នារីជប៉ុនកើតទុក្ខមានបុរសសម្រាប់ជួលទៅជួយលួងលោម
នៅប្រទេសជប៉ុនសម្រាប់នារីមានអារម្មណ៍ធុញថប់នឹងការងារ ឬទុក្ខព្រួយ ចំណាយត្រឹមតែ៦៥ដុល្លារប៉ុណ្ណោះ នឹងទទួលបានបុរសសង្ហាម្នាក់សម្រាប់ជួយលួងលោម នៅកំដរ និងជូតទឹកភ្នែកឱ្យជាដើម ។
នៅប្រទេសជប៉ុនសម្រាប់នារីមានអារម្មណ៍ធុញថប់នឹងការងារ ឬទុក្ខព្រួយ ចំណាយត្រឹមតែ៦៥ដុល្លារប៉ុណ្ណោះ នឹងទទួលបានបុរសសង្ហាម្នាក់សម្រាប់ជួយលួងលោម នៅកំដរ និងជូតទឹកភ្នែកឱ្យជាដើម ។ បុរសសង្ហាសម្រាប់ជួលនោះត្រូវគេហៅថា «អិុគិម៉េសូ» មានន័យថា «បុរសមានមន្តស្នេហ៍» ។
ដំណើរការនៃមុខរបរនោះចាប់ផ្តើមបើកថ្ងៃទី២៤ កញ្ញា ២០១៥ ។ ពីដំបូងអតិថិជនត្រូវទាក់ទងទៅកាន់ក្រុមហ៊ុន ហើយជ្រើសរើសបុរសសង្ហាម្នាក់ក្នុងចំណោមកំពូលបុរសចំនួន៧នាក់ដែលបានបង្ហាញពីព័ត៌មានផ្ទាល់ខ្លួន ខ្លីៗ និងរូបថតផងដែរ ។ បន្ទាប់មកបុរសសង្ហានោះនឹងធ្វើដំណើរទៅកាន់ការិយាល័យការងារ ឬផ្ទះរបស់អតិថិជនដើម្បីប្រើវិធីសាស្ត្រលួងលោមតាមរយៈពាក្យសម្តីផ្អែមល្ហែម និងកាយវិការមើលថែ ដោយយកកូនកន្សែងជូតទឹកភ្នែកចេញពីថ្ពាល់ទាំងសងខាង ថ្នមៗ ។ ក្រៅពីនេះបុរសសង្ហានឹងចាក់វីដេអូបែបមនោសញ្ចេតនាលើកទឹកចិត្តឱ្យនារីព្រួយមើលដើម្បីកាត់បន្ថយការយំ និងធ្វើឱ្យមានអារម្មណ៍ស្រស់ស្រាយឡើងវិញ ។
បុរសសង្ហាទាំងនោះមានលក្ខណៈខុសប្លែកគ្នាពោលគឺសម្បុរ កម្ពស់ និងរូបរាងជាដើម ប៉ុន្តែពួកគេសុទ្ធតែបានឆ្លងកាត់ការបណ្តុះបណ្តាលពីក្រុមហ៊ុនពីរបៀបលួងលោម និងលើកទឹកចិត្តនារីយ៉ាងស្ទាត់ជំនាញ ។
យោងតាមលោកហុីរីគិ តេរ៉ៃ ជាអ្នកបង្កើតរបរថ្មីនោះនិយាយថា «នារីជប៉ុនកំពុងស្ថិតក្រោមការគាបសង្កត់ពីជំងឺតប់ប្រមល់យ៉ាងខ្លាំងនៅកន្លែងការងារក្នុងទីក្រុងតូក្យូ ហើយធ្វើឱ្យពួកនាងអស់សង្ឃឹម ។ គោលបំណងនៃរបរថ្មីនេះគឺផ្តល់ការលើកទឹកចិត្តបែបធម្មជាតិមិនមែនជាការប្រើប្រាស់ថ្នាំអ្វីឡើយ ។ បុរសសង្ហាម្នាក់ក្នុងចំណោម៧នាក់ នឹងបម្រើអតិថិជនគួរជាទីគាប់ចិត្ត» ៕
ចែករំលែកព័តមាននេះ