ខេត្តកំពត ៖ បើតាមសេចក្តីរាយការណ៍បានឱ្យដឹងថា មានការភ្ញាក់ផ្អើលមួយបានកើតឡើង ខណៈស្ត្រីម្នាក់ប្រុងបញ្ចប់ជីវិតខ្លួនឯង បន្ទាប់បានដឹងពីលទ្ធផលធ្វើតេស្តលើកទី២ គឺលទ្ធផលវិជ្ជមានកូវីដ១៩ បង្កឱ្យមានការភ្ញាក់ផ្អើលកាលពីល្ងាចថ្ងៃទី១២ ខែមេសា ឆ្នាំ២០២១…
ខេត្តកំពត ៖ បើតាមសេចក្តីរាយការណ៍បានឱ្យដឹងថា មានការភ្ញាក់ផ្អើលមួយបានកើតឡើង ខណៈស្ត្រីម្នាក់ប្រុងបញ្ចប់ជីវិតខ្លួនឯង បន្ទាប់បានដឹងពីលទ្ធផលធ្វើតេស្តលើកទី២ គឺលទ្ធផលវិជ្ជមានកូវីដ១៩ បង្កឱ្យមានការភ្ញាក់ផ្អើលកាលពីល្ងាចថ្ងៃទី១២ ខែមេសា ឆ្នាំ២០២១ ស្ថិតភូមិព្រៃក្រឡាខាងកើត ឃុំទូកមាសខាងលិច ស្រុកបន្ទាយមាស ខេត្តកំពត ។
សេចក្តីរាយការណ៍បន្តថា ស្ត្រីរូបនេះមានឈ្មោះ នេត សារឹម អាយុ៥០ឆ្នាំ រស់នៅភូមិព្រៃក្រឡាខាងកើត ឃុំទូកមាសខាងលិច ស្រុកបន្ទាយមាស ខេត្តកំពត។
សេចក្តីរាយការណ៍បន្តទៀតថា មុនពេលមានការភ្ញាក់ផ្អើលខាងលើនេះ គឺស្ត្រីឈ្មោះនេត សារឹម រួមទាំងប្ដីឈ្មោះ កន លាភ អាយុ៥១ឆ្នាំ បាននាំគ្នាទៅរកស៊ីនៅឯស្រុកថៃឯណោះ ប៉ុន្តែទាំង២នាក់ប្ដីប្រពន្ធក៏បានត្រឡប់មកស្រុកវិញ ហើយក៏ត្រូវរថយន្តរបស់យោធាបានដឹកមកដល់មណ្ឌល២ ដើម្បីធ្វើចត្តាឡីស័ក នៅវិទ្យាល័យព្រះរាជសំភា នៅជើងភ្នំកកេះ ក្នុងក្រុងកំពត ។
ប្រភពដដែលបន្តថា ការធ្វើតេស្តលើកទី១ នៅថ្ងៃទី២៨ មីនា ទាំង២នាក់ប្ដីប្រពន្ធឃើញថា សុខភាពល្អទាំងអស់គ្នា គឺអវិជ្ជមានកូវីដ ក៏ឱ្យត្រឡប់ទៅផ្ទះវិញដើម្បីធ្វើចត្តាឡីស័កនៅផ្ទះបន្ត។ ប៉ុន្តែពួកគាត់នឹងត្រូវធ្វើតេស្តលើកទី២ នៅថ្ងៃទី១០ ខែមេសា ឆ្នាំ២០២១នេះទៀត តែលទ្ធផលចុងក្រោយនៅល្ងាចថ្ងៃទី១២ ខែមេសានេះ ស្រាប់តែលិខិតរបស់គ្រូពេទ្យបានជួនដំណឹងមកអាជ្ញាធរស្រុកបន្ទាយមាស ដោយអះអាងថា ស្ត្រីឈ្មោះ នេត សារឹម មានលទ្ធផលវិជ្ជមានកូវីដ១៩។
