ប្រទេសវៀតណាម ៖ បណ្តាក្រុមហ៊ុនទាំងឡាយរបស់ប្រទេសវៀតណាម បានជំរុញឲ្យក្រសោបយកនូវកាលានុវត្តភាពដែលមានវត្តមានតាមរយៈសមាគមសេដ្ឋកិច្ចអាស៊ាន(AEC)ដែលនឹងចូលជាធរមាននៅចុងឆ្នាំ២០១៥នេះហើយក៏កុំបាច់ភ័យខ្លាចនៅក្នុងការប្រកួតប្រជែងអ្វីដែរ ស្របពេលដែលការបង្កើនបរិយាកាសប្រកួតប្រជែង នឹងត្រូវពាំនាំមកនាឱកាសនោះ ។
បើតាមសេចក្តីថ្លែងការណ៍នៅក្នុងអង្គសន្និបាត Viet Nam CEO ដែលបានប្រារព្ធឡើងក្នុងក្រុងហូជីមិញកាលពីថ្ងៃព្រហស្បតិ៍ បានលើកឡើងថា ការបង្កើតឡើងនូវសមាគមថ្មីនេះនឹងបង្កើតឲ្យមានការផ្លាស់ប្តូរទំនិញ សេវាកម្ម ការវិនិយោគ មូលធន និងពលករជំនាញក្នុងចំណោមបណ្តាប្រទេសអាស៊ានទាំង១០ ។
លោកបណ្ឌិត Hans-Paul Burkner ប្រធានក្រុមហ៊ុនផ្តល់ប្រឹក្សា Boston Consulting Group បានថ្លែងថា គុណប្រយោជន៍របស់បណ្តាក្រុមហ៊ុនក្នុងស្រុករួមមាន ការយល់ដឹងនៃទីផ្សារផ្ទាល់ខ្លួន និងអតិថិជនរបស់ពួកគេ ក៏ដូចជាទំនាក់ទំនងជាមួយនឹងអ្នកផ្គត់ផ្គង់ផងដែរ ។
ពួកគេក៏ដឹងថា តើគួរធ្វើរបៀបណានៃការធ្វើអន្តរកម្មជាមួយនឹងរដ្ឋាភិបាល ក៏ដូចជាភាពអាចបត់បែនបាន និងការអនុវត្តបានទាន់ចិត្តនៅក្នុងប្រតិបត្តិការរបស់ពួកគេ ។
លោកបានក្រើនរំលឹកដល់បណ្តាសហគ្រាសក្នុងស្រុកឲ្យកត់សម្គាល់ពីការពង្រឹងខ្លួនឯង និងការឈានជើងចូលទៅក្នុងទីផ្សារបរទេស គឺមិនត្រូវបង្កើតតួនាទីខ្លាំងក្លាតែទីផ្សារនៅក្នុងស្រុកប៉ុណ្ណោះទេ ។
រដ្ឋមន្ត្រីយុត្តិធម៌ លោក Ha Hung Cuong បានថ្លែងថា ក្រុមហ៊ុនសហគ្រាសប្រកបអាជីវកម្មនានាចាំបាច់ត្រូវប្រតិបត្តិតាមច្បាប់ទាំងឡាយជាធរមាន ហើយប្រឹក្សាយោបល់ជាមួយមេធាវី ។ ម្យ៉ាងទៀត សមត្ថភាពនៃការប្រកួតប្រជែង និងធនធានមនុស្ស ក៏ចាំបាច់ត្រូវតែធ្វើឲ្យប្រសើរឡើងផងដែរ ។
អនុរដ្ឋមន្ត្រីឧស្សាហកម្មនិងពាណិជ្ជកម្មលោក Tran Tuan Anh បានថ្លែងថា បណ្តាក្រុមហ៊ុនក្នុងស្រុកចាំបាច់ត្រូវតែផ្លាស់ប្តូរផ្នត់គំនិតរបស់ពួកគេ ស្របពេលដែលទីផ្សារមិនច្រើនណាស់ណាឡើយ គឺត្រឹមតែ៩០លាននាក់ប៉ុណ្ណោះក្នុងប្រទេសវៀតណាម ប៉ុន្តែយ៉ាងហោច៦០០លាននាក់ក្នុងតំបន់អាស៊ាន ។
លោកបានបន្ថែមថា វៀតណាមបំពេញបាន៩៤%នៃការប្តេជ្ញាចិត្តសម្រាប់សមាគមសេដ្ឋកិច្ចអាស៊ាន ហើយខ្លួនបានផ្លាស់ទម្រង់ថ្មី៩០%នៃតារាងពន្ធនាំចូលពីបណ្តាប្រទេសអាស៊ាននានា។ នៅឆ្នាំ២០១៨ តារាងពន្ធ៧%ដែលពាក់ព័ន្ធនឹងវិស័យដែលប្រកួតប្រជែង នឹងត្រូវបានកាត់បន្ថយ ។
លោកបានថ្លែងថា កត្តានេះនឹងមានផលប៉ះពាល់ខ្លាំងលើឧស្សាហកម្មជាក់ស្តែង តួយ៉ាង ឧស្សាហកម្មរថយន្ត ស្ករនិងកសិកម្ម ដែលប្រឈមនឹងការខិតខំប្រឹងប្រែងការទម្រង់បន្ថែមទៀត ។
លោក Cao Thi Ngoc Dung ប្រធាននិងជានាយកប្រតិបត្តិក្រុមហ៊ុន Phu Nhuan Jewelry JSC បានថ្លែងថា សមាគមសេដ្ឋកិច្ចអាស៊ាន នឹងផ្តល់នូវកាលានុវត្តភាពដ៏ប្រសើរបំផុត ប្រសិនជាបណ្តាក្រុមហ៊ុននានារកទិសដៅនៃភាពប្រឈមមុខបានត្រឹមត្រូវ ។
លោក Dung បានថ្លែងថា បើទោះជាមានការប្រកួតប្រជែងយ៉ាងណាក្តី ក៏ការកែប្រែថ្មី និងការខិតខំប្រឹងប្រែងប្រកបការងារបស់ក្រុមហ៊ុនវៀតណាម នឹងស្វែងរកការបើកទូលាយនូវការទទួលយកប្រយោជន៍នៅក្នុងទីផ្សារដ៏ទូលំទូលាយនេះ ។
ចំណែកគណៈប្រតិភូបានថ្លែងថា រដ្ឋាភិបាលគួរតែបង្កើតនូវទម្រង់ការងារស្របច្បាប់ស៊ីជម្រៅមួយ ដើម្បីជួយសម្រួលដល់ប្រតិបត្តិការរបស់បណ្តាសហគ្រាសនានា ៕
ចែករំលែកព័តមាននេះ