ខេត្តបាត់ដំបង ៖ កម្លាំងការិយាល័យព្រហ្មទណ្ឌកំរិតស្រាលនៃស្នងការខេត្ត បានធ្វើការស្រាវជ្រាវតាមឃាត់ខ្លួនយុវជន១ក្រុមដែលស្ទាក់កប់កញ្ចក់រថយន្តអ្នកដំណើរពេលយប់បានចំនួន៥នាក់ជាបន្តបន្ទាប់ទៀត កាលពីថ្ងៃទី១១ និងថ្ងៃទី១២ ខែមេសា ថែមទាំងដកហូតបានកាំបិត និងកាំភ្លើងខ្លីប្រើហ្គាសចំនួន១ដើមទៀងផង។ លោក…
ខេត្តបាត់ដំបង ៖ កម្លាំងការិយាល័យព្រហ្មទណ្ឌកំរិតស្រាលនៃស្នងការខេត្ត បានធ្វើការស្រាវជ្រាវតាមឃាត់ខ្លួនយុវជន១ក្រុមដែលស្ទាក់កប់កញ្ចក់រថយន្តអ្នកដំណើរពេលយប់បានចំនួន៥នាក់ជាបន្តបន្ទាប់ទៀត កាលពីថ្ងៃទី១១ និងថ្ងៃទី១២ ខែមេសា ថែមទាំងដកហូតបានកាំបិត និងកាំភ្លើងខ្លីប្រើហ្គាសចំនួន១ដើមទៀងផង។
លោក ឈឿង គឹមសុង នាយការិយាល័យព្រហ្មទណ្ឌកំរិតស្រាល បានឱ្យដឹងថា ជនទំនើងទាំង០៥នាក់នោះត្រូវបានកម្លាំងជំនាញរបស់លោកធ្វើការស៊ើបអង្កេតរហូតឈានដល់ការឃាត់ខ្លួនបានជាបន្តបន្ទាប់ ក្រោយពីឃាត់ខ្លួនជនដៃដល់បានម្នាក់កាលពីជាងមួយសប្ដាហ៍មុន។
លោកឈឿង គឹមសុង បានប្រាប់ថា នៅថ្ងៃទី១១ ខែមេសា កម្លាំងរបស់លោកឃាត់ខ្លួនបាន៣នាក់ គឺ១.ឈ្មោះ សម្បត្តិ រតន: ហៅ ណាក់ អាយុ២២ឆ្នាំ នៅភូមិទូលតាឯក សង្កាត់ទូលតាឯក កក្រុងបាត់ដំបង ២.ឈ្មោះ ហេង ទិត្យា ហៅ ចិន អាយុ១៩ឆ្នាំ នៅភូមិតាកុក ឃុំនរា ស្រុមសង្កែ និង៣.ឈ្មោះ ធឿន លីហុង ហៅ ព្រំ អាយុ២០ឆ្នាំ នៅភូមិស្ដីលើ ឃុំព្រែកហ្លូង ស្រុកឯកភ្នំ។
ក្រោយពីធ្វើការសួរនាំរួច នៅថ្ងៃទី១២ មេសា កម្លាំងរបស់លោកបានទទួលបញ្ជាពីលោកស្នងការ និងលោកព្រះរាជអាជ្ញា ឱ្យតាមឃាត់ខ្លួនបក្សពួកក្រុមនេះបានចំនួន២នាក់ទៀត គឺឈ្មោះ ណន និត ហៅ នឹម អាយុ២០ឆ្នាំ នៅឃុំជ្រៃ ស្រុកថ្មគោល និង ឈ្មោះច័ន្ទ សិលា អាយុ១៦ឆ្នាំ នៅភូមិត្រាង ឃុំអូរតាគី ស្រុកថ្មគោល។
លោកបានបញ្ជាក់ថា ក្រុមខាងលើនេះគឺជាបក្សពួករបស់ជនម្នាក់ដែលកម្លាំងរបស់លោកឃាត់បានកាលពីជាងមួយសប្ដាហ៍មុន ដែលពាក់ព័ន្ធនឹងករណីស្ទាក់គប់កញ្ចក់រថយន្តអ្នកដំណើរពេលយប់ នៅតាមផ្លូវជាតិលេខ៥ នៅក្នុងភូមិសាស្ត្រព្រំប្រទល់ក្រុងបាត់ដំបង ដល់ទឺកដីឃុំជ្រៃ ស្រុកថ្មគោល ដែលធ្វើឱ្យខូចខាតកញ្ចក់រថយន្តអស់ជាច្រើនគ្រឿង ហើយភាគច្រើនគឺជារថយន្តដឹកទំនិញ។
បើតាមរបាយការណ៍របស់សមត្ថកិច្ចបានឱ្យដឹងថា ជាមួយនឹងការឃាត់ខ្លួននេះ មន្ត្រីការិយាល័យជំនាញដកហូតបានកាំបិតចំនួន០៣ដើម កាំភ្លើងខ្លីប្រើហ្គាសបាញ់គ្រាប់កង់ចំនួន០១ដើម ថ្នាំញៀនប្រភេទ ICE (ម៉ាទឹកកក) ចំនួន០៣កូនថង់ ម៉ូតូចំនួន០២គ្រឿង និងសម្ភារ:ប្រើប្រាសគ្រឿងញៀនមួយចំនួនទៀត។
ហើយនៅចំពោះមុខសមត្ថកិច្ចនិងវត្ថុតាងបែបនេះ ក្រុមយុវជនទាំងនេះក៏បានសារភាពថា «កន្លងមក ពួកខ្លួនពិតជាធ្លាប់បានស្ទាក់គប់កញ្ចក់រថយន្តអ្នកដំណើរពេលយប់នៅតំបន់ខាងលើមែន។ ហើយរាល់សកម្មភាព ពេលខ្លូន និងពួកខ្លួនជិះតាមគប់កញ្ចក់រថយន្ត គឺពេលខ្លះពូនចាំគប់ក្បែរចិញ្ចើមថ្នល់ ហើយពេលខ្លួនពួកខ្លួនជិះម៉ូតូតាកកាប់បំបែកកញ្ចក់រថយន្តតែម្ដង។ ពួកគេគ្មានគំនុំជាមួយម្ចាស់រថយន្តទេ តែពួកគេតាម ឬពូនស្ទាក់គប់រថយន្តជាល្បែងកំសាន្តដៃ»។
លោកឈឿង គឹមសុង បាននិយាយថា ក្រុមនេះ មានបក្សពួកច្រើនណាស់ ហើយស្ទើរទាំងអស់សុទ្ធតែប្រើប្រាស់គ្រឿងញៀន។ លោកបានស្រង់ចម្លើយសាក្សីថា ពេលខ្លះក្រុមនេះ បានប្រើកាំភ្លើងខ្លីនោះដើរគំរាមគេឯងទៀតផង ពេលមានជម្លោះម្ដងៗ។ ទោះយ៉ាងណា ពេលនេះលោកស្នងការបានបញ្ជាឲ្យមន្ត្រីការិយាល័យជំនាញ រៀបចំសំណុំរឿងបញ្ជូនក្រុមទំនើងទាំងនេះទៅកាន់តុលាការហើយ៕
ចែករំលែកព័តមាននេះ