ខេត្តកំពង់ចាម ៖ ប្រតិបត្តិការបង្ក្រាបគ្រឿងញៀនបានធ្វើឡើងជាបន្តបន្ទាប់ កាលពីថ្ងៃទី២៩ កញ្ញា ២០១៥ ដោយជនសង្ស័យចំនួន៣នាក់ ត្រូវបានឃាត់ខ្លួននៅកន្លែងផ្សេងគ្នា ស្ថិតនៅឃុំអំពិល ស្រុកកំពង់សៀម ដោយដកហូតបានថ្នាំញៀនចំនួន៩កញ្ចប់ ក្នុងនោះ ១កញ្ចប់ធំ និង៨កញ្ចប់តូច ម៉ូតូ២គ្រឿង ហើយត្រូវបានបញ្ជូនទៅកាន់ស្នងការដ្ឋាននគរបាលខេត្ត ដើម្បីសួរនាំ ។
នាយការិយាល័យប្រឆាំងគ្រឿងញៀនខេត្ត លោកវរសេនីយ៍ទោ សោម រស់ បានឱ្យដឹងថា ចំពោះករណីទី១ដោយមានបញ្ជាពីលោកស្នងការនគរបាលខេត្តនោះ កម្លាំងក្រោមឱវាទជាច្រើននាក់ ត្រូវបានដាក់ត្រួតពិនិត្យអាវុធជាតិផ្ទុះលើកំណាត់ផ្លូវជាតិលេខ៧ ត្រង់ចំណុចភូមិអំពិលលើ ឃុំអំពិល ស្រុកកំពង់សៀម ដើម្បីពង្រឹងសន្តិសុខ និងសណ្តាប់ធ្នាប់ ក្នុងឱកាសរដូវបិណ្ឌភ្ជុំបិណ្ឌ ។
លុះរហូតដល់វេលាម៉ោង១ និង១៦នាទីរសៀលថ្ងៃទី២៩ កញ្ញា មានជនសង្ស័យចំនួន២នាក់ គឺឈ្មោះអ៊ុន តុងអ៊ី ភេទប្រុស អាយុ២៦ឆ្នាំ មានទីលំនៅភូមថ្មគោល ឃុំរអាង ស្រុកកំពង់សៀម រួមជាមួយឈ្មោះសុខ ឡា ភេទប្រុស បានជិះម៉ូតូ១គ្រឿង ។ ស្របពេលដែលមកដល់ចំណុចត្រួតពិនិត្យនោះ មិនបានឈប់នោះទេ គឺជិះបុកបារាសរត់គេចដេញមកតាមចាប់បានត្រង់ចំណុចរង្វង់មូលនាគព័ន្ធ ហើយបានបោះថ្នាំញៀនចំនួន៨កញ្ចប់ទៅលើដី ។
ចំណែកករណីទី២វិញ កាលពីវេលាម៉ោង៥ល្ងាចថ្ងៃទី២៩ កញ្ញា កម្លាំងគ្រឿងញៀនខេត្តបានប្រើវិធានការញុះញង់ទិញថ្នាំញៀន១កញ្ចប់ធំពីឈ្មោះសេរី វល័ក្ខ ភេទប្រុស អាយុ២០ឆ្នាំ មានទីលំនៅភូមិអណ្តូងច្រុះ ឃុំអំពិល ស្រុកកំពង់សៀម ។ ស្របពេលដែលយកថ្នាំញៀនមកប្រគល់ឱ្យត្រង់ចំណុចភូមិអំពិលលើ ឃុំអំពិល ស្រុកកំពង់សៀម ត្រូវបានចាប់ខ្លួនតែម្តង ដោយដកហូតបានម៉ូតូ១គ្រឿង ជាមួយនឹងថ្នាំញៀន១កញ្ចប់ធំ រួចនាំខ្លួនមកកាន់ស្នងការដ្ឋាននគរបាលខេត្តតែម្តង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