ខេត្តបាត់ដំបង ៖ ជនសង្ស័យម្នាក់ត្រូវបានកម្លាំងសមត្ថកិច្ចឃាត់ខ្លួនទាំងព្រឹក បន្ទាប់ពីចូលធ្វើសកម្ម ភាពលួចគាស់យកកូនក្រឡឹងនៅក្នុងវីឡាគេមួយកន្លែង ដែលម្ចាស់មិនស្នាក់នៅ បង្កឱ្យមានការភ្ញាក់ផ្អើលកាលពីវេលាម៉ោង៩និង៣០នាទីព្រឹក ថ្ងៃទី១០ ខែមេសា ឆ្នាំ២០២១ ស្ថិតនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង។
លោក ឆាង វណ្ណឆៃ អធិការក្រុងបាត់ដំបង បានឱ្យដឹងថា ជនសង្ស័យរូបនេះឈ្មោះ អ៊ិន សារ៉ាថា អាយុ៣៩ឆ្នាំ រស់នៅភូមិ.សង្កាត់កើតហេតុខាងលើ។ ដោយឡែកម្ចាស់ផ្ទះដែលរងគ្រោះ មិនត្រូវបានលោកអធិការបង្ហាញអត្តសញ្ញាណទេ តែមានឈ្មោះ យស វណ្ណជីរិន ភេទប្រុស អាយុ៣៥ឆ្នាំ ជាបុគ្គលិកធានាគាកាណាឌីយ៉ា រស់នៅភូមិរតនះ សង្កាត់រតនះ ក្រុងបាត់ដំបង ជាតំណាងដើមបណ្ដឹងលើករណីនេះ។
លោកអធិការបានបញ្ជាក់ថា ម្ចាស់ផ្ទះមិនបានស្នាក់នៅទេ បានបិទទ្វារទុកចោល តែមិនបានចាក់ទ្វារក្រោយឡើយ ទើបជនសង្ស័យចូលគាស់លួចយកកូនក្រឡឹងឈើ តែត្រូវគេឃើញទាន់ ហើយក៏រាយការណ៍ប្រាប់សមត្ថកិច្ច ទើបកម្លាំងរបស់លោកចុះបង្ក្រាបបានភ្លាមៗតែម្ដង។
នៅក្នុងរបាយការណ៍សមត្ថកិច្ចបានឱ្យដឹងថា ជនសង្ស័យឈ្មោះ អ៊ិន សារ៉ាថា មិនបានបរិយាលំអិតអំពីប្រវត្តិដែលខ្លួនធ្លាប់ប្រព្រឹត្តអំពើចោរកម្មនោះទេ។ ប៉ុន្តែចំពោះករណីលួចខាងលើនេះ ជននេះបានសារភាពថា ខ្លួនពិតជាបានចូលលួចកូនក្រឡឹងនៅក្នុងវីឡានោះមែន។ ខ្លួនបានឃើញផ្ទះនោះ ម្ចាស់បិទទ្វារ ហើយគ្មានអ្នកស្នាក់នៅ ហើយឃើញទ្វារក្រោយមិនបានចាក់គន្លឹះទៀត ទើបខ្លួនបើកចូលលួចគាស់យកកូនក្រឡឹងឈើនៅខាងក្នុង តែក៏ត្រូវបានសមត្ថកិច្ចចុះទៅចាប់ខ្លួនតែម្ដង។
បើតាមលោក ឆាង វណ្ណឆៃ បានប្រាប់ថា ជាមួយនឹងការឃាត់ខ្លួនជនសង្ស័យ មន្ត្រីរបស់លោកដកហូតបានវត្ថុតាងមួយចំនួន រួមមាន៖ ញញួរចំនួន០១. កូនក្រឡឹងឈើចំនួន០៤ដុំ. កន្ត្រៃចំនួន០១. ទួណឺវ៉ីសចំនួន០១. ដង្កាប់ចំនួន០១ និងកាំបិតចុងស្រួចចំនួន០១។
លោកបានបញ្ជាក់ថា ចំពោះវត្ថុតាងទាំងនេះ ជនសង្ស័យបានសារភាពទទួលស្គាល់ថា ពិតជារបស់ខ្លួន ដែលខ្លួនបានប្រើប្រាសដើម្បីប្រព្រឹត្តបទល្មើស។ បច្ចុប្បន្នជនសង្ស័យ និងវត្ថុតាងត្រូវបានផ្នែកជំនាញកំពុងរៀបចំសំណុំរឿងបញ្ជូនទៅតាមនីតិវិធីច្បាប់៕
ចែករំលែកព័តមាននេះ