ប្រទេសមីយ៉ាន់ម៉ា ៖ ឃ្លាំងមួយដែលគ្រប់គ្រងដោយដៃគូក្នុងស្រុករបស់ក្រុមហ៊ុនភេសជ្ជៈកូកាកូឡា ដែលត្រូវភ្លើងឆេះកាលពីព្រឹកថ្ងៃព្រហស្បតិ៍ កន្លងមកនេះ បានរងការខូចខាតគិតជាទឹកប្រាក់អស់ជិត១លានដុល្លារ។ ទោះបីយ៉ាងណា ក្រុមហ៊ុនបានឲ្យដឹងថា បញ្ហានេះនឹងមិនប៉ះពាល់ដល់ប្រតិបត្តិការរបស់ក្រុមហ៊ុនឡើយ ។ នេះបើយោងតាមការចេញផ្សាយរបស់ Myanmarbiz todaty ។
អ្នកនាំពាក្យរបស់ក្រុមហ៊ុនកូកាកូឡាមីយ៉ាន់ម៉ាបានប្រាប់សារព័ត៌មានក្នុងស្រុកតាមរយៈអីុម៉ែលថា « ផ្អែកលើការវាយតម្លៃជាបឋម យើងមិនមានក្តីរំពឹង នឹងមានការប៉ះទង្គិចភ្លាមៗ នៅក្នុងផ្នែកនៃសមត្ថភាពផលិត និងការចែកចាយភេសជ្ជៈកូកាកូឡារបស់យើងនៅក្នុងប្រទេសមីយ៉ាន់ម៉ានោះឡើយ »។
ចំណែក The Global New Light of Myanmar បានរាយការណ៍មកថា នៅក្នុងឧប្បត្តិហេតុនេះ គេបានបញ្ចេញរថយន្តពន្លត់អគ្គិភ័យមកអន្តរាគមន៍ចំនួន៤០០គ្រឿង និងម៉ាស៊ីនពន្លត់អគ្គិភ័យ៤៥គ្រឿងដែលជាលទ្ធផលមានខូចខាតយ៉ាងតិច៨៥៤.៩៥០ដុល្លារ ។
អ្នកនាំពាក្យរូបនោះបានឲ្យដឹងថា «នៅព្រឹកថ្ងៃព្រហស្បតិ៍នោះ មានហេតុការណ៍ភ្លើងឆេះមួយនៅឃ្លាំងជួលរបស់ក្រុមហ៊ុនកូកា កូឡា មីយ៉ាន់ម៉ា (Coca-Cola Pinya Beverages Myanmar)ដែលស្ថិតនៅឃុំ Mingaladon។ភ្លើងត្រូវបានពន្លត់ ហើយយើងបន្តសហការយ៉ាងស្វិតស្វាញជាមួយនឹងអង្គភាពពន្លត់អគ្គិភ័យក្នុងស្រុកនៅក្នុងការពិនិត្យពីទំហំនៃគ្រោះថ្នាក់និងហានិភ័យបន្ថែមទៀត ។ យើងមើលឃើញពីគុណតម្លៃដ៏ជ្រាលជ្រៅបំផុតទៅលើអង្គភាពពន្លត់អគ្គិភ័យក្នុងស្រុកចំពោះកិច្ចខិតខំប្រឹងប្រែងរបស់ពួកគេ ក៏ដូចជាការយកចិត្តទុកដាក់នៅក្នុងការពន្លត់ភ្លើងនេះផងដែរ ។ ក្នុងនោះគឺគ្រប់បុគ្គលិកដែលបម្រើការនៅទីនោះគឺពុំមានអ្នកណាម្នាក់រងរបួសអ្វីឡើយ » ។
ឃ្លាំងដែលត្រូវបានអគ្គិភ័យលេបត្របាក់នេះត្រូវបានគេប្រើប្រាស់ជាកន្លែងស្តុកទុកសារធាតុប្លាស្ទិក និងទីតាំងផលិតសម្បកដបរបស់កូកា កូឡា ។
អ្នកនាំពាក្យក្រុមហ៊ុនកូកា កូឡា បានថ្លែងថា ក្រុមហ៊ុនបានសហការយ៉ាងស្មើដៃជាមួយនឹងបណ្តាអាជ្ញាធរពាក់ព័ន្ធក្នុងស្រុកនៅក្នុងការកត់សម្គាល់ពីករណីភ្លើងឆេះនេះ ហើយខ្លួនក៏នឹងបន្តធ្វើការជាមួយអាជ្ញាធរនៅពេលខាងមុខនេះដែរ ស្របពេលដែលការបើកការស៊ើបអង្កេតបន្ថែមត្រូវបានគេប្រតិបត្តិឡើងនោះ ។
សូមបញ្ជាក់ថា ក្រុមហ៊ុនកូកាកូឡាបានឈានជើងចូលមីយ៉ាន់ម៉ាសាជាថ្មីក្នុងអំឡុងឆ្នាំ២០១៣ហើយបច្ចុប្បន្នក្រុមហ៊ុនមានវត្តមាននៅគ្រប់ប្រទេសទាំងអស់លើពិភពលោក លើកលែងតែប្រទេសគុយបា និងកូរ៉េខាងជើងប៉ុណ្ណោះ ៕
ចែករំលែកព័តមាននេះ