ខេត្តកំពង់ស្ពឺ៖ ព្រះសង្ឃចំនួនពីរអង្គត្រូវបានអាជ្ញាធរស្រុកបសេដ្ឋ និងមន្ទីរធម្មការខេត្តកំពង់ស្ពឺ សម្រេចចាប់ផ្សឹកកាលពីព្រឹកថ្ងៃទី១៧ មេសា ឆ្នាំ២០២១ ខណៈសមត្ថកិច្ចរកឃើញវត្ថុតាងមួយចំនួនក្រោយបំពានបម្រាមគោចរ ។
យោងតាមការឱ្យដឹងពីរដ្ឋបាលស្រុកបសេដ្ឋ លោកឈឺន សុធន បានប្រាប់ថា កាលពីយប់ថ្ងៃទី១៧ ខែមេសា ឆ្នាំ២០២១ វេលាម៉ោង១:១០នាទី គណៈបញ្ជាការឯកភាពរដ្ឋបាលស្រុកបានចុះពង្រឹង អនុវត្តសេចក្តីសម្រេចរបស់រាជរដ្ឋាភិបាលលេខ៤៤ សសរ ចុះថ្ងៃទី៦ ខែមេសា ឆ្នាំ២០២១ ស្តីពីការហាមឃាត់ការធ្វើដំណើរ និងការបិទរមណីយដ្ឋានទេសចរណ៍ទូទាំងប្រទេសជាបណ្ដោះអាសន្ន ដើម្បីទប់ស្កាត់ការរីករាលដាលជំងឺកូវីដ-១៩ ក្នុងភូមិសាស្ត្រស្រុកបសេដ្ឋ ខេត្តកំពង់ស្ពឺ និងសេចក្តីសម្រេចលេខ០៤៦ /២១សសរ ចុះថ្ងៃទី ១៥ ខែមេសា ឆ្នាំ២០២១ របស់រដ្ឋបាលខេត្តកំពង់ស្ពឺ ស្តីពីការបន្តអនុវត្តវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការរីករាលដាលជំងឺកូវីដ-១៩ នៅក្នុងភូមិសាស្ត្រខេត្តកំពង់ស្ពឺ ដោយបានឃាត់រថយន្ត២គ្រឿងរបស់ព្រះសង្ឃ ដែលបើកបរពីទិសខាងជើង ទៅទិសខាងត្បូងនៅចំណុចស្ពានអង្គដែកកណ្តាល ស្ថិតនៅភូមិអង្គដែកកណ្តាល ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ រួចបញ្ជូនទៅអធិការដ្ឋានដើម្បីសួរនាំ។
លោក ឈឺន សុធន បានបន្តថា ព្រះសង្ឃទាំង២អង្គដែលនិមន្តធ្វើដំណើរបំពានបម្រាមគោចរមានព្រះនាម ព្រះតេជគុណ នួន ចិន្តា ព្រះជន្ម ៣៩ព្រះវស្សា ជាចៅអធិការវត្ត មុន្នីសោភ័ណ្ឌ ស្ថិតនៅ ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ និងព្រះតេជគុណ ជឹង ម៉េងហៀក ព្រះជន្ម ៣៥ព្រះវស្សា ជាចៅអធិការវត្តសែនឧត្តម (បឹងសាឡាំ)ស្ថិតនៅ ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ។
ក្រោយសាកសួរព្រះសង្ឃជាចៅអធិការវត្តទាំងពីរនោះហើយ កម្លាំងនគរបាលស្រុកបានឆែកឆេររកឃើញតេឡេបញ្ជាមេអាប៉ោងមួយ មេអាប៉ោងចំនួន ៤គ្រាប់ នៅជាប់ខ្លួន ចានអាប៉ោងមួយ និងស្រាបៀ ៥កំប៉ុងនៅក្នុងរថយន្ត។ ក្រៅពីនោះ សមត្ថកិច្ចបានរកឃើញខោអាវចំនួន ១០គូ និងឯកសណ្ឋានមន្ត្រីនគរបាលមួយឈុតដែលមានឈ្មោះជាវរសេនីយ៍ត្រី នួន ចិន្តា កម្មសិទ្ធិព្រះចៅអធិការវត្តមុន្នីសោភ័ណ្ឌ ស្ថិតនៅ ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ។
សម្លៀកបំពាក់ទាំងអស់សម្រាប់ស្លៀកក្លែងភេទនៅពេលដែលនិមន្តទៅឆ្ងាយ និងប្រព្រឹត្តសកម្មភាពផ្សេងៗ។ ក្រោយរកឃើញវត្ថុតាងទាំងអស់ខាងលើគណៈបញ្ជាការឯកភាពរួមជាមួយមន្ទីរធម្មការ និងព្រះលេខាមេគុណខេត្តបានសម្រេចផ្សឹកទៅតាមនីតិវិធីពុទ្ធសាសនា និងបន្តតាមនីតិវិច្បាប់។ អតីតកាលទាំងពីរនេះ ត្រូវបានសង្ស័យផងដែរថា អាចនឹងឈាមទៅដល់ការលេងស្រីទៀតផងតែដោយយើងមិនមានភស្តុតាងជាក់ស្ដែងទើបបន្តិចសម្ដេចចប់ប្រកាន់របស់បងរ៉ានពោចិននិងលេងល្បែងស៊ីសងនិងក្លែងឯកសណ្ឋាន៕ ដោយ៖ វង្ស សន
ចែករំលែកព័តមាននេះ