រាជធានីភ្នំពេញ ៖ យោងតាមសេចក្តីថ្លែងការណ៍ចុះថ្ងៃទី៧ មីនា របស់គណៈកម្មការប្រឹក្សាការងារដែលចុះហត្ថលេខាដោយលោកវង សូត រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការប្រឹក្សាការងារ លោកឧកញ៉ា ណាង សុធី អនុប្រធានគណៈកម្មការប្រឹក្សាការងារ ភាគីតំណាងនិយោជក និងលោកជួន មុំថុល ភាគីតំណាងកម្មករនិយោជិត បានសំរេចផ្តល់ប្រាក់រង្វាន់ដល់កម្មករដែលធ្វើការទៀងទាត់តាមចំនួនថ្ងៃធ្វើការក្នុងខែនីមួយៗចំនួនយ៉ាងតិច៧ដុល្លារ ក្នុងមួយខែ និងកម្មករស្ម័គ្រចិត្តធ្វើការបន្ថែមម៉ោងនឹងទទួលបានប្រាក់ថ្លៃបាយចំនួន២.០០០រៀលក្នុងមួយថ្ងៃ ឬទទួលបានការផ្តល់បាយមួយពេលដោយឥតគិតថ្លៃ។
កាលពីថ្ងៃទី៧ មីនា ឆ្នាំ២០១១ វេលាម៉ោង៨ព្រឹក គណៈកម្មការប្រឹក្សាការងារបានបើកកិច្ចប្រជុំអាណត្តិទី៧ លើកទី៣ នៅសាលប្រជុំរបស់បេឡាជាតិរបបសន្តិសុខសង្គមនៃក្រសួងការងារ និងបណ្តុះបណ្តាលវិជ្ជាជីវៈ ដើម្បីពិភាក្សាអំពីការផ្តល់អត្ថប្រយោជន៍ផ្សេងៗដល់កម្មករនិយោជិតធ្វើការនៅផ្នែកវាយនភណ្ឌ កាត់ដេរ និងផលិតស្បែកជើង។ ក្រោយពីបានពិគ្រោះយោបល់យ៉ាងផុលផុស និងគ្រប់ជ្រុងជ្រោយរួចមក គណៈកម្មការប្រឹក្សាការងារបានឯកភាព ទី១-កម្មករនិយោជិតដែលបានមកធ្វើការងារទៀងទាត់តាមចំនួនថ្ងៃ នៃថ្ងៃធ្វើការងារក្នុងខែនីមួយៗត្រូវទទួលបានប្រាក់រង្វាន់យ៉ាងតិច៧ដុល្លារអាមេរិកក្នុងមួយខែ។ ទី២-កម្មករនិយោជិតដែលស្ម័គ្រចិត្តធ្វើការងារបន្ថែមម៉ោងតាមសំណូមពររបស់និយោជកត្រូវទទួលបានប្រាក់ថ្លៃបាយចំនួន២.០០០រៀលក្នុងមួយថ្ងៃ ឬទទួលបានការផ្តល់បាយមួយពេលដោយឥតគិតថ្លៃ។
ចំណែកប្រាក់រង្វាន់អតីតភាពការងារមានដូចតទៅ៖
ក-កម្មករនិយោជិតដែលបានធ្វើការងារនៅក្នុងរោងចក្រ សហគ្រាស គ្រឹះស្ថានណាមួយលើសពី១ឆ្នាំឡើងទៅ ត្រូវទទួលបានប្រាក់រង្វាន់អតីតភាពការងារដូចមាននៅក្នុងតារាងលំអិតរបស់គណៈកម្មការប្រឹក្សាការងារ។ យោងតាមតារាងអតីតភាពការងារ និងប្រាក់រង្វាន់ដែលកោះសន្តិភាពបានទទួលឲ្យដឹងថា ចំពោះកម្មករដែលមានអតីតភាពការងារ២ឆ្នាំឡើងទទួលបាន២ដុល្លារ ហើយអតីតភាពការងារដល់១១ឆ្នាំទទួលបាន១១ដុល្លារ។
ខ-កម្មករនិយោជិតមានអតីតភាពការងារនៅឆ្នាំណា (ចាប់ពី២ឆ្នាំឡើង) ត្រូវទទួលបានប្រាក់រង្វាន់ស្មើនឹងចំនួនឆ្នាំនោះ លើកលែងតែកម្មករនិយោជិតណាដែលមានអតីតភាពការងារលើសពី១១ឆ្នាំឡើងទៅត្រូវទទួលបានប្រាក់អតីតភាពការងារនៅក្នុងឆ្នាំទី១១ គឺចំនួន១១ដុល្លារអាមេរិកក្នុងមួយខែ។ គណៈកម្មការប្រឹក្សាបន្តថា ការផ្តល់អត្ថប្រយោជន៍ផ្សេងៗ ដូចមានចែងក្នុងចំណុចទាំងបីខាងលើនៃសេចក្តីថ្លែងការណ៍នេះ ចាប់អនុវត្តពីថ្ងៃទី១ មីនា ២០១១ តទៅ៕
ចែករំលែកព័តមាននេះ