ខេត្តត្បូងឃ្មុំ ៖ បើតាមសេចក្តីរាយការណ៍បានឱ្យដឹងថា មានក្រុមយុវជន យុវនារីមានគ្នាជាង៣០នាក់បាននាំគ្នាធ្វើដំណើរចេញពីផ្ទះមកងូតទឹកលេងនៅទន្លេមេគង្គ កាលពីវេលាម៉ោង៥និង៣០នាទីល្ងាច ថ្ងៃទី១១ ខែមេសា ឆ្នាំ២០២១ ត្រង់ចំណុចវាលខ្សាច់កោះកុមារ…
ខេត្តត្បូងឃ្មុំ ៖ បើតាមសេចក្តីរាយការណ៍បានឱ្យដឹងថា មានក្រុមយុវជន យុវនារីមានគ្នាជាង៣០នាក់បាននាំគ្នាធ្វើដំណើរចេញពីផ្ទះមកងូតទឹកលេងនៅទន្លេមេគង្គ កាលពីវេលាម៉ោង៥និង៣០នាទីល្ងាច ថ្ងៃទី១១ ខែមេសា ឆ្នាំ២០២១ ត្រង់ចំណុចវាលខ្សាច់កោះកុមារ ស្ថិតនៅក្នុងឃុំប៉ើស២ ស្រុកក្រូចឆ្មារ ។ ខណៈពេលកំពុងតែងូតទឹកលេងនោះ ស្រាប់តែយុវនារី២នាក់បានលង់ទឹកតែម្តង ដោយឃើញបែបនេះយុវជនជាមិត្តភក្តិមានគ្នា៤ទៅ៥នាក់នោះក៏ស្ទុះហែលទឹកទៅដើម្បីជួយសង្គ្រោះ តែជាគ្រោះអកុសលយុវជន២នាក់ក្នុងចំណោមគ្នា៤ទៅ៥នាក់ ដែលហែលទៅជួយសង្គ្រោះនារីរងគ្រោះទាំង២នាក់នោះក៏លង់ទឹកស្លា.ប់បាត់បង់ជីវិតតែម្តង ដោយសារតែចរន្តទឹកហូរខ្លាំងពេក ។
បើតាមលោកវរសេនីយ៍ឯក សួស សៀងលី អធិការនគរបាលស្រុកក្រូចឆ្មារ បានប្រាប់ឲ្យដឹងថា ក្រុមយុវជន យុវនារីមួយក្រុមដែលមានគ្នាចំនួន៣១នាក់នោះ ពួកគេមានទីលំនៅភូមិទួលសម្បត្តិ ឃុំប៉ើស២ ស្រុកក្រូចឆ្មារ ខេត្តត្បូងឃ្មុំ ជាជនជាតិខ្មែរអ៊ីស្លាមទាំងអស់ ហើយពួកគេបាននាំគ្នាមកលេងទឹកទន្លេត្រង់វាលខ្សាច់កោះកុមារ ស្ថិតក្នុងភូមិសាស្ត្រឃុំប៉ើស២ ស្រុកក្រូចឆ្មារ ។
លោកអធិការនគរបាលស្រុកក្រូចឆ្មារ បានប្រាប់បន្តថា ខណ:ពេលពួកគេកំពុងតែលេងទឹកនោះស្រាប់តែមានឈ្មោះ កទៀត អាសូរ៉ ភេទស្រី អាយុ១៨ឆ្នាំ និងម្នាក់ទៀតឈ្មោះលី សាវីយ៉ះ អាយុ២១ឆ្នាំ បានលង់ទឹកលើកដៃខ្វៃៗ ពេលនោះក៏មានមិត្តភក្តិប្រុសដែលមានគ្នាបួនប្រាំនាក់ បានទៅជួយសង្គ្រោះនារីទាំង២នាក់នោះ។
លោកអធិការនគរបាលស្រុកក្រូចឆ្មារ ប្រាប់បន្តថា ដោយកន្លែងកើតហេតុនោះ មានចរន្តទឹកហូរខ្លាំងនិងមានជំរៅជ្រៅផងនោះ ធ្វើឱ្យយុវជនចំនួន២នាក់ក្នុងចំណោមនោះរួមមាន៖ ១-ឈ្មោះយ៉ា.រ៉សេត ភេទប្រុស អាយុ២០ឆ្នាំ និង២-ឈ្មោះយ៉ា.ម៉ាន់សូត្រ ភេទប្រុស អាយុ២០ឆ្នាំ បានប្រឹងហែលខ្លាំងពេកក៏ខ្សោយកម្លាំងអស់ដៃអស់ជើង ក៏ចាប់ផ្ដើមអស់កម្លាំង ហើយក៏បានលិចលង់ចូលទៅក្នុងទឹកទន្លេតាមចរន្តទឹកបាត់តែម្តងទៅ ។
លោកអធិការនគរបាលស្រុកក្រូចឆ្មារ បន្តទៀតថា ចំណែកស្រីៗ២នាក់ដែលលង់ទឹកដំបូងនោះ ក៏ត្រូវបាននាំគ្នាជួយសង្គ្រោះរួចផុតពីគ្រោះថ្នាក់ដល់អាយុជីវិត ប៉ុន្តែយុវជន២នាក់ដែលទៅជួយសង្គ្រោះគេ នោះ ក៏បានលិចលង់ក្នុងទឹកហូរខ្លាំង និងមានជំរៅជ្រៅនោះរហូតបាត់បង់ជីវិតតេម្តង ហើយបើគិតត្រឹមម៉ោង៩យប់ ថ្ងៃទី១១ ខែមេសា ស.ពជនរងគ្រោះទាំង២នាក់នៅមិនទាន់រកឃើញនៅឡើយទេ។
គួរបញ្ជាក់ថា ក្រោយមកយុវជនរងគ្រោះម្នាក់ឈ្មោះយ៉ា.រ៉សេត ភេទប្រុស អាយុ២០ឆ្នាំ មានទីលំនៅភូមិទួលសម្បត្តិ.ឃុំប៉ើស២. ស្រុកក្រូចឆ្មារ. ដែលលង់ទឹកបាត់ខ្លួនកាលពីថ្ងៃទី១១ ខែមេសា តែត្រូវបានរកឃើញហើយនៅវេលាម៉ោង១១ព្រឹក ថ្ងៃទី១២ ខែមេសា ឆ្នាំ២០២១ នៅចំណុចក្នុងទឹកទន្លេមុខកោះប្រាំរយ ស្ថិតនៅចំងាយប្រហែល៦០០ម៉ែត្រពីកន្លែងដែលរូបគេលង់ទឹកន។ ហើយក្រុមគ្រួសាររបស់គេ រួមជាមួយសមត្ថកិច្ច ព្រមទាំងអាជ្ញាធរ គ្រូពេទ្យ បានចូលរួមពិនិត្យសាកស.ពទាំងអស់គ្នា ហើយបញ្ជាក់ថា ឈ្មោះយ៉ា.រ៉សេត ពិតជាស្លា.ប់ដោយសារតែលង់ទឹកប្រាកដមែន មិនពាក់ព័ន្ធនឹងបទល្មើសអ្វីឡើយ បន្ទាប់ពីពិនិត្យរួច ស.ពជនរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។
លោកវរសេនីយ៍ឯក សួស សៀងលី អធិការនគរបាលស្រុកក្រូចឆ្មារ បានបញ្ជាក់ថា ឥឡូវនេះ ទាំងសមត្ថកិច្ច និងក្រុមគ្រួសារ កំពុងតែរាវរកជនរងគ្រោះបន្តទៀតហើយ។
ចែករំលែកព័តមាននេះ