ខេត្តប៉ៃលិន ៖ យុវជនម្នាក់បានរងរបួសធ្ងន់ សន្លប់បាត់ស្មារតីនៅក្រោមដើមឈើ លុះដឹងខ្លួនឡើងស្រែកឱ្យគេជួយ ខណៈជនរងគ្រោះនិងមិត្តភក្តិនាំគ្នាចូលទៅក្នុងព្រៃជ្រៅ ដើម្បីដើរបេះបន្លែ និងផ្លែឈើព្រៃ យកទៅលក់នៅតាមភូមិដូចសព្វដង លុះពេលជនរងគ្រោះដើរបែកពីក្រុម ក៏ឡើងលើដើមពង្រព្រៃខ្ពស់១ដើម ដែលមានកំពស់ជាង១០ម៉ែត្រ ដើម្បីបេះផ្លែឈើ ស្រាប់តែជាន់ប៉ះចំមែកងា.ប់ បណ្តាលឱ្យបាក់ធ្លាក់មកដីសន្លប់ម្នាក់ឯង អស់រយ:ពេលយូរ លុះដឹងខ្លួន ក៏ស្រែកហៅក្រុមគ្រួសារ ឱ្យដឹកយកទៅសង្គ្រោះនៅមន្ទីរពេទ្យបង្អែកខេត្តប៉ៃលិន តែដោយសារសភាពធ្ងន់ធ្ងរពេក គ្រូពេទ្យបានរៀបចំឯកសារបញ្ជូនបន្តទៅមន្ទីរពេទ្យខេត្តបាត់ដំបង ។
ហេតុការណ៍ខាងលើនេះបានកើតឡើងកាលពីវេលាម៉ោងប្រហែល៩និង៣០នាទីព្រឹកថ្ងៃទី១៤ ខែមេសា ឆ្នាំ២០២១ ដោយរកឃើញជនរងគ្រោះនៅវេលាម៉ោងប្រហែល៣និង៣០នាទីរសៀលថ្ងៃដដែល ស្ថិតនៅចំណុចស្លេវ ក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
តាមប្រភពព័ត៌មានពីបុរសជាឪពុកបានឱ្យដឹងថា ជនរងគ្រោះឈ្មោះ ឃុន ឡយ ភេទប្រុស អាយុ២០ឆ្នាំ រងរបួសធ្ងន់ផ្នែកខាងក្រោយ រស់នៅចំណុចភ្នំដំបង ក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
តាមប្រភពដដែលបានបន្តថា មុនពេលកើតហេតុ ជនរងគ្រោះខាងលើ បានបបួលនាំមិត្តភក្តិក្នុងភូមិដើរទៅរកបេះបន្លែ និងផ្លែឈើព្រៃ តាំងពីព្រឹកព្រលឹម ដើម្បីយកមកលក់នៅក្នុងភូមិដូចសព្វដង ។ ពេលចូលទៅដល់ក្នុងព្រៃជ្រៅ ជនរងគ្រោះបានដើរបែកចេញពីក្រុម ហើយក៏ឡើងទៅលើដើមពង្រ១ដើម ដែលមានកំពស់១២ម៉ែត្រ លុះឡើងបានត្រឹមតែកម្ពស់៩ម៉ែត្រ ស្រាប់តែជាន់ប៉ះចំមែកឈើងា.ប់ ស្រាប់តែបាក់ធ្លា.ក់ចុះមកក្រោមប៉ះទង្គិចនឹងដុំថ្ម បណ្តាលឱ្យសន្លប់ស្តូកស្តឹងនៅនឹងកន្លែង ។
តាមប្រភពដដែលបានបន្តទៀតថា នៅពេលបាត់កូនមិនឃើញត្រឡប់មកផ្ទះវិញ គាត់ក៏បានសួរនាំមិត្តភក្តិ ដែលដើរទៅជាមួយ ដោយគេប្រាប់ថា បែកផ្លូវគ្នា ហើយនឹកស្មានតែដើរត្រឡប់មកផ្ទះវិញមុនហើយ ព្រោះដល់ម៉ោង១១ព្រឹកគេនាំគ្នាត្រឡប់មកវិញ ។ លុះដើររករហូតដល់ម៉ោង៣រសៀល ស្របពេលនោះគេបានឮសម្លេងកូនគាត់ស្រែកហៅល្វើយៗចេញពីក្នុងព្រៃ គាត់ក៏ដើរសំដៅទៅឃើញកូនប្រុសកំពុងតែដេករងរបួសនៅក្រោមដើមពង្រ បង្កឱ្យមានការភ្ញាក់ផ្អើល រួចនាំគ្នាយកអង្រឹងសែងយកមកផ្ទះ ដើម្បីដឹកយកទៅសង្គ្រោះនៅមន្ទីរពេទ្យខេត្តតែម្តង ។
លោក គឹម សំណាង ប្រធានមន្ទីរពេទ្យបង្អែកខេត្តប៉ៃលិន បានឱ្យដឹងដែរថា ជនរងគ្រោះ ខាងលើ ពិតជាមានសភាពធ្ងន់ធ្ងរ ផ្នែកខាងក្រោយ អាចនឹងបាក់ឆ្អឹងចង្កេះ ខណ:ធ្លា.ក់ពីលើដើមឈើខ្ពស់ បុកទង្គិចប៉ះចំដុំថ្មនៅខាងក្រោម ទើបក្រោយពីពិនិត្យ និងព្យួរសេរ៉ូមឱ្យមានកម្លាំងរួចមក ក្រុមគ្រូពេទ្យបានរៀបចំឯកសារ ដើម្បីនឹងបញ្ជូនបន្តទៅសង្គ្រោះនៅមន្ទីរពេទ្យខេត្តបាត់ដំបង ៕
ចែករំលែកព័តមាននេះ