ខេត្តបាត់ដំបង៖ ជនសង្ស័យចំនួន០២នាក់ ដែលជិះម៉ូតូឆ្វែលបំរុងធ្វើសកម្មភាពចូលលួចទ្រព្យសម្បត្តិនៅតាមបន្ទប់ផ្ទះជួល ហើយបានបន្សល់ទុកសកម្មភាពនៅក្នុងកាមេរ៉ាសុវត្ថិភាពយ៉ាងច្បាស់ក្រឡែត ត្រូវបានកម្លាំងការិយាល័យព្រហ្មទណ្ឌកំរិតស្រាល ធ្វើការស្រាវជ្រាវជាត់ខ្លួនបាន កាលពីរសៀលថ្ងៃទី១៦ មេសា នៅចំណុចភូមិរំចេក៣ សង្កាត់រតនៈ…
ខេត្តបាត់ដំបង៖ ជនសង្ស័យចំនួន០២នាក់ ដែលជិះម៉ូតូឆ្វែលបំរុងធ្វើសកម្មភាពចូលលួចទ្រព្យសម្បត្តិនៅតាមបន្ទប់ផ្ទះជួល ហើយបានបន្សល់ទុកសកម្មភាពនៅក្នុងកាមេរ៉ាសុវត្ថិភាពយ៉ាងច្បាស់ក្រឡែត ត្រូវបានកម្លាំងការិយាល័យព្រហ្មទណ្ឌកំរិតស្រាល ធ្វើការស្រាវជ្រាវជាត់ខ្លួនបាន កាលពីរសៀលថ្ងៃទី១៦ មេសា នៅចំណុចភូមិរំចេក៣ សង្កាត់រតនៈ ក្រុងបាត់ដំបង។
ប្រធានការិយាល័យព្រហ្មទណ្ឌកំរិតស្រាល លោកឈឿង គឹមសុង បានឲ្យដឹងថា ជនសង្ស័យទាំង០២នាក់ ម្នាក់ឈ្មោះ សុខ វ៉ាន់សួរ ហៅជា ក្បាលគោ អាយុ៤០ឆ្នាំ រស់នៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង ជននេះទើបចេញពីគុកប្រហែលជាង១ខែ និង ម្នាក់ទៀតឈ្មោះ គា ឆានី អាយុ៣០ឆ្នាំ នៅភូមិរំចេក៤ សង្កាត់រតនៈ។
លោកបានប្រាប់ថា ជនទាំង០២នាក់នេះ បានជិះម៉ូតូឆ្វែលចូលបរិវេណបន្ទប់ផ្ទះជួល មួយកន្លែងបំរុងធ្វើសកម្មភាពចូលលួចទ្រព្យសម្បត្តិ កាលវេលាម៉ោង១និង១៦នាទីរំលងអាធ្រាត្រឈានចូលថ្ងៃទី១៤ មេសា នៅចំណុចភូមិកម្មករ សង្កាត់ស្វាយប៉ោ
ក្រុងបាត់ដំបង តែមិនអាចធ្វើសកម្មភាពបានសម្រេច ដោយសារម្ចាស់បន្ទប់ភ្ញាក់ដឹងខ្លួនទាន់ ទើបជនទាំង០២នាក់ផ្អើលជិះម៉ូតូគេចខ្លួនបាត់ តែសកម្មភាពពួកគេ បានជាប់នៅក្នុងកាមេរ៉ាសុវត្ថិភាព។