ប្រភពដដែលបន្តថា ហើយនៅល្ងាចថ្ងៃទី១២ ខែមេសាដដែលនោះ នគរបាលស្រុក រួមទាំងមន្ត្រីនគរបាលប៉ុស្តិ៍សហការជាមួយកងរាជអាវុធហត្ថស្រុក បានចុះទៅដើម្បីយកស្ត្រីដែលមានវិជ្ជមានកូវីដ១៩ទៅព្យាបាល ហើយមិនឱ្យប៉ះពាល់ជាមួយនឹងប្តីរបស់គាត់នោះទេ ដោយឱ្យគាត់ចេញទៅក្រៅ ដើម្បីរង់ចាំរថយន្តរបស់មន្ទីរពេទ្យមកដល់ ស្រាប់តែស្ត្រីរូបនោះប្រុងច.ងកបញ្ចប់ជីវិតដោយខ្លួនឯង ធ្វើឱ្យមន្ត្រីនគរបាល រួមទាំងមន្ត្រីកងរាជអាវុធហត្ថ វង្វេងឈឺក្បាលឡើងវិលមុខតែម្តង។
ក្នុងនោះផងដែរ លោក ជំ សារឿន នាយករដ្ឋបាលសាលាស្រុកបន្ទាយមាស ក៏បានធ្វើការលួងលោម និងធ្វើការអប់រំដល់ស្ត្រីដែលកើតកូវីដ១៩នោះឱ្យបានស្ងាត់ស្ងៀម លុះនៅព្រឹកថ្ងៃទី១៣ ខែមេសានេះ ក្រុមគ្រូពេទ្យមកពីមន្ទីរពេទ្យបង្អែកកំពង់ត្រាច ក៏មកដល់។
បើតាមលោក ជីវ វុទ្ធី វេជ្ជបណ្ឌិតទទួលផ្នែកជំងឺឆ្លងនៅមន្ទីរពេទ្យបង្អែកកំពង់ត្រាច ក៏បានប្រាប់ទៅស្ត្រីវិជ្ជមានកូវីដ១៩ថា កុំអោយមានការភ័យខ្លាចអី ព្រោះគ្រូពេទ្យមកដឹកទៅព្យាបាលហើយ។ ចំណែកឯបុរសជាប្ដី គឺការធ្វើតេស្តមិនត្រូវរកឃើញមេរោគនោះទេ។ លោកវេជ្ជបណ្ឌិតប្រាប់ទៀតថា ចំណែកអ្នកដែលបានប៉ះពាល់ទាំងអស់នៅរសៀលថ្ងៃទី១៣ ដដែលនេះ ក្រុមគ្រូពេទ្យនឹងក៏ចុះមកដល់ផ្ទះដើម្បីយកសំណាក ដែលមានគ្នាជាង១៥នាក់ផងដែរ។
ស្របពេលនោះ លោក មួង នឿន អភិបាលស្រុកបន្ទាយមាស ក៏បានយកអំណោយទៅជួនដល់គ្រួសារស្ត្រីវិជ្ជមានកូវីដ១៩នោះផងដែរ។ ហើយលោក មួង នឿន ក៏បានប្រាប់ទៅអ្នកប៉ះពាល់ ក្នុងនោះមានកូនក្មេងប្រុសអាយុ២ខួបម្នាក់ផងថា កុំឱ្យមានការដើរហើរ រង់ចាំគ្រូពេទ្យយកសំណាកទៅពិនិត្យសិន។
លោកអភិបាលស្រុកមានការព្រួយបារម្ភបន្ថែមថា ក្រុមគ្រួសារនេះបានចេញទៅធ្វើការរោងចក្រពូចិនកណ្ដាលទួលផង និងសាច់ញាតិម្នាក់ទៀតក៏ចេញទៅធ្វើការឱ្យក្រុមហ៊ុនស៊ីម៉ង់អូតទៀត។ លោក មួងនឿន ក៏បានបញ្ជាក់ទៀតថា រហូតមកដល់ពេលនេះ ស្រុកបន្ទាយមាស ទើបតែមានកើតកូវីដ១៩ ទៅលើស្ត្រីឈ្មោះ នេត សារឹម នេះតែម្នាក់ទេ។
ចែករំលែកព័តមាននេះ