀលថ្ងៃទី១៧ មេសា ថ្ងៃដដែលសមត្ថកិច្ចនគរបាលខណ្ឌមានជ័យ បាននាំខ្លួនលោកផ្កាយ២និងកូនចៅ២នាក់ទៅដល់សាលាដំបូងរាជធានីភ្នំពេញ ដោយត្រូវបានលោកឡុង ជាប ព្រះរាជអាជ្ញារងកំពុងដំណើរសាកសួរតាមនីតិវិធី ។ សំណុំរឿងលោកផ្កាយ២និងកូនចៅ២នាក់នឹងបញ្ចូនទៅតុលាការរសៀលនេះ ខណៈយកសំណាករួចរាល់
ជនសង្ស័យទាំង៣នាក់ខាងលើ រួមមាន១-ឈ្មោះ អ៊ុង ចាន់ធួក ភេទប្រុស អាយុ៤៥ឆ្នាំ ជាម្ចាស់ទីតាំងផ្ទះជួល និងមានឋានៈអនុប្រធានសេនាធិការនៃអគ្គស្នងដ្ឋានការនគរបាលជាតិ ឋានន្តរស័ក្តិឧត្តមសេនីយ៍ទោ។ ២-ឈ្មោះ ឡាយ ភារុណ ភេទប្រុស អាយុ២៨ឆ្នាំ មុខរបរបំរើការងារនៅផ្ទះឈ្មោះ អ៊ុង ចាន់ធួក និង៣-ឈ្មោះ កុក ឃី ភេទប្រុស អាយុ ៣៥ឆ្នាំ មុខរបរបំរើការងារនៅផ្ទះ អ៊ុង ចាន់ធួក។ ដោយឡែក មនុស្សមួយចំនួនទៀត បានរត់ចូលផ្ទះជួលអស់ពេលសមត្ថកិច្ចទៅដល់។
សូមរំលឹកទៀតថា ពួកគេទាំង៣នាក់ ត្រូវបានកម្លាំងនគរបាលខណ្ឌមានជ័យ សហការជាមួយកម្លាំងអន្តរាគមន៍របស់អគ្គស្នងការដ្ឋាននគរបាលជាតិ ធ្វើការឃាត់ខ្លួន ក្រោយពួកគេបានរៀបចំកម្មវិធីផឹកស៊ីរាំរែក និងលេងប៉ាតម្សៅ ដោយមានការចូលរួមពីអ្នកផ្ទះជួលប្រមាណ ៣០ ទៅ៤០នាក់ កាលពីវេលាយប់ថ្ងៃទី១៦ ខែមេសា ឆ្នាំ២០២១ នៅក្នុងភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។
ចែករំលែកព័តមាននេះ