ម្ចាស់បន្ទប់ជួលឈ្មោះ ទិត្យ សុជាតិ ស្រីអាយុ៣៩ឆ្នាំ បាននិយាយប្រាប់សមត្ថកិច្ចថា នៅយប់កើតហេតុនោះ គាត់បានឮសម្លេងម៉ូតូជិះចេញចូល ឆ្វែលទៅ ឆ្វែលមកជាច្រើនត្រឡប់ ខុសពីប្រក្រតី។ គ្រានោះគាត់ក៏ភ្ញាក់ពីដំណេកអើតមើល ស្រាប់តែឃើញជនសង្ស័យ០២នាក់ជិះម៉ូតូចូលក្នុងបរិវេណផ្ទះជួលដែលគួរឲ្យសង្ស័យ ហើយគាត់ក៏ស្រែកផ្អើលឆោឡោ ធ្វើឲ្យជន០២នាក់នោះជិះម៉ូតូចេញទៅបាត់។
ប៉ុន្តែគាត់បានបញ្ជាក់ថា ជនទាំង០២នាក់នោះ ពានយកក្រណាត់ទៅគ្របពីលើកញ្ចក់កាមេរ៉ាសុវត្ថិភាពមួយកន្លែង ធ្វើឲ្យបាំងជិតមើលពួកគេមិនឃើញ តែនៅមានកាមេរ៉ាដទៃទៀត បានថតជាប់ជនទាំង០២នាក់យ៉ាងច្បាស់ពេលពួកគេជិះម៉ូតូចាកចេញ។
លោក ឈឿង គឹមសុង បាននិយាយថា ក្រោយពីពិនិត្យរូបភាពលើកាមេរ៉ាសុវត្ថិភាព ហើយកំណត់បាននូវមុខសញ្ញាជនសង្ស័យទាំង០២នាក់ ទើបលោកស្នងការបញ្ជាឲ្យលោកដឹកនាំកម្លាំងធ្វើការស្រាវជ្រាវរហូតឈានដល់ការឃាត់ខ្លួនបានទាំង០២នាក់តែម្ដង។
លោកបាននិយាយទៀតថា ជាមួយនឹងការឃាត់ខ្លួន មន្ត្រីរបស់លោកដកហូតបានវត្ថុតាងមួយចំនួន ដូចរូបភាព ដែលជាប់នៅក្នុងកាមេរ៉ាសុវត្ថិភាព។ ដូចជា ម៉ូតូមួយគ្រឿងម៉ាកហុងដាឌ្រីម សេ១២៥ ពណ៏ខ្មៅ ស៊េរីឆ្នាំ២០២០ ពាក់ស្លាកលេខ បាត់ដំបង 1AL 6678 ដែលជនទាំង០២ជិះធ្វើសកម្មភាព មួកកាតិបពណ៏ក្រហម និង សម្ភារៈមួយចំនួនទៀត។
លោកឈឿង គឹមសុង ក៏បានបញ្ជាក់បន្ថែមថា បើតាមការស្រាវជ្រាវ ជនសង្ស័យទាំង០២នាក់នេះជាមុខសញ្ញាប្រព្រឹត្តអំពើចោរកម្ម យ៉ាងសកម្មបំផុតនាពេលកន្លងមក។ មិនតែប៉ុណ្ណោះ ជនម្នាក់ឈ្មោះ សុខ វ៉ាន់សួរ ហៅ ជា ក្បាលគោ ជាអតីតទណ្ឌិតដែលធ្លាប់ជាប់គុកច្រើនលើក ហើយចុងក្រោយជននេះទើបចេញពីគុកបានប្រហែលជាង១ខែប៉ុណ្ណោះ តែមិនរាងចាល ឥឡូវត្រូវចូលគុកជាថ្មីទៀត។
បើទោះជាធ្វើសកម្មភាពលួច មិនទាន់បានសម្រេចក្ដី លោកគឹមសុង បានបញ្ជាក់ថា ជនសង្ស័យទាំង០២នាក់ ត្រូវបានលោកស្នងការខេត្ត និង លោកព្រះរាជអាជ្ញា បញ្ជាឲ្យសួរនាំ និង កសាងសំណុំរឿងបញ្ជូនពួកគេទៅកាន់សាលាដំបូងខេត្ត នៅព្រឹកថ្ងៃទី១៧ មេសានេះហើយ៕ ដោយ៖ ឆោម ពិសម័យ
ចែករំលែកព័តមាននេះ