ទីក្រុងម៉ានីល ប្រទេសហ្វ៊ីលីពីន ៖ តាមសេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ី ហៅកាត់ថាADB ថ្ងៃទី២៩ កញ្ញា ២០១៥ បានឲ្យថា ដឹងធនាគារនេះបានអនុម័តលើកម្ចីក្នុងទឹកប្រាក់៦០លានដុល្លារក្នុងគោលបំណង
ទីក្រុងម៉ានីល ប្រទេសហ្វ៊ីលីពីន ៖ តាមសេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ី ហៅកាត់ថាADB ថ្ងៃទី២៩ កញ្ញា ២០១៥ បានឲ្យថា ដឹងធនាគារនេះបានអនុម័តលើកម្ចីក្នុងទឹកប្រាក់៦០លានដុល្លារក្នុងគោលបំណងបង្កើនផលិតកម្ម កសិកម្ម តាមរយៈការស្ដារឡើងវិញ ការធ្វើទំនើបកម្ម និងការធ្វើអោយប្រព័ន្ធធារាសាស្ត្រ ក្នុងខេត្តកំពង់ធំ និងបាត់ដំបង កាន់តែធន់ជាមួយនឹងអាកាសធាតុ ។
លោក Raza Mahmood Farrukh អ្នកឯកទេសខាងធនធានទឹកនៃនាយកដ្ឋានតំបន់អាស៊ីអាគ្នេយ៍របស់ ADB បានមានប្រសាសន៍ថា ផលិតភាពកសិកម្មទាប គឺជាបញ្ហាធ្ងន់ធ្ងរមួយសម្រាប់កសិករខ្មែរ ដែលពឹងពាក់លើប្រព័ន្ធធារាសាស្ត្រនិងមិនសូវទទួលបានការថែទាំសម្រាប់បង្កបង្កើនផលស្រូវរបស់ខ្លួន ។ លោកថា « ការផ្ដល់ហិរញ្ញប្បទាននេះ នឹងផ្ដល់ការគាំទ្រដល់កិច្ចខិតខំប្រឹងប្រែង របស់រាជរដ្ឋាភិបាល ដើម្បីពង្រីកទំហំដី ដែលទទួលបានការស្រោចស្រព និងការគ្រប់គ្រងធនធានទឹកឱ្យកាន់តែមានប្រសិទ្ធភាព ។ ហិរញ្ញប្បទាននេះ នឹងកាត់បន្ថយភាពងាយរងគ្រោះរបស់ប្រជាកសិករ ដោយសារតែមុខសញ្ញាគ្រោះថ្នាក់ធម្មជាតិ ដូចជាទឹកជំនន់ជាដើម ដែលកើតឡើង មកពីការប្រែប្រួលអាកាសធាតុ » ។
តាមសេចក្តីប្រកាសព័ត៌មានរបស់ ADBដដែល គម្រោងនេះ នឹងបង្កើនប្រសិទ្ធភាព និងភាពធន់ទៅនឹងអាកាសធាតុនៃប្រព័ន្ធធារាសាស្ត្រក្នុងខេត្តកំពង់ធំ និងបាត់ដំបង ។ ត្រឹមឆ្នាំ២០២១ ផ្ទៃដីដាំដុះសរុប ទាំងរដូវប្រាំង និងរដូវវស្សា នឹងកើនឡើងទ្វេដងរហូតដល់ ២៩.៥០០ហិកតា ខណៈឆ្នាំ២០១៥ មានតែ ១៣.៥០០ហិកតា ហើយប្រព័ន្ធធារាសាស្ត្រចំនួន៣ នឹងសម្រេចបាននូវប្រសិទ្ធភាពស្រោចស្រពបាន១០០% ។
