ភ្នំពេញ៖ ស្ថានទូតចិន ប្រចាំកម្ពុជា បានប្រកាសនៅថ្ងៃទី១៦ ខែមេសានេះថា វ៉ាក់សាំងចិន Sinovac ដែលជាការបញ្ជាទិញជំហានទីពីររបស់រាជរដ្ឋាភិបាលកម្ពុជា ចំនួន ៥០ម៉ឺនដូស នឹងដឹកជញ្ជូនមកដល់អាកាសយានដ្ឋានអន្តរជាតិរាជធានីភ្នំពេញ នាថ្ងៃទី១៧ ខែមេសាខាងមុខនេះ។
ស្ថានទូតចិន បន្ថែមថា ទោះបីជាប្រទេសចិន ស្ថិតក្នុងស្ថានភាព ដែលមានតម្រូវការវ៉ាក់សាំងក៏ដោយ ក៏នៅតែបន្តផ្តល់ទៅតាមតម្រូវការបញ្ជាទិញរបស់ភាគីកម្ពុជាដែរ។ នេះបានបង្ហាញយ៉ាងច្បាស់អំពីចំណងមិត្តភាពដែកថែប ប្រៀបដូចបងប្អូនរវាងប្រទេសទាំងពីរ។ សង្ឃឹមថា វ៉ាក់សាំងចិន អាចរួមចំណែកយ៉ាងសកម្មជូនដល់ប្រជាជនកម្ពុជា ក្នុងកិច្ចការប្រយុទ្ធប្រឆាំងជំងឺវីរុសកូវីដ-១៩។
អ្នកព័ត៌មានកាសែតចិន ប្រចាំកម្ពុជា បានឲ្យដឹងថា វ៉ាក់សាំង ស៊ីណូវ៉ាក់ ៥០ម៉ឺនដូសនេះ នឹងដឹកតាមយន្តហោះ មកដល់អាកាសយានដ្ឋានអន្តរជាតិភ្នំពេញ នៅម៉ោង ១០ព្រឹក ថ្ងៃទី១៧ ខែមេសាស្អែកនេះ។
យ៉ាងណាក៏ដោយ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ដែលជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស បានប្រាប់អ្នកកាសែតថា ក្នុងពេលវ៉ាក់សាំងកូវីដ១៩ ស៊ីណូវ៉ាក់ ៥០ម៉ឺនដូស មកដល់នៅព្រឹកថ្ងៃទី១៧មេសាស្អែកនេះ នឹងមិនមានពិធីទទួលអ្វីទេ។ ប៉ុន្តែលោកជំទាវ បានប្រកាសឲ្យអ្នកកាសែត រង់ចាំដល់ថ្ងៃទី២៧មេសា ប្រហែលជាមានពិធីប្រគល់ និងទទួលវ៉ាក់សាំងកូវីដ១៩ ប្រភេទ ស៊ីណូហ្វាម ដែលចិន គ្រោងនឹងផ្តល់ឲ្យកម្ពុជា បន្ថែមចំនួន ៤០ម៉ឺនដូសទៀត។
ពាក់ព័ន្ធវ៉ាក់សាំងជំនួយជាលើកទី៣ ដល់កម្ពុជានេះ ស្ថានទូតចិនប្រចាំកម្ពុជា បានប្រកាសថា ដើម្បីគាំទ្ររាជរដ្ឋាភិបាលកម្ពុជា ក្នុងកិច្ចប្រយុទ្ធប្រឆាំងជំងឺវីរុសកូវីដ-១៩ រដ្ឋាភិបាលចិនសម្រេចផ្តល់ជំនួយឥតសំណងជាវ៉ាក់សាំងកូវីដ Sinopharm ចំនួន ៤០ ម៉ឺនដូសបន្ថែមទៀតដល់ភាគីកម្ពុជា។ វ៉ាក់សាំងទាំងនេះ នឹងដឹកជញ្ជូនមកដល់ប្រទេសកម្ពុជា នាចុងខែមេសាខាងមុខនេះ តាមរយៈជើងហោះហើរពាណិជ្ជកម្ម។
សូមរម្លឹកថា កាលពីថ្ងៃទី៧ ខែកុម្ភៈ ឆ្នាំ២០២១ ចិនបានផ្តល់វ៉ាក់សាំងលើកដំបូងដល់កម្ពុជា ប្រភេទ Sinopharm ចំនួន ៦០ម៉ឺនដូស។ នៅថ្ងៃទី២៦ ខែមីនា វ៉ាក់សាំង Sinovac ចំនួន ១លាន ៥សែនដូស ដែលកម្ពុជា ទិញពីចិន ត្រូវបានដឹកមកដល់ភ្នំពេញ។ កាលពីយប់ថ្ងៃទី៣១ ខែមីនា ឆ្នាំ២០២១ ជំនួយវ៉ាក់សាំងរបស់ចិន Sinopharm ចំនួន ៧០ម៉ឺនដូស ត្រូវបានដឹកមកដល់កម្ពុជា។
កាលពីថ្ងៃទី២ ខែមីនា ឆ្នាំ២០២១ កម្ពុជាបានទទួលជំនួយពីអង្គការសុខភាពពិភពលោក ប្រភេទ AstraZeneca ផលិតនៅប្រទេសឥណ្ឌា ចំនួន ៣២៤ ០០០ដូស។
នៅពេលទទួលបានវ៉ាក់សាំងទាំងនោះភ្លាម កម្ពុជាបានដំណើរការចាក់វ៉ាក់សាំងដល់ជនអាទិភាពនៅទូទាំងប្រទេស ហើយចុងក្រោយនេះ បានចាក់ជូនប្រជាជនសាមញ្ញក្នុងរាជធានីភ្នំពេញ ខេត្តកណ្តាល និងខេត្តព្រះសីហនុ។ គិតត្រឹមថ្ងៃទី១៥មេសា កម្ពុជាបានចាក់វ៉ាក់សាំងបង្ការជំងឺកូវីដ-១៩ បាន ១ ២២៣ ៣២២ នាក់ហើយ។
ជុំវិញវ៉ាក់សាំងបង្ការជំងឺកូវីដ១៩ ត្រូវបានសម្តេចតេជោ ហ៊ុន សែន បានប្រកាសកាលពីថ្ងៃទី១០ ខែមេសា ឆ្នាំ២០២១ ថា គិតចាប់ពីថ្ងៃទី១៧ ខែមេសា រហូតដល់ខែសីហា ឆ្នាំ២០២១ កម្ពុជានឹងទទួលបានវ៉ាក់សាំងសរុប ៨លានដូស ក្នុងនោះ រួមមាន៖ ថ្ងៃទី១៧មេសា ចំនួន ៥០ម៉ឺនដូស ខែឧសភា ចំនួន ១លាន ៥សែនដូស ខែមិថុនា ចំនួន ៣លានដូស ខែកក្កដាចំនួន ២លានដូស និងខែសីហា ចំនួន ១លានដូស៕
ចែករំលែកព័តមាននេះ