រាជធានីភ្នំពេញ ៖ អ្វីៗបានកន្លងផុតទៅហើយ គឺក្នុងជីវិតគ្រួសារមួយដែលបានជួបប្រទះនូវរឿងរ៉ាវទុក្ខសោកដោយខ្លួនជាស្ដ្រីត្រូវប្ដីបោះបង់ចោលឱ្យរស់នៅជួលផ្ទះគេ និងចិញ្ចឹមកូនតូចៗដល់ទៅ៤នាក់ ហើយដោយសារទីទាល់ក្រខ្លាំងពេកក៏ដាច់ចិត្ដឱ្យផ្ទះគេលេងល្បែងស៊ីសងខុសច្បាប់ ដើម្បីបានកំរៃទិញអង្ករច្រកឆ្នាំង ។
រឿងរ៉ាវនេះបើកុំតែមានការអន្ដរាគមន៍ពីគ្រប់មជ្ឈដ្ឋានយ៉ាងក្ដៅគគុក រួមផ្សំនឹងការអាណិតអាសូរចំពោះក្មេង៤នាក់ជាកូនដែលកំព្រាគ្មាននរណាចិញ្ចឹម ម្ល៉េះសមស្ដ្រីជាម្ដាយជាប់គុកមិនទាន់រួចខ្លួនពីពន្ធនាគារឡើយ។ មិត្ដអ្នកអាននៅបានចាំ និងបានឮទេថា កាលពីដើមខែ មករា ២០១០កន្លងទៅ ស្ដ្រីឈ្មោះលី សុខអ៊ាង អាយុ៣៦ឆ្នាំ បានរងនូវការចោទប្រកាន់ជួលផ្ទះត្រង់ម្ដុំផ្សារដើមគរបើកឱ្យគេលេងល្បែងស៊ីសង “អាប៉ោង” ខុសច្បាប់ ហើយត្រូវសមត្ថកិច្ចកងរាជអាវុធហត្ថរាជធានីភ្នំពេញ ចាប់ខ្លួនបានជាង១០នាក់ មានទាំងមេវង់ និងអ្នកចាក់។ ក្រោយពីសមត្ថកិច្ចចាប់ខ្លួនក្រុមអ្នកលេង និងអ្នកចាក់អាប៉ោងជាង១០នាក់នោះមក ពួកគេត្រូវបានបញ្ជូនទៅតុលាការសាលាដំបូងរាជធានីភ្នំពេញ តាមនីតិវិធីច្បាប់។
ពេលនោះតំណាងអយ្យការក៏បានធ្វើការសាកសួរអស់រយៈពេល២ថ្ងៃទើបចប់សព្វគ្រប់ ហើយរឿងនោះត្រូវបានដាក់ជំរះផ្ទាល់ដោយអង្គសវនាការសំរេចឱ្យមនុស្ស១៤នាក់ វិលត្រឡប់ទៅផ្ទះវិញ ដោយឡែកស្ដ្រីឈ្មោះលី សុខអ៊ាង ត្រូវតុលាការផ្ដន្ទាទោសដាក់ពន្ធនាគាររយៈពេល១២ខែ និងពិន័យជាប្រាក់៥លានរៀល ហើយតម្រូវឱ្យឃុំខ្លួនចាប់ពីពេលនោះតែម្ដងទៅ ដោយចោទប្រកាន់ពីបទផ្ដល់ទីកន្លែងឱ្យគេលេងល្បែងស៊ីសងខុសច្បាប់ ។
បន្ទាប់ពីមានការឃុំខ្លួនស្ដ្រីឈ្មោះលី សុខអ៊ាង ធ្វើឱ្យកូន៤នាក់ដែលកំពុងកំព្រាត្រូវឪពុកបោះបង់ចោល ហើយពេលនេះម្ដាយជាប់គុកទៀតដោយសារគ្រាន់តែផ្ដល់ទីតាំងឱ្យគេលេងល្បែងស៊ីសងដើម្បីបានកំរៃបន្ដិចបន្ដួចយកមកចិញ្ចឹមកូនប៉ុណ្ណោះ។ ចំពោះប្រាក់អំណោយ៣០ដុល្លារនេះ កោះសន្ដិភាពបានទទួលពីលោកណុប ច័ន្ទតារា សហការីកោះសន្ដិភាពប្រចាំក្រុងឡងប៊ិច សហរដ្ឋអាមេរិក ដែលជាប្រាក់អំណោយរបស់លោកស្រី ព្រុំ គឹមជឿន ។
ចែករំលែកព័តមាននេះ