តាមរយៈការកែលម្អប្រព័ន្ធធារាសាស្ត្រ និងការផ្គត់ផ្គង់ទឹកគ្រប់គ្រាន់ដល់កសិករ ក្នុងខេត្តកំពង់ធំ និងខេត្តបាត់ដំបង កម្ចីនេះនឹងជួយបង្កើនផលិតភាពកសិកម្មនិងបង្កើនប្រាក់ចំណូលដល់កសិករនៅតាមមូលដ្ឋាន ដោយសារតែពួកគេអាចមានលទ្ធភាពបង្កបង្កើនផលស្រូវ បន្លែ និងដំណាំហូបផ្លែផ្សេងៗបានម្ដងទៀត នៅរដូវប្រាំង ។
មួយវិញទៀតគម្រោងនេះ ក៏នឹងផ្ដល់ការបណ្ដុះបណ្ដាលដល់មន្ត្រីរដ្ឋាភិបាល និងសហគមន៍កសិករប្រើប្រាស់ទឹក អំពីរបៀបគ្រប់គ្រងធនធានទឹកឱ្យបានត្រឹមត្រូវ ដែលក្នុងនោះសមាជិកនិងអ្នកគ្រប់គ្រងសហគមន៍នេះយ៉ាងតិចបំផុត៣០%ត្រូវតែជាស្ត្រី ។ សហគមន៍កសិករប្រើប្រាស់ទឹក នឹងទទួលខុសត្រូវលើការប្រើប្រាស់ និងការថែទាំប្រឡាយរងទី២ ។
គម្រោងនេះដែរ ក៏នឹងបំពេញបន្ថែមឱ្យគំនិតផ្ដួចផ្ដើម ដែលគាំទ្រដោយធនាគារអភិវឌ្ឍន៍អាស៊ីផ្សេងទៀត ក្នុងតំបន់នេះ ដូចជាកម្មវិធីអភិវឌ្ឍន៍វិស័យពាណិជ្ជភាវូបនីយកម្មស្រូវធន់នឹងអាកាសធាតុ ដែលកំពុងតែអនុវត្ត ក្នុងនោះកសិករ អាចទទួលបាន គ្រាប់ពូជដែលមានគុណភាពខ្ពស់ ដោយមានការបញ្ជាក់ត្រឹមត្រូវ ។ កម្ចីនេះ មានប្រភពពីមូលនិធិអភិវឌ្ឍន៍អាស៊ី ដែលជាកម្ចីសម្បទានរបស់ADB ហើយរាជរដ្ឋាភិបាលកម្ពុជា នឹងផ្ដល់ថវិកាបដិភាគចំនួន៦,១លានដុល្លារអាមេរិក ។ គម្រោងនេះ នឹងមានរយៈពេល៥ឆ្នាំ ដោយនឹងបញ្ចប់ក្នុងខែមីនា ឆ្នាំ ២០២១ ។
គួរបញ្ជាក់ថា ធនាគារដែលមានមូលដ្ឋាននៅក្រុងម៉ានីលមួយនេះប្ដេជ្ញា កាត់បន្ថយភាពក្រីក្រនៅតំបន់អាស៊ីប៉ាស៊ីហ្វិក តាមរយៈកំណើនសេដ្ឋកិច្ចដើម្បីទាំងអស់គ្នា កំណើនដែលធានានិរន្តភាពបរិស្ថាន និងសមាហរណកម្មតំបន់ ។ ADB បានបង្កើតឡើងនៅក្នុងឆ្នាំ១៩៦៦ ហើយធនាគារនេះ គឺជាកម្មសិទ្ធិរបស់សមាជិកចំនួន៦៧ប្រទេស ដែលក្នុងនោះរួមមាន ៤៨ប្រទេស មកពីតំបន់អាស៊ី ។ ក្នុងអំឡុងឆ្នាំ២០១៤ ជំនួយដែលផ្ដល់ដោយធនាគារអភិវឌ្ឍន៍អាស៊ីសរុប មានចំនួន២២,៩ប៊ីលានដុល្លារអាមេរិក បូករួមទាំងសហប្រទានចំនួន៩,២ប៊ីលានដុល្លារអាមេរិកផងដែរ ៕
ចែករំលែកព័តមាននេះ