ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានដាក់ចេញនូវបម្រាមគោចរណ៍ហាមប្រាមការធ្វើដំណើរ និងការធ្វើអាជីវកម្មលក់ដូរជាពិសេសការលក់ដូរគ្រឿងស្រវឹងនៅពេលយប់ជាបណ្តោះអាសន្ន រយៈពេលពី៥ថ្ងៃទៅ៧ថ្ងៃ ចាប់ពីថ្ងៃទី១៤ ដល់ថ្ងៃទី២០ មេសា២០២១ ។ ដោយភ្ជាប់ជាមួយនឹងការដាស់តឿនដល់សាធារណជនប្រជាពលរដ្ឋ…
ខេត្តស្ទឹងត្រែង ៖ រដ្ឋបាលខេត្តស្ទឹងត្រែងបានដាក់ចេញនូវបម្រាមគោចរណ៍ហាមប្រាមការធ្វើដំណើរ និងការធ្វើអាជីវកម្មលក់ដូរជាពិសេសការលក់ដូរគ្រឿងស្រវឹងនៅពេលយប់ជាបណ្តោះអាសន្ន រយៈពេលពី៥ថ្ងៃទៅ៧ថ្ងៃ ចាប់ពីថ្ងៃទី១៤ ដល់ថ្ងៃទី២០ មេសា២០២១ ។
ដោយភ្ជាប់ជាមួយនឹងការដាស់តឿនដល់សាធារណជនប្រជាពលរដ្ឋ អ្នកដំណើរ ក្រុមហ៊ុន ម្ចាស់អាជីវកម្ម ម្ចាស់រថយន្តដឹកជញ្ជូន អាជីវកម្មរមណីដ្ឋាន និងគ្រប់ផ្នែកពាក់ព័ន្ធទាំងអស់ ឲ្យចូលរួមអនុវត្តវិធានការសុខាភិបាល និងវិធានការរដ្ឋបាលក្នុងគោលដៅធានាការទប់ស្កាត់ការឆ្លងជំងឺកូវីដ១៩ ចូលមូលដ្ឋានភូមិសាស្ត្រខេត្តស្ទឹងត្រែង ដើម្បីការពារអាយុជីវិតប្រជាជន សុខភាពសាធារណៈ និងសន្តិសុខសាធារណៈ ។
ក្រោយការដាក់ចេញ នូវបម្រាមគោចរណ៍នេះ កម្លាំងកងរាជអាវុធហត្ថខេត្ត បានសហការជាមួយ កម្លាំងស្នងការដ្ឋាននគរបាលខេត្ត ដែលមានការចូលរួមពីមន្ត្រីខេត្ត និងក្រុងស្ទឹងត្រែង ចាប់ពីយប់ថ្ងៃទី១៤មេសាឆ្នាំ២០២ ១ បានដាក់ពង្រាយកម្លាំងក្នុងក្រុង ដើម្បីអនុវត្តវិធានការសុខាភិបាល និងវិធានការរដ្ឋបាល ដោយបិទការធ្វើដំណើរក្នុងខេត្ត ចាប់ពីម៉ោង៨យប់ រហូតដល់ម៉ោង៥ភ្លឺ ដែលការហាមប្រាមនោះនឹងអនុវត្តចាប់ពីថ្ងៃទី១៤ មេសា រហូតដល់ថ្ងៃទី២០ មេសា ឆ្នាំ២០២១ ជាបណ្តោះអាសន្ន ។
នៅក្នុងសកម្មភាពនោះត្រូវគេឃើញកម្លាំងសមត្ថកិច្ច ដែលជាមន្ត្រីអនុវត្តច្បាប់បានឃាត់យានយន្តគ្រប់ប្រភេទដែលបានធ្វើចរាចរណ៍លើសម៉ោងកំណត់នៅពេលយប់នៅក្នុងក្រុងស្ទឹងត្រែង និងមន្ត្រីជំនាញបានអនុវត្តវិធានការរដ្ឋបាលដោយបានធ្វើការពន្យល់ ណែនាំដល់ប្រជាពលរដ្ឋ អ្នកដំណើរ អំពីគោលបំណង នៃការដាក់បម្រាមគោចរណ៍របស់ រដ្ឋបាលខេត្តស្ទឹងត្រែង ។
រដ្ឋបាលខេត្តស្ទឹងត្រែង បានចេញលិខិត លេខ២២២/២១ ស ជ ណ ចុះថ្ងៃទី១៥មេសាឆ្នាំ២០២១ ជូនដំណឹងដល់ អភិបាល នៃគណៈអភិបាលក្រុង-ស្រុក ដែលជាប្រធានគណៈបញ្ជាការឯកភាពរដ្ឋបាលក្រុង-ស្រុកទាំង ៦ ស្តីពីការអនុវត្តវិធានការរដ្ឋបាល ដើម្បីផ្អាកពីការលក់ដូរគ្រឿងស្រវឹងគ្រប់ប្រភេទ នៅក្នុងមូលដ្ឋាន នៃដែនសមត្ថកិច្ចរដ្ឋបាលក្រុង-ស្រុក ដែលខ្លួនគ្រប់គ្រង និងសេចក្តីសម្រេចលេខ០៣៥/២១ សសរ ចុះថ្ងៃទី១៣ មេសា ឆ្នាំ២០២១ ដែលបានដាក់ចេញគោលការណ៍អនុវត្តវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ១៩ នៅក្នុងភូមិសាស្ត្រខេត្ត មានរយៈពេល ១សប្តាហ៍ ចាប់ពីថ្ងៃទី១៤មេសា ដល់ថ្ងៃទី២០មេសាឆ្នាំ២០២១ ។
