រាជធានីភ្នំពេញ ៖ កាលពីល្ងាចម្សិលមិញ ថ្ងៃទី១៤ មេសា ឆ្នាំ២០២១ កន្លងទៅនេះ គេសង្កេតឃើញបងប្អូនប្រជាពលរដ្ឋគ្រប់ទិសទីបាននាំគ្នាសម្រុកទិញ ម្ហូបអាហារ ត្រី…
រាជធានីភ្នំពេញ ៖ កាលពីល្ងាចម្សិលមិញ ថ្ងៃទី១៤ មេសា ឆ្នាំ២០២១ កន្លងទៅនេះ គេសង្កេតឃើញបងប្អូនប្រជាពលរដ្ឋគ្រប់ទិសទីបាននាំគ្នាសម្រុកទិញ ម្ហូបអាហារ ត្រី សាច់ អង្ករ និងចំណីចំណុកផ្សេងៗ យ៉ាងណែនណាន់តាន់តាប់បំផុត ក្រោយពេលបែកធ្លាយសារសំឡេងបិទក្រុងភ្នំពេញ បង្កការព្រួយបារម្ភដល់បងប្អូនប្រជាពលរដ្ឋ ម្ល៉ោះហើយទើបម្នាក់ៗភ្លេចរក្សាគម្លាតសុវត្ថិភាព សម្រុកជុំគ្នាទៅតំបន់មនុស្សច្រើន ដើម្បីទិញអីវ៉ាន់ ដែលនេះជាហានិភ័យមួយទៀត ដោយមិនដឹងថា អ្នកណាមានផ្ទុក ឬមិនផ្ទុកជំងឺកូវីដ១៩ ឡើយ។
បន្ទាប់ពីឃើញហេតុការណ៍ខាងលើនេះកើតឡើង លោកណុប បាយ៉ារិទ្ឋ ដែលជាសះស្បើយពីជំងឺកូវីដ១៩ បានបង្ហោះសារមួយនៅលើបណ្តាញសង្គមហ្វ៊េសប៊ុកផ្ទាល់ខ្លួនថា «សូមកុំភ័យស្លន់ស្លោពេកបងប្អូន កុំជ្រួលច្របល់អី ជៀសវាងចប់ថ្ងៃវរៈឡើងស័ក ទៅជាថ្ងៃចត្តាឡីស័ក»។ លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានអំពាវនាវដល់បងប្អូនប្រជាពលរដ្ឋទាំងអស់ សុំរក្សាភាពស្ងប់ស្ងៀម ជាជាងសម្រុកទៅផ្សារដែលបង្កើតបានជាភាពកកកុញមនុស្សច្រើន ជម្រុញនូវហានិភ័យកាន់តែខ្ពស់ឡើងថែមទៀតដល់បងប្អូនក្នុងការឆ្លងវីរុសកូវីដ -១៩ ។
លោកបានបន្តថា «បងប្អូនអាចនឹងឆ្លងជំងឺកូវីដ-១៩ បានគ្រប់ពេល នៅពេលដែលនៅកន្លែងប្រជ្រៀតគ្នាខ្លាំងពេកនោះ ឫ កន្លែង ដែលមិនមានគម្លាតគ្នា ពីមួយម៉ែត្រកន្លះឡើង ហើយមិនមានពាក់ម៉ាស់និងលាងដៃញឹកញាប់ទេនោះ ។ សូមត្រូវចងចាំថាវីរុសកូវីដ -១៩ សប្បាយចិត្តខ្លាំង ចូលចិត្តខ្លាំង និងពេញចិត្តជាទីបំផុត ក្នុងការដើរចម្លងពីបុគ្គលម្នាក់ទៅម្នាក់ទៀតបានយ៉ាង ងាយស្រួល ដោយមិនមានរបាំងហាមឃាត់ ឫសម្លា.ប់វីរុសដ៏សាហាវនេះនោះ» ៕
ចែករំលែកព័តមាននេះ