រាជធានីភ្នំពេញ ៖ យោងតាមគណនេយ្យហ្វេសបុកផ្លូវការណ៍របស់លោកម៉េត មាសភក្តី អ្នកនាំពាក្យសាលារាជធានីភ្នំពេញ បានបង្ហោះសារ ជូនសាធារណជន និងបងប្អូនប្រជាពលរដ្ឋដែលមានចម្ងល់អំពីការបិទខ្ទប់រាជធានីភ្នំពេញ អាចចូលទៅក្នុង Link មួយដែលមានឈ្មោះ https://t.me/ppcityhall ដើម្បីអាជ្ញាធររាជធានីភ្នំពេញ ធ្វើការបកស្រាយចម្ងល់របស់បងប្អូន ។
ក្នុងអត្ថន័យសារដែលបង្ហោះលើបណ្តាញសង្គមហ្វេសបុកផ្ទាល់របស់លោកបានសរសេរថា « តើខ្ញុំអាចធ្វើដំណើរចេញពីផ្ទះទៅធ្វើការរកស៊ីបានទេ ? តើខ្ញុំអាចទៅផ្សារទិញម្ហូបអាហារបានទេ? តើខ្ញុំអាចចេញទៅចាក់វាំក់សាំងការពារកូវីដ-១៩បានទេ? បើបងប្អូនមានសំនួរពាក់ព័ន្ធការបិទខ្ទប់រាជធានីភ្នំពេញដើម្បីទប់ស្កាត់ការរីករាលដាលជំងឺកូវីដ-១៩ សូមចុច និងសួរនាំតាម Link នេះ https://t.me/ppcityhall។ យើងខ្ញុំរង់ចាំឆ្លើយតប ពន្យល់ និងជម្រាបជូន ដើម្បីស្រាយចម្ងល់របស់បងប្អូន។ សូមអរគុណ » ។
គួររំលឹកថា ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីយប់ថ្ងៃទី១៤ ខែមេសា ឆ្នាំ២០២១ បានចេញនូវសេចក្តីសម្រេច ស្តីពីការបិទខ្ទប់តំបន់ភូមិសាស្ត្ររាជធានីភ្នំពេញ ដើម្បីទប់ស្កាត់ នៃការរីករាលដាល នៃជម្ងឺកូវីដ១៩ ។ នៅក្នុងសេចក្តីសម្រេចនោះ មាន១០ប្រការ ដែលចែងអោយរដ្ឋបាលរាជធានីខេត្តដែលឋិតក្នុងតំបន់បិទខ្ទប់ត្រូវបំពេញ និងអនុវត្តអោយមានខ្ជាប់ខ្ជួន ។
សេចក្តីសម្រេចដដែលរបស់ប្រមុខរាជរដ្ឋាភិបាលកម្ពុជា ក៏អនុញ្ញាតអោយមានការបន្តដំណើរចូល ឬឆ្លងកាត់ តំបន់បិទខ្ទប់បាន ដោយការលើកលែងទាំងអស់នោះ មានចែងរួចជាស្រេច នៅក្នុងសេចក្តីសម្រេច ៕
ចែករំលែកព័តមាននេះ