មន្ត្រីអ្នកនាំពាក្យរដ្ឋបាលខេត្តស្ទឹងត្រែង លោក ម៉ែន គង់ ដែលជានាយករងរដ្ឋបាលខេត្ត ឲ្យដឹងថា ការដាក់ចេញនូវបម្រាមគោចរនេះបានធ្វើឡើង បន្ទាប់ពីទទួលបានប្រសាសន៍ណែនាំដ៏ខ្ពង់ខ្ពស់របស់ សម្តេចតេជោ នាយករដ្ឋមន្ត្រី តាមការចាំបាច់ និងការងារបន្ទាន់របស់ រដ្ឋបាលខេត្តស្ទឹងត្រែង ដោយតម្រូវឲ្យផ្អាកជាបណ្តោះអាសន្ន ចំពោះសកម្មភាពអាជីវកម្មលក់ដូរ តូបអាហារ ភេសជ្ជៈ អាហារដ្ឋាន ភោជនីយដ្ឋាន ហាងកាហ្វេ ហាងភេសជ្ជៈ និងភោជនីយដ្ឋាននៅតាមផ្ទះសំណាក់ ឬសណ្ឋាគារជាដើម។ល។
អតិថិជនចូមកទទួលទានអាហារ ភេសជ្ជៈ និងការទទួលទានគ្រឿងស្រឹវឹង ចាប់ពីម៉ោង ៨យប់ ដល់ម៉ោង ៥ទៀបភ្លឺ ដោយអនុវត្តចាប់ពីថ្ងៃទី១៤ មេសា ដល់ថ្ងៃទី២០ មេសា ឆ្នាំ២០២១ ជាការកំណត់ ។ ប៉ុន្តែ ក៏មានការលើកលែងចំពោះការជួបជុំរៀបចំពិធីបុណ្យសព ដោយត្រូវគោរពតាមការណែនាំរបស់អាជ្ញាធរមានសមត្ថកិច្ច ការជួបជុំរបស់មន្ត្រីសុខាភិបាល និងមន្ត្រីមានសមត្ថកិច្ច ដែលបំពេញភារកិច្ច និងកាតព្វកិច្ច ការជួបជុំ ដែលមានគោលដៅបម្រើផលប្រយោជន៍សង្គម និងការជួបក្នុងភាពចាំបាច់មួយចំនួនទៀត តាមការកំណត់របស់អាជ្ញាធរមានសមត្ថកិច្ច ។
លោក ម៉ែន គង់ នាយករងរដ្ឋបាលខេត្តស្ទឹងត្រែង បានបញ្ជាក់ថា រាល់ការអនុវត្តវិធានការរដ្ឋបាល ប្រសិនបើមានបុគ្គលណាមួយ មិនព្រមអនុវត្តតាមការណែនាំរបស់ អាជ្ញាធរមានសមត្ថកិច្ច បុគ្គលនោះនឹងទទួលការផាកពិន័យអន្តរការណ៍ ដែលស្របតាមស្មារតី នៃប្រកាសអន្តរក្រសួង លេខ ១០៤៥ ប្រក ចុះថ្ងៃទី៨មេសាឆ្នាំ២០២១ របស់ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ និងបទបញ្ញត្តិច្បាប់ លិខិតបទដ្ឋានគតិយុត្តជាធរមាន ។
លោកបានបញ្ជាក់ទៀតថា ការដាក់ចេញនូវសេចក្តីសម្រេចរបស់ រដ្ឋបាលខេត្តនាពេលនេះ គឺដើម្បីធានាការទប់ស្កាត់ការឆ្លងរាលដាលជំងឺកូវីដ១៩ និងដើម្បីការពារអាយុជីវិតប្រជាជន សុខភាពសាធារណៈ និងសន្តិសុខសាធារណៈនៅក្នុងមូលដ្ឋានភូមិសាស្ត្រខេត្តស្ទឹងត្រែង ស្របពេលដែលរាជធានី-ខេត្តមួយចំនួនកំពុងបន្តរីករាលដាលជំងឺកូវីដ១៩ នៅក្នុងសហគមន៍ គួរឲ្យព្រួយបារម្ភបំផុត បើទោះបីខេត្តស្ទឹងត្រែង ពុំទាន់មានអ្នកវិជ្ជមានមេរោគកូវីដ១៩ ក៏មែនពិត ៕
ចែករំលែកព័តមាននេះ